¹ Ale, taem we Jisas i stap go, hem i luk wan blaen man we i bon olsem. ² Nao ol disaepol blong hem oli stap askem long hem se, ''tija, hu ia i bin mekem sin ia, papa o mama blong hem, blong mekem se hemi bon i blaen?'' ³ Jisas i ansa se, ''I no man ya o papa mo mama blong hem i sin, be i bin hapen blong God i save soemaot ol wok blong hem long ol man ia. ⁴ Long delaet, mi mas mekem wok blong hem we i bin sendem mi. Tudak i stap kam we bae man i nomo save wok. ⁵ Taem mi stap long wol, mi mi laet blong wol ia.'' ⁶ Afta we Jisas i talem ol samting ia, hemi spet long graon, mo i mekem sofmat wetem graon ia ,mo i kavremap ae blong blaen man ia wetem sofmad. ⁷ Nao Jisas i talem long hem se, ''Go, wasem ae blong yu long pul Siloam'' ( we i minim se ''Sendem''). Ale, hemi go wasem; mo taem hemi kam bak, hemi save lukluk. ⁸ Nao ol neiba blong man ia mo olgeta we oli save hem olsem blaen man oli askem se, ''Be hem i no man ia we i bin sitdaon mo askem mani?'' ⁹ Samfala oli talem se, ''Yes, man ia nao.'' Be samfala oli talem se, ''No, hemi olsem man ia nomo.''Be hemi talem se, ''Si mi mi man ia.'' ¹⁰ Mo oli askem long hem se, ''Olsem wanem nao ae blong yu i open?'' ¹¹ Hemi ansa se, ''Man ia we nem blong hem Jisas, hemi mekem sofmad mo i putum long ae blong mi mo i talem se, 'Go long Pul Siloam mo wasem.' Ale,mi go wasem, mo afta mi save lukluk.'' ¹² Nao oli askem hem se, ''Wem man ia? ''Hemi talem se, ''Mi no save.'' ¹³ Afta, oli karem man ia we i bin blaen i kam long ol farasi. ¹⁴ Mo hemi sabat dei taem Jisas i mekem sofmad mo i openem ae blong man ia. ¹⁵ Nao ol farasi tu oli askem hem olsem wanem nao hemi save lukluk.Hemi ansa long olgeta se, ''Man ia i putum sofmad long ae blong mi, mo mi wasem. Ale, naia mi save lukluk.'' ¹⁶ Mo sam farasi oli talem se, ''Man ia i no blong God from we hem i no kipim sabat dei.'' Be samfala oli askem se, ''Hao nao wan sina man i save mekem ol merikol olsem?'' Naia oli raorao from. ¹⁷ Ale, oli kwestenem blaen man ia bakegen se, ''Wanem tingting blong yu long man ia we i bin openem ae blong yu?'' Hemi ansa se, ''Hemi i wan profet.'' ¹⁸ Nao ol Jiu oli no biliv se hem i bin blaen bifo be naia hemi save lukluk. Ale, oli singaotem Papa mo mama blong man ia we i save lukluk. ¹⁹ Mo oli askem tufala se, ''Hem ia hemi boe blong yutufala we yufala i stap talem se hemi bon blaen?Hao nao hemi save lukluk bakegen?'' ²⁰ Papa mo mama blong hem oli ansarem olgeta se, ''Mifala i save se hemi boe blong mitufala we hemi bon blaen. ²¹ Be hao nao hemi save lukluk naia, mifala i no save, mo huia i bin openem ae blong hem, mitufala i no save nating. Hemi big wan finis, go askem hem. Hemi save toktok long bihaf blong hem wan.'' ²² Papa mo Mama blong hem i talem olsem, from we tufala i fraet long ol Jiu. From oli Jiu oli talem finis se sipos eni man i talem aot se Jisas i Mesaea, bae oli aotem man ia long sinagog. ²³ From samting ia nao, Papa mo mama blong hem oli talem se, ''Hemi big wan finis, mo askem long hem.'' ²⁴ Nao namba tu taem oli singaotem man ia we i bin blaen mo oli talem long hem se, ''Yu sud givim glory i go long God. From mifala i save se man ia hemi wan sina man nomo.'' ²⁵ Hemi ansa se, ''Mi no save se hemi sina man o no. Mi save wan samting nomo:Se fastaem mi blaen, be naia mi save lukluk.'' ²⁶ Nao oli askem hem bakegen se, ''Hem i mekem wanem long yu? Hem i bin openem ae blong yu olsem wanem?'' ²⁷ Hem i ansarem olgeta se, ''Mi talem long yufala finis, be yufala i no lesin. From wanem yufala i wantem harem bakegen?Yufala tu i wantem kam ol disaepol blong hem?'' ²⁸ Nao oli toktok stong long hem se ,"Yu yu disaebol blong hem, be mifala ol disaebol blong Moses. ²⁹ Mifala i save se God i bin toktok wetem Moses, be long man ia, mifala i no save se hem blong wea." ³⁰ Hemi i ansarem olgeta se, ''Mi sek long samting ia, yufala i no save se man ia blong wea, be hem iet i bin openem ae blong mi. ³¹ Nao yumi save se God i no lisin long ol sinaman ia, be sipos eni man i wosipim God mo i mekem plan blong hem, bae God i harem hem. ³² Long stat blong wol kasem naia, yumi nefa harem we wan man i openem ae blong nara man we i bon blaen. ³³ Sipos man ia i no blong God, hemi no save mekem wan samting nating.'' ³⁴ Oli ansarem hem se, ''Yu bon tru long sin, mo yu nao bae yu tijim mifala?'' Ale, oli sakem aot hem. ³⁵ Nao Jisas i harem we oli bin sakemaot hem long sinagog. Mo taem ia Jisas i faenem hem, i talem long hem se, ''Yu biliv long pikinini blong God?'' ³⁶ Hemi ansa se, ''Masta, huia man ia?Talem, blong mi save biliv long hem?'' ³⁷ Nao Jisas i talemaot long hem se, ''Yu bin luk hem mo hem i stap storian wetem yu naia.'' ³⁸ Man ia i talem se, ''Masta, mi biliv,'' mo hemi wosipim hem. ³⁹ Nao Jisas i talem se, ''Mi bin kam long wol blong mekem jajmen. Blong mekem se olgeta we oli no save lukluk, bae oli save lukluk. Be olgeta we oli save lukluk bae oli kam blaen.'' ⁴⁰ Mo sam farasi we oli stap wetem hem oli harem toktok ya, mo askem hem se, ''mifala tu i blaen?'' ⁴¹ Jisas i ansa long olgeta se, ''Sipos yufala i blaen, bae yufala i no kilti from sin blong ufala, be naia yufala i talem se, mifala i save lukluk. Naia, sin blong yufala i stap iet.''