¹ Afta long samting ia, Jisas i krosem leik blong Galili, we oli singaotem se Taebirias. ² Wan bigfala grup blong ol man oli stap folem hem from we olgeta oli luk ol samting we Jisas i mekem long ol man we oli sik. ³ Jisas i go antap long hill mo i sidaon wetem ol disaepol blong hem. ⁴ (Mo i stap kam klosap long taem blong Pasova, we hemi lafet blong ol man Jiu.) ⁵ Taem Jisas i lukluk i go antap i luk bigfala grup blong olman oli stap kam long hem, hem i talem long Filip se, ''Weaples nao bae yumi save pem bred long hem blong oli kakai?'' ⁶ (Be Jisas i talem samting ia blong i testem Filip, from hem wan i save finis wanem blong hem i mekem.) ⁷ Filip i ansarem hem se, ''tu handred denari i no save pem inaf bred blong evriwan i save tekem smolsmol.'' ⁸ Wan long ol disaepol, Andrew, we hemi brata blong Saemon Pita, i talem long Jisas se, ⁹ "I gat wan boe long ples ia we hemi gat faef bred mo tu fis, be olsem wanem from i gat fulap man tumas?'' ¹⁰ Jisas i talem se, ''Talem long ol man ia oli sitdaon. ''From i gat fulap kras long ples ia. Nao ol man oli sitdaon, mo namba blong ol man nomo i kasem faef taosen. ¹¹ Nao Jisas i tekem bred ia mo hem i prea blong talem tankyu, hem i serem long ol disaepol mo ol disaepol oli serem long ol man we oli stap sitdaon. Oli mekem i semak olsem long ol fis, evriwan oli tekem olsem we oli wantem. ¹² Taem we ol man oli fulap gud, hem i talem long ol disaepol blong hem se, ''Karem ol haf kakai we i stap iet, blong mekem se i no gat eni samting i lus.'' ¹³ Afta we oli kakai finis oli hipimap wanples ol haf blong faef grein bred ia we i stap iet, mo oli fulumap twelf basket. ¹⁴ Taem, we ol man oli luk wanem we Jisas i mekem, olgeta oli talem se, ''I tru hemia nao Profet we i sud kam long wol ia.'' ¹⁵ Taem Jisas i save se bae oli wantem kam fosem hem blong kam wan king, hem i aot hem wan bakegen, i go long wan hil. ¹⁶ Taem ples i stap tudak, ol disaepol blong Jisas oli go daon long solwota. ¹⁷ Olgeta oli ko insaed long wan bot, mo oli stap go krosem solwota blong Capernaum. Naia ples i stap tudak, mo Jisas ino kam long olgeta iet. ¹⁸ Wan strong win i stap flu, mo solwota tu i stap raf. ¹⁹ Taem we olgeta oli stap padel samples long twenti faef o teti kilometa olsem, olgeta oli luk Jisas i wokbaot long solwota mo i stap kam klosap long bot we olgeta oli stap long hem, mo olgeta oli fraet tumas. ²⁰ Be Jisas i talem long olgeta se, ''Hemia hemi Mi nomo! Yufala i no fraet.'' ²¹ Nao oli glad mo oli tekem Jisas i kam long bot, mo semtaem nomo bot i kam soh long ples we oli stap go from. ²² Long neks dei, ol man we oli stanap narasaed long solwota oli luk se i nogat narafala bot be hem ia nomo we ol disaepol blong Jisas oli stap long hem, mo oli bin luk se Jisas ino folem ol disaepol blong hem long bot ia. Olgeta nomo oli bin go. ²³ Be sam narafala bot blong Tiberias oli kam klosap long ples ia we Masta i bin talem tankyu mo oli bin kakai bred long hem. ²⁴ Taem ol man ia oli luk we Jisas mo ol disaepol blong hem oli nomo stap long ples ya, oli jam long bot mo oli go long Capernaum blong lukaotem Jisas. ²⁵ Afta we oli faenem hem narasaed long solwota, oli talem long hem se, ''Tija, yu bin kam long ples ia wea taem?'' ²⁶ Jisas i talem long olgeta se, ''I tru, we i tru, mi talem long yufala. Yufala i stap lukaotem mi, i no from yufala i luk ol merikel, be from we yufala ibin kakai bred ia, mo yufala i fulap gud. ²⁷ Yufala i no sud wok from ol kakai we bae i roten, be from kakai we bae i save stap oltaem go kasem laef we i no save finis, we Pikinini blong God bae i givim long yufala. From Papa God i bin makem man ia.'' ²⁸ Nao olgeta oli talem long Jisas se, ''Wanem nao bae mifala i mekem, blong mekem se bae mifala i save mekem wok blong God?'' ²⁹ Jisas i talem long olgeta se, ''Hemia nao wok blong God se yufala i mas biliv long man we hem i bin sendem.'' ³⁰ Nao olgeta oli talem long hem se, ''Wanem saen nao bae yu mekem, blong mekem se bae mifala i luk mo bae mifala i save bilivim yu? Wanem nao bae yu mekem? ³¹ Ol bubu blong yumi oli bin kakai mana long draeples olsem we i stap long skripja se, 'Hem i givim bred we i kamaot long Heven blong olgeta blong oli kakai.'' ³² Nao Jisas i talem long olgeta se, ''I tru, we i tru, mi talem long yufala. Moses i no bin givim bred blong Heven long yufala, be Papa blong mi stap givim tru bred blong Heven long yufala. ³³ Man we i kamdaon long Heven mo i givim laef long wol, hem i bred blong God.'' ³⁴ Nao olgeta oli talem long hem se, ''Masta, givim bred ia long mifala oltaem.'' ³⁵ Jisas i talem long olgeta se, ''Mi nao mi bred blong laef; man we bae i kam long mi bae i no save hangre, mo man we i biliv long mi bae nefa testi. ³⁶ Be mi talem long yufala finis se, yufala i bin luk mi, be yufala i no biliv. ³⁷ Olgeta man we Papa God i givim long mi, bae oli kam long mi, mo eni man we i kam long mi, bae mi neva sakemaot hem. ³⁸ From mi mi kam daon long Heven, i no blong mekem ol tingting blong mi, be hemi wantem blong man we i sendem mi mi kam daon. ³⁹ Hemia hemi wantem blong man ia weh i sendem mi, blong bae mi no lusum wan long ol samting we hem i givim long mi, be bae i mekem olgeta oli kirap bakegen long las dei. ⁴⁰ From hem ia hemi wantem blong Papa blong mi, blong evriwan we oli luk pikinini blong God mo biliv long hem bae oli save gat laef ia we ino save finis sam taem mo bae mi mekem olgeta i kirap bakegen long las dei.'' ⁴¹ Nao ol Jiu oli stap tok nogud long Jisas from hem i talem se, ''Mi nao mi bred we i kam daon long Heven.'' ⁴² Olgeta oli talem se, ''Hem ia hemi no Jisas pikinini blong Josef, we papa mo mama blong hem we yumi save long tufala? From wanem nao hem i talem se hem i bin kam daon long Heven?'' ⁴³ Jisas i talem long olgeta se, ''Yufala i no komplen long yufala wanwan. ⁴⁴ I nogat wan man i save kam long mi spos we Papa God we i sendem mi i kam long hem,mo bae mi nao baebae mi mekem hem i girap bakegen long las dei. ⁴⁵ Oli raetem long buk blong ol profet se, 'Bae God i tijim olgeta evriwan.' Nao evriwan we oli harem Papa God mo we hem i tijim olgeta, oli stap kam long mi. ⁴⁶ I nogat eni man i bin luk Papa God, be man we hemi stap wetem God-hem nao i luk Papa God. ⁴⁷ I tru, we i tru, man we i biliv long mi bae hem i gat laef we i no save finis samtaem. ⁴⁸ Mi nao mi bred blong laef. ⁴⁹ Ol bubu blong yufala oli kakai mana long drae ples mo oli ded finis. ⁵⁰ Hem ia hemi bred we i kam daon long Heven, blong mekem se man we bae i kakai bred ia bae hem i no save ded. ⁵¹ Mi nao mi bred blong laef we i kam daon long Heven. Spos eni man bae i kakai sam long bred ia, bae hem i laef foreva. Bred ia we bae mi givim, hemi bodi blong mi we bae mi givim, blong wol i save laef.'' ⁵² Nao ol Jiu oli stap rao long olgeta mo oli stap talem long olgeta se, ''Olsem wanem nao bae man ia bae i givim bodi blong hem blong yumi kakai?'' ⁵³ Nao Jisas i talem long olgeta se, ''I tru we i tru, mi talem long yufala. Spos yufala i no kakai bodi blong Pikinini blong Man mo dring blad blong hem, bae yufala i no save gat laef insaed long yufala. ⁵⁴ Eni man we i kakai bodi blong mi mo i dring blad blong mi, hem i gat laef we i no save finis, mo bae mi mekem hem i girap bakegen long las dei. ⁵⁵ Nao bodi blong mi hemi tru kakai, mo blad blong mi hemi tru dring. ⁵⁶ Man we i kakai bodi blong mi mo i dring blad blong mi hem i stap insaed long mi mo mi stap insaed long hem. ⁵⁷ Olsem we Papa i laef i stap we i bin sendem mi, mo from we mi laef tru long Papa God, i semak, man we i kakai bodi blong mi, bae hem i save laef tru long mi. ⁵⁸ Hemia hemi bred we ikam daon long heven, i no olsem we ol bubu blong yufala oli bin kakai mana mo oli ded finis. Be man we i kakai bred ia bae i laef foreva.'' ⁵⁹ Be Jisas i talem ol samting ia long haos blong God long taem we hemi stap tij long Capernaum. ⁶⁰ Nao fulap long ol disaepol blong hem oli harem samting ia oli talem se, ''Hemia hemi wan had toktok ia; huia i save kasem? ⁶¹ Taem Jisas i save se ol disaepol blong hem oli komplen long samting ia, hem i askem olgeta se, ''Yufala i kros from toktok ia? ⁶² Be olsem wanem nao spos yufala i luk Pikinini blong Man i go antap long ples we hem i bin stap bifo? ⁶³ Spirit i stap mekem man i laef. Be bodi i blong nating nomo. Ol tok we mi stap talem long yufala, oli spirit mo i laef. ⁶⁴ Be i gat sam long yufala we oli no biliv. ''From long stat ,Jisas i save finis olgeta we oli no biliv, mo man we bae i salemaot hem. ⁶⁵ Mo hem i talem se, from hemia mi bin talem long yufala se, spos Papa blong mi i no givim raet long wan man, hem i no save kam long mi.'' ⁶⁶ From samting ya, fulap long ol disaepol blong hem oli go wan wan mo oli nomo wok baot wetem hem. ⁶⁷ Nao Jisas i talem long olgeta twelf ya se, ''Yufala tu i no wantem ronwe, i tru?'' ⁶⁸ Saemon Pita i ansarem hem se, ''Masta, long hu nao bae mifala i folem?Yufala i gat toktok blong laef ya we ino save finis, ⁶⁹ mo mifala i biliv mo kam blong save se yu yu Holi Wan blong God.'' ⁷⁰ Jisas i talem long olgeta se, ''I no mi ia mi jusum aot yufala, ol twelf, mo wan long yufala hemi devel?'' ⁷¹ Naia hem i toktok long Judas pikinini blong Saemon Iscariot, from hemi hem, wan long ol twelf ia, we bae hem i salemaot Jisas.