¹ Bakeken Jisas hemi wokbaot i go long haos blong prea, mo long ples ia gat wan man we hemi no save stretem han blong hem. ² Sam man oli muv klosap, blong lukluk gud se bae Jisas hemi save hilim hem long sabat, blong oli save faenemaot sam poen blong hem. ³ Nao Jisas hemi talem long man we han blong hem i no save stretem, ''Yu girap, mo yu stanap long midel blong evriwan." ⁴ Nao Jisas i talem long evriman se, "Igat wan loa we i talem se, i gud blong mekem wan gudfala samting long sabat dei, o blong mekem wan nogud samting; blong sevem wan laef, o blong kilim ded wan laef?'' Be evriwan i stap kwaet. ⁵ Hemi lukluk i go raon long olgeta wetem kros, mo hemi sori long olgeta from hat blong olgeta i strong tumas, nao hemi talem long ol man ia se, ''Stretem han blong yu. ''Hemi stretem han blong hem, mo han blong hem i kam gud bakeken. ⁶ Ol farisi oli ko aot mo hariap nomo oli stat blong go joen wetem ol laen blong king herod, mo oli stap toktok hao blong oli save kilim hem i ded. ⁷ Nao Jisas, wetem ol disaepol, oli ko long solwota, i gat wan bigfala grup blong ol man we ol folem olgeta, we oli kam long Galili, mo Judia ⁸ mo long Jerusalem, mo long Idumia, mo i go moa long Jordan, mo raon long Tyra, mo Sidon. Taem oli harem ol samting ia we hemi stap mekem, wan bigfala grup oli kam tru long hem. ⁹ Jisas hemi talem long ol disaepol blong faenem wan smol bot i redi, from fulap man we oli stap, blo oli no fasfas klosap long hem. ¹⁰ From hemi hilim fulap finis, nao olgeta sikman long ples ia, oli stap kam pus blong mas tajem hem. ¹¹ Mo taem ol devel oli luk Jisas, oli foldaon long foret blong hem, mo oli stap krae strong, mo oli talem se, "Yu stret pikinini blong God.'' ¹² Hemi tok strong blong oli no mas talemaot nem blong hem. ¹³ Nao hem i go antap long wan bigfala hil, mo hem i singaot olgeta we Hem i wantem olgeta, nao oli kam long hem. Hem i jusumaot ol twelf man ¹⁴ blong hem we naia (oli singaotem olgeta ol aposol) blong oli save stap wetem hem mo hemi save sendem olgeta blong talemaot gud nius blong hem, ¹⁵ Mo oli save gat paoa blong ronemaot ol devel. ¹⁶ Hem i jusumaot saemon we hem i putum niu nem se Pita; ¹⁷ Jemes boe blong Sebedi, mo Jon we brata blong Jemes, Jisas hemi givim niufala nem blong tufala se Boanejes, hem ia hemi, boe blong tanda; ¹⁸ Mo Andru, Filip, Batolomiu, Matiu mo Tomas, Jemes boe blong Alfeas, mo Tadeas, Saemon we hem i sialot, ¹⁹ Mo Judas Iskariot, we bae hem nao hemi letem Jisas long han blong ol enemi. ²⁰ Nao Jisas hemi kambak long haos, nao ol grup blong ol man oli kam tugeta bakeken, nao oli no kakai bred. ²¹ Taem ol famli blong hem oli harem olsem, oli go aot blong tekemaot hem, from oli harem se, ''tingting blong hem i stap lus.'' ²² Be ol tija blong loa we oli kam daon long Jerusalem oli talem se, ''hemi fulap long devel blong Bielsebul'' mo "mekem se hemi gat paoa blong ronemaot ol devel.'' ²³ Nao Jisas hemi singaotem olgeta oli kam long hem, mo hemi talem wan parabol long olgeta, ''Hao nao Setan i save ronemaot setan? ²⁴ Spos ol man blong jif oli seraot, mo haf oli agens long nara haf, bae wok blong jif ia bae ino save stanap. ²⁵ Sapos wan famli long wan haos oli seraot long tu haf, bae famli ia bae oli no save stap gud. ²⁶ Mo sapos ol man blong setan oli stap agens long olgeta mo oli seraot, hemi no save stanap hem wan, be bae i finis. ²⁷ Be nogat wan man hemi save go insaed long haos blong wan strong man blong stilim ol ting blong hem, bae hemi mas fasemtaet hem fastaem, nao bihaen bae hemi save go karem ol ting blong hem. ²⁸ Tru mi talem long yufala, evri sin blong pikinini blong man bae oli forgivim, mo tu ol nogud toktok we man hemi talem. ²⁹ Be wanem toktok we man hemi talem agens long Holi spirit bae i nogat forgivnes, be bae i stap gogo ino save finis.'' ³⁰ Jisas hemi talem olsem from oli talem se,''Hem i gat wan rabis spirit.'' ³¹ Nao mama blong hem wetem ol brata blong hem oli kam stanap aotsaed. Oli sendem wan i go blong talem long hem, blong hemi kam luk olgeta aotsaed. ³² I gat fulap man oli stap sidaon raonem hem nao oli talem long hem, ''Mama blong yu wetem ol brata blong yu oli stap aotsaed, oli stap lukaotem yu.'' ³³ Hem i ansarem olgeta, "Hu ia mama mo brata blong mi?" ³⁴ Hemi lukluk raon long olgeta we oli stap sidaon long raon, mo hemi talem se, "Yufala luk hemia nao ol mama, mo ol brata blong mi! ³⁵ Spos eniwan we hemi mekem wanem we God hemi wantem, hem ia nao brata, mo sista, mo mama blong mi."