¹ Nao taem blong lafet blong kakai bred ia we i nogat is long hem i stap kam kolosap.Taem ia oli kollem se lafet blong pasova. ² Nao ol lida blong jif pris mo ol tija blong loa oli wantem blong kilim Jisas.Oli stap toktok tugeta blong faenem hao nao bae oli save holem Hem. Be hemi had tumas long olgeta from oli fraet long ol man. ³ Nao setan igo insaed long Judas Iscariot.Judas hemi wan long ol 12 disaepol blong Jisas. ⁴ Nao judas iaot long olgeta, i go blong toktok wetem ol jif pris. Mo ol kapten blong ol soldia blong haos blong God, blong mekem rod blong letem Jisas long olgeta. ⁵ Nao olgeta ia oli glad tumas, mo oli mekem wan promes wetem Judas blong oli givim mani long hem. ⁶ Ale, Judas i agri blong mekem.Nao hemi stap lukaotem rod blong givim Jisas long olgeta. Mo hemi wantem letem Jisas igo long han blong olgeta,long taem we i nogat plante man oli stap. ⁷ Nao long dei ia blong ol man Jiu oli kakai bred we inogat is long hem.Long dei ia, oli mas kilim wan iang sipsip blong kakai long lafet blong pasova ia. ⁸ Nao Jisas i sendem Pita mo Jon se, yutufala igo mekem redi kakai blong lafet blong pasova,blong yumi kakai. ⁹ Nao tufala i askem long hem se, "wea ples nao yu laekem blong mitufala i mekem redi kakai long hem?" ¹⁰ Jisas i talem long tufala se, "yutufala i lesin gud.Taem yutufala i go insaed long taon,bambae wan man i mitim yutufala. Hemi stap karem wan botel wota. Mo yutufala i mas folem hem kasem hemi go insaed long haos. ¹¹ Nao bambae yutufala i mas talem long man blong haos ia se, "Tija blong mifala i sendem tok ia i kam long yu :blong askem se,man ia we hemi wantem blong mekem lafet blong pasova long hem,istap wea? ¹² Nao bambae man ia i soem wan bigfala rum long yufala antap.I gat evri samting blong hem i stap finis we yutufala i nidim.Long ples ia nao bambae yutufala i mekem redi kakai blong yumi blong lafet ia."Nao Hem i sendem tufala igo ¹³ Nao Pita mo Jon tufala i faenem evri samting i stret olsem we Jisas i talem. Mo tufala i mekem redi kakai blong lafet blong pasova. ¹⁴ Nao long taem blong kakai, Jisas i kam sidaon long tebol,mo ol aposol oli sidaon wetem hem blong oli kakai tugeta. ¹⁵ Nao hemi talem long olgeta se, "Mi, mi wantem tumas blong kakai tugeta long lafet blong pasova ia wetem yufala,nao bihaen bambae mi mi harem nogud long bodi blong mi. ¹⁶ Mi mi talem long yufala, bambae mi mi no save kakai, kakai ia bakegen kasem taem we mining blong fulfil long niufala wol we God i King long hem. ¹⁷ Nao Jisas i tekem kap, i talem tankyu long God from, hemi talem se, "yufala i tekem yufala evriwan i dring long hem. ¹⁸ Mi mi talem long yufala se, 'bambae mi nomo save dring waen ia bakegen kasem taem we niufala wol ia we God i King long hem bambae i kamtru." ¹⁹ Nao Hemi tekem bred, i talem tankyu long God from.Nao hemi brokem bred ia, mo i givim long ol aposol blong Hem, nao hem i talem se "Hemia bodi blong mi, we mi mi givim long yufala.Oltsem yufala imas mekem samting ia blong tingbaot mi bakegen. ²⁰ Long sem fasin, taem oli finis kakai, hemi tekem kap, nao i talem se,kap ia hemi niufala promes blong God, mo blad blong mi we bambae iron from yufala, hem bae i mekem promes ia i stanap. ²¹ Be yufala i lesin. Man we bae i putum mi long han blong ol enemi, hemi stap tekem kakai wetem mi long tebol ia. ²² Mi mi pikinini blong man, we bambae mi mas ded, olsem we Hae God i mekem finis. Be sori tumas long man ia we bae i letem mi long han blong ol enemi." ²³ Nao oli stap askem long olgeta se "eh huia i mekem olsem? ²⁴ Nao oli rao from tingting ia se hu long olgeta nao we hemi hae moa long olgeta. ²⁵ Nao Jisas i talem long olgeta se, "ol king blong ol hiten man oli gat paoa ova long olgeta. Mo ol hae man blong olgeta oli wantem kasem fren ia se,Fren blong ol man ²⁶ Be bambae fasin blong yufala i no mas olsem.Spos wan long yufala i hae moa, hemi mas mekem hemi kam olsem yungfala moa long yufala. Mo man we i lida hemi mas kam olsem man blong wok blong yufala. ²⁷ Huia i hae moa?Man we i sidaon long tebol blong kakai no man we i stap tekem kakai i kam.Yes, hemi man we istap sidaon long tebol blong kakai. Be mi mi stap wetem yufala olsem man blong karem kakai nomo ikam long yufala. ²⁸ Yufala i neva gowe long mi.Yufala i bin stap oltaem long saed blong mi taem we mi stap go tru long ol hadtaem. ²⁹ Naia mi talem long yufala se bambae yufala i rul wetem mi.Papa blong mi i talem se bambae mi rul wetem hem long Kingdom blong Hem. Mi talem tu long yufala se bambae yufala i rul wetem mi. ³⁰ Long Kingdom blong mi bae yufala i sidaon long tebol wetem mi. Bambae yufala i kakai mo dring wetem mi. Bae yufala i sidaon olsem ol king long ol gudfala jea.Nao bae yufala i jajem ol man blong ol 12 laen blong Israel. ³¹ Mo Jisas i gohed i talem se,Saemon, yu mas lesin gud long mi!Setan i askem blong traem fet blong yufala evriwan. ³² Be mi prea from yu finis Saemon, blong bambae yu stap bilif long mi oltaem. Mo bambae yu mas mekem olsem :Taem yu tanem tingting blong yu i kambak long mi,yu mas givhan long ol narafala brata blong yu blong oli kam strong. ³³ Nao Saemon i talem se,Masta mi redi blong go long presin weten yu. Mo mi redi tu blong ded wetem yu." ³⁴ Jisas i talem long hem se,tru Mi talem long yu, Pita. tede long naet,bambae yu talem tri taem se yu no save mi bifo faol i singaot blong istap brok telaet long moning. ³⁵ Mo Jisas i askem long ol disaepol blong hem se, 'taem mi sendem yufala i go blong prij, yufala i mekem olsem we mi talem, yufala i no mas tekem paos, pasket o sus. Be olsem wanem?yufala i sot long sam samting?olgeta oli talem se, "No" ³⁶ Nao Hemi talem long olgeta se,"be naia man we igat paos mo pasket, hemi mas karem. Mo man we i nogat naef blong faet, igud hemi salem kot blong hem,blong go pem wan. ³⁷ Mi talem long yufala,wanem we oli raetem long tok blong Baebol from mi oli mas kam tru.Tok ia i talem se,"ol man bae oli ting se hemi wan long ol man nogud."Mo samting ia bae i hapen ino long taem,blong ol tok ia ikam tru. ³⁸ Nao ol disaepol oli talem se,"Masta, yu luk, mifala i holem tu longfala shap naef wetem mifala."Jisas i talem long olgeta se,"oraet, inaf ia." ³⁹ Nao Jisas iaot long taon ia, hemi go long wan hil nem blong hem olif. Hemi go olsem we hemi stap go evri naet mo ol disaepol oli folem hem. ⁴⁰ Nao hemi kasem ples we hemi stap go long hem,mo hemi talem long olgeta se, "yufala i mas prea, long God,blong bambae hemi givhan long yufala blong yufala ino mekem ol rabis fasin. ⁴¹ Nao Jisas igo long we lelebet long olgeta, mo hemi nildaon nao hemi i prea, ⁴² Nao hemi talem se,Papa spos yu wantem, yu save tekemaot harem nogud ia long mi. Be mi no askem yu blong mekem wanem we mi wantem, Mi wantem yu mekem wanem we yu wantem." ⁴³ Nao wan enjel iaot long Heven i kam long hem, mo i mekem hemi kam strong moa. ⁴⁴ Jisas i stat blong gat trabol long tingting blong hem,nao hemi stat blong prea strong moa we swet blong hem i stap foldaon long graon olsem blad. ⁴⁵ Nao taem Jisas i finis prea, Hem i stanap mo igo luk ol disaepol blong hem.Jisas i luk olgeta we oli slip,oli taet tumas from we oli harem nogud. ⁴⁶ Jisas i talem long olgeta se, Yufala ino sud slip, 'yufala i girap mo yufala i prea !Askem God blong givhan long yufala, blong yufala ino mekem ol rabis fasin." ⁴⁷ Be taem Jisas istap toktok yet,ol soldia wetem plante man oli kam tru long ples ia.Judas we hemi wan long ol 12 aposol blong Jisas, hem nao i lidim olgeta blong kam long Jisas.Nao hemi kam klosap long Jisas mo i kisim hem. ⁴⁸ Jisas i talem long hem se, 'Judas, from wanem yu wantem kisim mi?Yu wantem blong soemaot long ol soldia blong oli holem mi?" ⁴⁹ Ol man klosap long Jisas oli luk wanem we istap hapen, nao oli askem long hem se, 'Masta bambae mifala i yusum ol naef blong faet blong mifala?' ⁵⁰ Nao wan long olgeta i girap, i katemaot raet saed sorae blong wan long ol lida blong ol hae pris. ⁵¹ Be Jisas i talem se, 'eh i naf !"nao hemi tekem sorae blong man ia, u putum igo bak mo sorae blong hem ikam gud bakegen. ⁵² Nao Jisas i tok long ol man we oli kam blong holem Hem.I gat ol jif pris mo ol tija blong loa mo elda tu we oli kam blong holem Jisas. Mo Jisas i talem long olgeta se, 'yufala i kam long ples ia wetem ol longfala shap naef mo ol nalnal.Yufala i yusum ol samting ia blong holem mi olsem se mi wan stil man mo mi kilim man i ded. ⁵³ Be evri dei mi mi stap wetem yufala long haos blong Hae God, be yufala ino holem Mi. Be naia i taem blong yufala,mo i taem blong paoa blong tudak i rulum man. ⁵⁴ Nao ol man oli holem hem mo oli tekem hem i go long haos blong hae pris. Mo Pita i folem hem be i no go klosap tumas long hem. ⁵⁵ Ol man oli laetem faea long iad blong hae pris ia blong oli wom long hem mo oli sidaon raon long faea, nao Pita tu igo sidaon wetem olgeta. ⁵⁶ Nao wan haos gel iluk Pita istap sidaon wetem olgeta long saed blong faea. Hemi luk gud mo i talem se, 'Man ia tu istap folem Jisas.' ⁵⁷ Pita i talem long woman ia se, 'yu stap talem wanem ia, mi no save long man ia." ⁵⁸ Be ino long taem, wan narafala man i luk hem mo i talem se,Eh !Yu tu yu wan long olgeta !Be Pita i talem se,man ia mi no wan long olgeta tu." ⁵⁹ Biaen,olsem wan aoa i pas, wan narafala man i luk hem mo i talem se, 'olgeta i tru ia, man ia tu istap bihaen long Jisas. Hemi wan man Galili ia.' ⁶⁰ Be Pita i talem se, 'man ia,mi no save wanem ia yu stap tokbaot.'nao taem hemi stap toktok yet, wan faol i singaot bigwan. ⁶¹ Nao Jisas i tanem Hem mo i lukluk Pita.Pita i tingbaot toktok blong Jisas we i talem long hem se, long naet ia we faol i no singaot yet,blong kasem moning bae yu talem tri taem se,yu no save mi! ⁶² Nao Pita i go aotsaed i krae we i krae. ⁶³ Nao long taem ia ol man we oli stap holem Jisas, oli stap mekem plei long hem mo oli stap wipim Hem. ⁶⁴ Oli kavremap ae blong hem wetem wan klos blong hemi no save lukluk.Nao oli talem long Hem se, 'Yu stap talem se yu stap tekem mesej blong God !Traem talem se huia i faetem yu naia?' ⁶⁵ Mo oli stap talem plante nogud toktok agens long Hem. ⁶⁶ Taem i brok delaet, ol elda blong ol laen blong Israel mo ol tija blong loa mo ol hae pris oli mit tugeta long kaonsel blong olgeta.Nao oli tekem Jisas i kam stanap long foret blong olgeta. ⁶⁷ Nao oli askem long hem se, 'Yu yu Mesaea ?Spos i tru, Yu talem long mifala. Be Jisas i talem long olgeta se, spos mi talem long yufala se mi mi Mesaea, bambae yufala ino save bilif long mi yet. ⁶⁸ Mo spos mi askem kwestem long yufala, bae yufala ino save talem ansa blong hem. ⁶⁹ Be stat naia igo,mi mi pikinini blong man,bambae mi sidaon long wan gudfala ples. Bambae mi sidaon long raet saed blong God we igat olgeta paoa! ⁷⁰ Nao olgeta evri wan oli talem se,'olsem wanem ?Yu yu pikinini blong God ?Nao Jisas i talem se, ' iolsem we yufala i talem." ⁷¹ Nao oli talem se, Yumi nomo nidim wan man blong kam talem tok blong witnes long man.Yumi harem finis ol toktok we hemi talemaot."