¹ Taem Jisas, ikam bak long jodan riva hemi fulap gud long paoa blong Holi Spirit,nao Holi Spirit i lidim hemi igo long drae ples, ² Hem i stap long drae ples ia blong 40 dei mo hemi no kakai wan samting. Mo long taem ia setan i kam traem mekem Jisas blong i mekem wan samting nogud, from we Jisas i hangre tumas. ³ Nao setan i talem long Jisas se, "Spos yu yu pikinini blong God,Yu tok long ol ston ia blong oli kam bred." ⁴ Jisas i talem long hem se, "No!Baebol i talem se 'ino bred nomo we i save mekem man i laef." ⁵ Afta long hemia setan i tekem Jisas igo anta long hae ples mo i soemaot ful wol long hem. ⁶ Mo i talem long Jisas se,"olgeta samting we yu luk oli stap long evri ples long wol ia oli blong mi, mo mi save givim olgeta samting ia i go long eni man nomo we mi jusum. ⁷ Spos yu benem ni blong yu mo wosipim mi,bae mi givim evri samting ia long yu. ⁸ Be Jisas i talem long hem se, "Baebol i talem se.'Yu mas mekem wosip long Hae God nomo,mo yu mas obei mo hona long Hem nomo."' ⁹ Afta setan i lidin Jisas igo long Jerusalem mo i putum hem antap long hae ples blong en blong haos blong prea.Ale i talem long hem se,"Spos yu yu pikinini blong God, yu jam antap long ples ia igo daon long graon. ¹⁰ Yu save long Baebol i talem se "God i talem long ol enjel blong hem blong oli lukaot gud yu. ¹¹ Mo i talem tu se bae oli holem han blong yu blong leg blong yu i no save kasem ston. ¹² No!Jisas i toktok igo bak long setan i talem se,Baebol i talem tu se, 'yu no mas mekem wan kranke samting blong traem God mo luk se bae hemi save sevem yu." ¹³ setan i traem plante wei blong mekem Jisas i foldaon be nogat nao i mekem se hemi lego Jisas i stap hem wan mo igo wet blong faenem wan narafala rod. ¹⁴ Long taem ia Jisas i fulap gud long paoa blong Holi Spirit mo hemi go bak long Galili, ol man we oli stap olbaot long eria ia oli stap talemaot nius igo raon long evri ples long Galili. ¹⁵ Taem hemi tij insaed long ples blong prea, evri wan oli presem hem. ¹⁶ Nao Jisas igo bak long Nazareth, taon ia we hemi bin gro ap long hem,long sabat dei hemi go long ples blong prea olsem oltaem we i stap mekem hemi stanap blong ridim Baebol. ¹⁷ Nao oli givim buk blong Aesaea blong Hemi ridim, Hemi openem buk ia stret long ples we Aesaea i raetemaot, ¹⁸ "Spirit blong Hae God i fulmap mi, hemi jusumaot mi finis blong talem aot gud nius ia long ol pua man. Hemi semdem mi blong go talem aot long ol man we oli stap long kalabus se "yufala i fri finis."Mi mas talem long olgeta we oli no save lukluk se yufala i save lukluk bakegen,Mi mas mekem olgeta we oli stap slev oli kam ol fri man. ¹⁹ Mo mi stap talemaot we long yia ia God bae i sevem ol man blong hem. ²⁰ Afta long riding, Jisas i klosem buk ia mo i pasem i go bak long man we i stap lukaot long ol buk, afta hemi go sidaon, mo evri man oli stap lukluk hem,nao hemi stat blong tijim olgeta. ²¹ Hemi talem long olgeta se "tedei ol tok we mi ridim finis long yufala oli kam tru, stret long taem we yufala i stap lesin. ²² Nao olgeta evriwan oli stap askaskem long olgeta se 'Eh tru ia se hemi pikinini blong Josef?" ²³ Nao Jisas i talem long olgeta,"Mi save olfala tok ia we yufala i wantem talem long mi se'Docta yu hilim yu wan.'Mo yufala i wantem talem tu se 'mifala i harem nius ia we yu stap mekem ol samting blong sapraes long taon ia Kapenum. Hemia i hom taon blong yu mo yu traem mekem ol sem samting ia long ples ia."' ²⁴ Nao Hemi talem se,"wanem we bae Mi talem naoia i tru nomo, ol man ples blong profet oli no welkamem profet i kam long hom taon blong hem. ²⁵ Wanem we mi talem i tru nomo.Long taem bifo we Elaeja i stap laef yet i gat plante wido long kaontri blong Israel be long taem ia inogat ren kasem 3 yia i pas mo kolosap long medel blong yia bakegen, mo long taem ia ol man inogat kakai mo evri ples long Israel oli stap hangre. ²⁶ Be Hae God ino sendem Elaeja blong go giv han long wan wido blong Israel, hemi sendem Elaeja igo long kaontri ia Sidon,long wan ples we nem blong hem Serafat blong helpem wan wido we istap ia. ²⁷ Mo i gat fulap man long Israel we oli kasem rabis sik ia leprosy long taem blong Elaeja. Be Hae God ino mekem wan long olgeta i gud bakegen long taem ia. Be hemi mekem wan man Syria we i kasem sik ia i gud bakegen, mo nem blong man ia Naman. ²⁸ Taem ol man we oli stap insaed long haos blong prea oli harem ol toktok ia we Jisas i talem,olgeta evriwan i kros nogud long hem. ²⁹ Oli stanap mo oli fosem hem blong i mas aot long taon ia, nao oli pusum Hem igo long en blong taon ia we istap long saed blong wan hill mo oli wantem sakem Hem i go daon long stampa blong hill ia. ³⁰ Be Jisas i wokbaot i go tru long medel blong olgeta mo i aot i go long we. ³¹ Hemi go long wan taon long Galili we nem blong hem Kapenum,long sabat dei hemi stap tijim ol man. ³² Evri man oli sapraes tumas long ol samting we Hemi tijim,from Hemi stap toktok wetem wan paoa. ³³ Nao insaed long haos blong prea ia igat wan sik man we hemi gat wan rabis spirit we i fulmap gud hem. Mo rabis spirit ia i mekem man ia i stap singaot bigwan. ³⁴ I stap talem se "Jisas man Nazareth?yu lego mifala!Mi mi save yu!Yu yu Holi wan blong God!" ³⁵ Be Jisas i toktok long rabis spirit ia se,"yu stap quwaet!Yu kam aot long man ia!" Nao rabis spirit ia imekem man ia i foldaon i go long graon mo i lego man ia be ino givim wan kill long hem. ³⁶ Nao olgeta man oli sapraes tumas long samting ia nao oli stap talem long olgeta se "yufala harem wanem man ia i stap talem!Hem i gat olgeta paoa blong tok long ol rabis spirit, taem hemi givim oda oli kamaot. ³⁷ Mo oli stap talem nius blong Jisas long evri man.From samting ia ol man we oli stap olbaot long Kapenum oli kasem nius blong Jisas. ³⁸ Jisas i girap i aot long haos prea mo i go long haos blong Saemon. Mama blong woman blong Saemon i sik mo bodi blong hem i hot tumas.Oli askem Jisas blong i mekem hem i harem gud. ³⁹ Nao Jisas ikam stanap klosap long hem,Hemi tok long sik ia blong i aot i go lus mo stret long sem taem ia nomo hemi harem gud bakegen. Hemi girap nao i stap preperem kakai blong ol man we oli kam blong luk hem. ⁴⁰ Long aftenun, ol man long taon oli karem ol sik man ikam long Jisas, olgeta ia oli gat ol difdifren sik,Jisas i putum han blong Hem long olgeta wanwan mo oli kam gud bakegen. ⁴¹ Mo ol rabis spirit tu oli kamaot long fulap man.Oli stap sing singaot bigwan se 'yu yu pikinini blong God !"Ol spirit ia oli save se Jisas hemi Mesaea, from samting ia Jisas i stopem olgeta. Hemi mekem oli no save toktok. ⁴² Long narafala dei we kolosap i brok delaet, Jisas igo long wan ples we hem wan nomo i stap long hem,ol man oli go lukaotem hem. Mo taem oli faenem hem oli talem se,'plis yu stap wetem mifala, yu no lego mifala.' ⁴³ Be Jisas i talem long olgeta se 'Mi mi mas go tru long ol narafala taon blong talemaot gud nius long olgeta. Bambae mi talemaot long olgeta olsem wanem nao God i save rulum laef blong ol man blong hem. ⁴⁴ Mo Hem i aot i go long plante taon long kaontri ia Judia, hemi go insaed long haos blong prea blong ol man Israel mo i stap tijim olgeta.