¹ Bihaen long ol samting ia, mi luk wan narafala enjel i aot long Heven i stap kamdaon. Hemi gat bigfala paoa, mo bigfala laet we i saen aot long glori blong hem, i mekem ful wol i saen. ² Hemi stap krae wetem bigfala vois, hemi talem, "I foldaon, bigfala hae taon blong babilon i foldaon finis! Hem kam olsem ples we ol devel i stap long hem, wan kalabus blong evri spirit we i no klin, wan kalabus blong everi pijin we i no klin, wan kalabus blong evri animol we i no klin mo i no gud. ³ From we evri neisen oli dring waen blong fasin nogud ia blong hem. ol king blong wol ia tu oli mekem fasin nogud wetem hem. Ol bisnis man tu long wol oli kam rij man from paoa blong olgeta fasin nogud blong hem. ⁴ Nao mi harem wan narafala vois i kam long Heven i talem se, "ol man blong mi, yufala i kamaot long hem, blong yufala i no serem sin blong hem, mo bambae yufala i no save kasem trabol blong hem. ⁵ Ol sin blong hem i hipap we i hae olsem heven, mo God i stap tingbaot ol rong samting we hem i mekem. ⁶ Pem bak hem olsem we hem i bin stap pem ol narafala; mo dabolem pay blong hem from wanem we hem i bin stap mekem; ⁷ Olsem woman we i stap mekem lafet hem wan mo hem i stap harem gud tumas long kaen laef ia, hem i stap talemaot long hat blong hem wan se, 'mi wan kwin; Mi no wan wido mo bae mi neva krae.' ⁸ From samting ia, bae long wan dei fulap trabol we bae i kam: blong kilim ded hem, bae hem i krae, mo bambae hem i hangre. Bambae faea i bonem nogud hem, from we God hemi gat olgeta paoa, mo hem nao i jajem hem." ⁹ Olgeta king we oli stap long wol ia, we oli stap silip wetem woman ia, mo oli no controlem olgeta wetem hem bae oli krae mo harem nogud tumas taem oli luk smok blong faea we i kamaot long hem. ¹⁰ Bambae oli stanap long we lelebet from oli fraet se panismen we hem i kasem bae i kasem olgeta, Nao oli talem se. "Sori tumas, sori tumas long bigfala siti ia, Babilon, siti we i strong tumas! From long wan hawa ia nomo panismen blong yu i kam tru." ¹¹ Ol bisnis man raon long wol bai oli harem nogud mo krae from we i no moa gat man blong pemaot ol samting long hem. ¹² Olgeta samting ia olsem gol, silva, ston we mani blong hem i hae, pel, red mo pepol kaliko mo praes blong hem i hae, mo kaliko ya slik mo praes blong hemi hae, mo skalet. Bambae i nomo gat man i pem ol difren kaen wud we mani blong hem i hae, we oli mekem long hon. Mo ol wud we mani blong hem i hae,we oli mekem long brons, metol, ayan, mabol, ¹³ Mo ol difren samting we oli gat gudfala smel olsem, waen, oil lif, flaoa mo wit blong olgeta. Ol buluk, ol sipsip, ol hos mo ol kat, mo ol slev blong olgeta. Bambae i no moa gat man i pem slef blong olgeta wetem evri samting we oli gat. ¹⁴ Ol frut we yu stap wantem tumas blong gat oli kamaot long yu finis! Yu lusum evri gudfala samting we i mekem yu gat wan gudfala laef, bambae yu neva save faenem olgeta bakegen.' ¹⁵ Bambae ol bisnis man we oli kam rijman tru long hem bae oli stanap long we long hem from oli fraet tumas long trabol we hemi stap fesem, oli stap krae bigwan mo oli harem nogud tumas. ¹⁶ Bambae oli talem se, "Sori tumas, sori tumas long bigfala siti ia we hem i werem ol gudfala klos ia we i pepol linen mo long skalet. Mo yu saen wetem gol mo ol gudfala julri mo pel! ¹⁷ Long wan hawa nomo, evri samting we i stap mekem yu yu rij, God i spolem oli kam wes nomo. "Olgeta kapten blong sip, evri man we oli stap travel mo oli stap liv, mo ol pasenja mo ol kru, oli stanap long wei long hem mo oli stap lukluk. ¹⁸ Olgeta oli stap krae bigwan taem we oli luk smok blong faea i kamaot long hem, nao oli stap krae oli talem se, 'wanem taon i olsem bifala taon ia?" ¹⁹ Oli stap sakem das long hed blong olgeta from we oli harem nogud tumas. Oli stap krae mo oli stap harem nogud tumas, nao oli stap talem se, 'Sori tumas, sori tumas long bigfala taon ia we i mekem olgeta man we oli gat sip oli kam rijman from ol samting we oli stap long hem. Be long wan aoa nomo God i distroem gud hem." ²⁰ "Yufala we i stap long heven, yufala i harem gud! From we God i distroem taon ya babilon finis. Yufala i mas harem gud, ol holi man mo ol aposol mo profet blong God! God i jajem taon ia from we hem i stap mekem ol samting nogud long yufala. ²¹ Nao wan bigfala enjel i tekem wan ston we i olsem wan maelston mo i sakem i go long solwota, mo i stap talem se, "long fasin ia bigfala taon ia babilon,bambae God i sakem yu yu go daon olsem we mi stap sakem ston ia i go daon. Bambae i nomo gat man i save luk yu bakeken. ²² Nogat man bae i save harem miusik long strit blong yu bakeken,mo nogat man bambae i save harem nois blong ol man i stap plei flut,mo trampet. Mo bae i no gat man we i gat save blong mekem ol nara kaen instramen i stap long yu, bambae oli nomo save harem nois blong maelston ia bakegen. ²³ Bambae i nomo gat laet i saen long hom blong yufala bakeken. Nogat man bambae i save harem man mo woman i stap singsing taem oli jes mared. Ol bisnis man blong yu oli ol prinj blong wol ia, mo yu mekem evri kaontri oli bilif long ol rabis samting we i kiaman nomo from ol majik blong yu. ²⁴ Oli bin faenem Blad blong ol profet mo ol holi man blong God long hem, Mo blad blong evri man, we oli bin kilim olgeta i ded long wol."