¹ ''I tru, we i tru, mi talem long yufala, man we i no pas tru long geit blong kam insaed long yad blong sipsip, be i klaem long narafala rod, man ia hemi wan stil man. ² Be man we i pas tru long geit hem i seped blong ol sipsip. ³ Hem ia nao wajman i openem geit from hem . Ol sipsip oli harem save vois blong seped, taem i singaotem nem blong ol sipsip blong hem mo hemi lidim olgeta blong oli go aot. ⁴ Taem hem i wokbaot wetem ol sipsip blong hem, hem i go festaem long olgeta, mo ol sipsip oli folem hem, from se oli harem save vois blong hem. ⁵ Bae oli no folem narafala man be bae oli ronwe long hem, from we oli no harem save vois blong nara man.'' ⁶ Jisas i talemmaot parabol long olgeta, be oli no andastanem ol samting ia we hem i stap talem long olgeta. ⁷ Nao Jisas i talem long olgeta bakegen, ''I tru we i tru,mi talem long yufala,Mi nao mi geit blong ol sipsip. ⁸ Evriwan we oli bin kam fastaem long mi olgeta oli ol stil man, be ol sipsip oli no bin lesin long olgeta. ⁹ Mi nao mi geit. Spos eni man i kam insaed tru long mi, bambae hem i seif; bae hem i save go aot faenem ples blong kakae, mo kambak. ¹⁰ Stil man i kam nomo blong kilim ded, stil, mo spolem ol sipsip. Mi mi kam blong oli save gat laef, mo blong oli save gat laef we i fulap bitim mak. ¹¹ Mi mi gudfala seped. Gudfala seped i givim laef blong hem from ol sipsip. ¹² Be man we i wok man nomo hem i no seped mo ol sipsip oli no blong hem. Taem hem i luk wan wulf i stap kam, man ia i lego ol sipsip mo i ronwe, mo wulf ia i kasem ol sipsip mo i mekem oli seraot. ¹³ Wok man i ron we from hem i wok from salari nomo, hem i no rili kea long ol sipsip. ¹⁴ Mi mi gudfala seped, mo mi save ol sipsip blong mi, mo olgeta tu oli save mi. ¹⁵ Olsem we Papa God i save mi, mo mi mi save Papa God, mo mi givim laef blong mi from ol sipsip. ¹⁶ Be mi gat sam narafala sipsip we oli no blong yad ia. Mi mas go karem olgeta tu oli kam, mo bae oli harem save vois blong mi, mo bae i gat wan yad nomo blong ol sipsip mo wan seped. ¹⁷ Hemia hemi from wanem Papa i lavem mi: from we mi givim laef blong mi, blong mi save tekem bakegen. ¹⁸ I no gat wan man i tekemaot long mi, be mi wan nomo mi givim. Mi gat paoa blong lego mo blong tekem bakegen. Mi bin karem komanmen ia long Papa blong mi.'' ¹⁹ Naia i gat wan disput long ol Jiu bakegen from ol toktok ia. ²⁰ Fulap long olgeta oli talem se, ''Hem i gat devel mo Hem i hafmat. From wanem yufala i stap lisen long hem?'' ²¹ Sam man oli talem se, ''Hem ia i no toktok blong wan man we i gat devel. Yu ting se wan devel i save openem ae blong wan blaen man? ²² Naoia long Jerusalem i taem blong lafet blong wasem yu wan yu kam klin. Mo i taem blong ren mo kolkol, ²³ mo Jisas i stap wokbaot long tempol long vranda blong Solomon. ²⁴ Nao ol Jiu oli kam raonem hem mo oli talem long hem se, ''Bae yu mekem mifala i konfius kasem wetaem? Sipos yu Kraes, talemaot stret long mifala.'' ²⁵ Jisas i ansarem olgeta se, ''Mi talem long yufala finis, be yufala i no bilivim. Ol wok we mi stap mekem long nem blong Papa blong mi, oli givim witnes blong mi. ²⁶ Bakegen yufala i no bilivim, from we yufala i no ol sipsip blong mi. ²⁷ Ol sipsip blong mi oli harem save vois blong mi, mo oli folem mi. ²⁸ Mi givim laef we i no save finis long olgeta. Bae oli neva lus, mo tu i no gat wan man we bae i karemaot olgeta long han blong mi. ²⁹ Papa blong mi, we i givim olgeta long mi, i gat paoa bitim olgeta samting, mo i nogat wan man we i save karemaot olgeta long han blong Papa blong mi. ³⁰ Mi mo Papa blong mi, mitufala i wan nomo.'' ³¹ Nao ol Jiu oli pikimap ol ston bakegen blong stonem ded hem. ³² Jisas i ansarem olgeta, ''Long foret blong yufala, mi bin soemaot fulap gudfala wok finis we oli kamaot long Papa blong mi. Wanem wok nao yufala i redi blong stonem mi from?'' ³³ Ol Jiu oli ansarem hem se, ''I no from wan gudfala wok, mifala i redi blong stonem yu, be from yu spolem nem blong God. From we yu wan man nomo, be yu stap talem se yu yu God.'' ³⁴ Jisas i ansarem olgeta se, ''Be oli no bin raetem long loa blong yufala 'Mi talem se, ''Yufala i olsem ol god''? ³⁵ From we hem i bin singaotem god long olgeta we Tok blong God i bin kam,(mo skripja i no save lus), ³⁶ From wanem nao yufala i tokbaot mi se 'Yu spolem nem blong God' from we mi talem se 'Mi mi Pikinini blong God'? Be God i bin mekem Mi Holi mo i sendem Mi mi kam long wol. ³⁷ Spos i tru se mi no stap mekem ol wok blong Papa blong mi ,yufala i no sud bilivim mi. ³⁸ Be spos mi mekem, nomata spos yufala i no bilivim mi, bae yufala i sud bilivim ol wok ia nomo. Blong yufala i save andastanem mo bilivim se Papa God i stap long mi, mo mi stap long hem.'' ³⁹ Nao wan mo taem, oli traem blong holem taet Jisas. Be hem i lus long olgeta. ⁴⁰ Hem i go narasaed long Jodan Riva bakegen, long ples we Jon i bin baptaesem hem long hem, nao Hem i stap long ples ia. ⁴¹ Nao fulap man oli kam long hem mo oli stap talem se, ''Jon i no bin mekem merikol, be evri samting we Jon i bin talem abaot man ia i tru.'' ⁴² Plante man oli bilivim hem long ples ia.