¹ Afta long ol samting ia mi harem wan bigfala vois blong wan bigfala namba blong ol man long heven oli talem se, "Haleluia. Hemi sevem yumi, yumi givim glori long hem mo paoa hemi blong God. ² Jajmen blong hem hem i stret mo i tru, from hemi jajem ol woman blo rod we oli spolem gud wol ia wetem ol fasin we oli stap silip wetem ol man we i no man blong hem. Hemi tekem panis from blad blong ol wokman blong hem we hem wan nomo i kilim olgeta." ³ Oli toktok namba tu taem: "Haleluia! Smok ia i stap go antap long hem gogo i no save finis." ⁴ Nao twenti-fo elda mo ol fo fala animol ia oli nildaon mo wosipim God, hemia we i stap sitaon long trone. Oli stap talem se, "Amen. Haleluia!" ⁵ Nao i gat wan vois i kamaot long tron,i talem se, "Presem God blong yumi, yufala evriwan ol wokman, yufala we i fraet long hem, mo yufala we i nogat nem mo yufala we ol haeman." ⁶ Nao mi harem vois we i kamaot long bigfala namba blong ol man olsem nois blong fulap wota we i stap ron, mo i olsem nois blong tanta, oli stap talem se, " Haleluia! From we Masta i stap rul, hem i Olmaeti, God blong yumi. ⁷ Yumi harem gud mo yumi glat mo yumi givim glori i go long hem from selebresen blong maret blong smol sipsip i stap kam, mo woman blong hem i mekem hemi redi finis. ⁸ Mo hem i gat wan gudfala klos blong hem i werem, mo i gat ol klin laen long hem" (from ol klos ia hem i wan pija blo ol gudfala samting we ol man blong God oli bin mekem) ⁹ Enjel ia i talem long mi se, "Yu raetem hemia: Ol man we God i invaetem olgeta blong kakae long maret blong smol sipsip oli mas glat." Mo hemi talem bakeken long mi se, "hemia i ol tru toktok we i kamaot long God." ¹⁰ Taem mi foldaon long leg blong hem blong wosipim hem, hem i talem long mi se, "yu no mekem olsem! Mi olsem wan wokman blong God, olsem yu mo ol brata blong yu we yumi stap biliv long Jisas, yumi wosipim God from olgeta oli stap talemaot Jisas from holi spirit i talem wanem blong olgeta oli talem" ¹¹ Nao mi luk heven i open, mi lukluk i go mo mi luk wan waet hos. Man ia we i stap ron long hos ia nem blong hem hemi fetful, mo tru. "Taem hem i jajem man mo taem hem i mekem faet be hemi stap mekem long fasin we i stret nomo. ¹² Ae blong hem i olsem flem blong faea mo hem i gat plante hat blong king long hed blong hem. Oli bin raetem nem blong hem finis be i nogat man i save long nem ia hem wan nomo i save. ¹³ Hem i werem wan klos we blong blad i stap long hem, mo nem blong hem i tok blong God. ¹⁴ Ol ami long heven oli folem hem wetem ol waet hos blong olgeta, mo oli werem ol klin klos we oli waet gud. ¹⁵ Aot long maot blong hem i gat wan sap naef blong faet we hem i usum blong kilim ol man long evri kantri mo bambae hemi rulum olgeta wetem wan ayan stik. Hem i stap stanstanap nogud long ol man olsem ol kreps nomo blong soemaot kros blong Olmaeti God. ¹⁶ Oli bin raetem nem blong hem we oli givim long hem long klos blong hem olsem: "King blong olgeta king mo masta blong olgeta masta." ¹⁷ Nao mi luk wan enjel i stap stanap long san. Hem i singaot bigwan i go long evri pijin we oli stap flae antap se, "kam, evriwan kam wan ples long bigfala kakae we God i mekem redi finis. ¹⁸ Yufala i kam kakae ded bodi blong ol king, ded bodi blong ol komanda, ol ded bodi blong ol strong man, ol ded bodi blong ol hos mo ol man we oli stap ron long ol, mo ded bodi blong evri man, olgeta we oli fri mo olgeta we oli slev, mo olgeta tu we oli no impoten mo olgeta we oli gat paoa. ¹⁹ Mi luk krija ia mo ol king blong wol ia wetem ol ami blong olgeta. Oli kam tugeta blong faet akensem man we i stap sidaon long hos mo ami blong hem. ²⁰ Nao man we i stap ron long hos i holemtaet krija ia wetem ol kiaman profet we oli stap mekem semak wok mo oli saen blong hem oltaem, wetem ol saen ya hemi stap kiaman long olgeta we oli gat mak blong krija ia mo oli stap wosipim pija blong hem. Oli sakem tufala i laef nomo i go long bigfala hol blong faea ia, we i fulap long faea mo salfa nomo. ²¹ Ol narafala wan hem i kilim olgeta long naef blong faet we i kamaot long maot blong hem ia we i stap ron long hos. Ol pijin oli kakai ded bodi blong olgeta ia.