¹ afta long ol toktok blong Jisas hemi leftemap aes blong hem i lukluk i go long heven, mo i prea se, "Papa i taem nao, glorifaem Son blong yu, blong mekem se Son blong yu bae i save glorifaem yu. ² Olsem we yu bin givim paoa long hem ova long evri samting we i laef, blong mekem hem i save givim laef we i no save finis long evriwan we yu bin givim long hem. ³ Hem ia nao laef we i no save finis: Se oli save yu we yu wan nomo yu tru God, mo Jisas Kraes we yu bin sendem hem. ⁴ Mi bin glorifaem yu long wol. Mo mi finisim wok we yu bin givim long mi blong mekem. ⁵ Papa, naia yu glorifaem mi i go wetem yu, glori tru long yu wan, wetem glori we mi bin gat wetem yu bifo we wol i stat. ⁶ Mi soemaot nem blong yu long ol man we yu bin givim long mi aot long wol ia. Olgeta ia oli bin blong yu fastaem, be yu bin givim olgeta long mi. Mo oli bin holem tait tok blong yu. ⁷ Naia, oli save se olgeta samting we yu bin givim long mi, oli kamaot long yu, ⁸ From ol toktok we yu bin givim long mi, mi givim long olgeta. Oli save-gud se mi kam aot long yu, mo oli biliv se yu bin sendem mi. ⁹ Mi stap prei from olgeta. Mi no stap prei from wol be mi stap prei from olgeta we yu bin givim long mi, from we olgeta nao oli blong yu. ¹⁰ Olgeta samting we i blong mi, oli blong yu, mo olgeta samting we i blong yu oli blong mi; mo mi kasem glori tru long olgeta. ¹¹ Naia, bae mi nomo stap long wol, be olgeta man oli stap long wol iet. Mo mi stap kam long yu. Holi Papa, tru long nem blong yu, yu holem taet olgeta we yu bin givim long mi, blong oli save kam wan olsem yumi tu. ¹² Taem mi stap wetem olgeta long wol, mi bin lukaot long olgeta tru long nem blong yu. Mi bin lukout long olgeta we yu bin givim long mi. Naia i nogat wan long olgeta i lus be Pikinini Blong Hel, hem nomo. (Blong skripja I save kamtru. ¹³ Mo naoia mi stap kam long yu, mo long wol, mi talem ol samting ia, blong joy blong mi i save fulap insaed long olgeta. ¹⁴ Mi bin givim tok blong yu long olgeta, mo wol ia i bin no wantem olgeta, from we oli no blong wol olsem we mi mi no blong wol. ¹⁵ Mi no stap askem blong yu tekemaot olgeta long wol, be blong yu blokem gud olgeta long devel. ¹⁶ Oli no blong wol olsem we Mi mi no blong wol. ¹⁷ Mekem olgeta oli gat trut we i blong yu. Tok blong yu i gat trut. ¹⁸ Olsem we yu bin sendem mi mi kam long wol, long sem fasin mi mi sendem olgeta blong oli go long wol. ¹⁹ Mi bin mekem mi wan mi holi from olgeta, blong mi save makem olgeta oli holi tru long trut. ²⁰ Nao mi no stap prei from olgeta ia nomo, be from olgeta tu we bae oli biliv long mi tru long toktok blong olgeta. ²¹ Blong mekem se oli save kam wan olsem we yu, Papa, yu stap insaed long mi, mo mi stap insaed long yu. Blong mekem se olgeta tu oli save kam wan long yumi tu, blong bae wol i save biliv se yu bin sendem mi. ²² Mo glori we yu givim long mi, mi bin givim long olgeta, blong oli save kam wan olsem we yumitu wan nomo. ²³ Mi stap insaed long olgeta, mo yu stap insaed long mi-blong oli save kam wan nomo we i stret gud, mo blong wol bae oli save se yu bin sendem mi mo yu lavem olgeta olsem yu lavem mi. ²⁴ Papa, mi wantem se ol man we yu bin givim long mi bae oli stap wetem mi long ples we mi mi stap, mo blong oli save luk glori blong mi we yu bin givim long mi, from we yu lavem mi finis bifo long faondesen blong wol. ²⁵ Papa, yu we fasin blong yu i stret olgeta, wol oli no save yu, be mi mi save yu, mo olgeta ya oli save se yu bin sendem mi. ²⁶ Mi bin mekem olgeta oli save long nem blong yu, mo bae mi mekem save iet blong mekem se olsem we yu stap lavem mi, lav ya bae i save stap long olgeta, mo bae mi stap insaed long olgeta.