¹ "Ol samting ia we mi stap talem long yufala, i blong mekem se yufala i no ron we. ² Bae oli autem yufala long sinagog, mo long aoa we i stap kam, man we i kilim ded yufala, bae hem i ting se hem i stap mekem wok blong God. ³ Mo bae oli mekem ol samting ia long yufala from we oli no save Papa God mo mi. ⁴ Be mi mi bin talem ol samting ia long yufala, blong mekem se long ol aoa we bae i kam, bae yufala i save ting baot we mi bin talem abautem olgeta long yufala. Bifo, mi no bin talem ol samting ia long yufala from we mi bin stap wetem yufala. ⁵ Be naia mi go long hem we i bin sendem mi, mo i nogat wan long yufala i askem mi se,'Yu stap go wea?' ⁶ Be from we mi bin talem ol samting ia long yufala, i mekem se hat blong yufala i fulap long sori. ⁷ Be naia mi talem trut long yufala, i gud long yufala blong mi aot. From sipos mi no aot, Helpa bae i no kam long yufala. Be sipos mi mi aot, bae mi sendem hem i kam long yufala. ⁸ Mo taem hem i kam, bae hem i poentem-aot ol sin mo stret fasin mo jajmen long wol. ⁹ long saed blong sin from we oli no biliv long mi; ¹⁰ long saed blong stret fasin from we bae mi go long Papa blong mi, mo bae yufala i nomo luk mi. ¹¹ Mo long saed blong jajmen, from we rula blong wol ia bae i pas long jajmen. ¹² Mi gat fulap samting iet blong talem long yufala, be i had tumas blong yufala i kasem naia. ¹³ Be taem Spirit blong Trut, i kam, bae hem i lidim yufala long olgeta trut. From bae hem i no talemaot tingting blong hem wan, be wanem we hem i harem, bae hem i talem. Mo bae hem i soemaot long yufala ol samting we bae oli kamtru. ¹⁴ Bae hem i leftemap nem blong mi, from bae hem i tekem ol samting we i blong mi, mo bae hem i soemaot long yufala. ¹⁵ Olgeta samting we i blong Papa God oli blong mi tu. From hemia, mi talem se bae hem i tekem ol samting we i blong mi, mo bae hem i soemaot long yufala. ¹⁶ I no long taem, bae yufala i nomo luk mi. Mo sot taem bakegen bae yufala i luk mi from mi stap go long Papa God." ¹⁷ Afta, samfala disaepol blong hem oli stori tugeta se,"Olsem wanem hem i stap talem long yumi se, I no long taem, bae yufala i nomo luk mi. Mo smoltaem bakegen bae yufala i luk mi,' mo i talem se, 'From mi Stap go long Papa God'?" ¹⁸ Ale, oli askem se, "Hem i stap talem wanem ya se 'I no long taem'? Yumi no save se hem i stap talem wanem." ¹⁹ Naoia Jisas i save se oli wantem kwestenem hem, mo i askem olgeta se, "Yufala i stap kwestenem yufala we mi bin talem se, 'I no longtaem, bae yufala i nomo luk mi. Mo smol taem bakegen bae yufala i luk mi'? ²⁰ I tru, we i tru, mi talem long yufala. Bae yufala i krae mo singaot, be wol bae oli glad. Mo bae yufala i sori, be sori blong yufala bae i kam joy. ²¹ Taem wan woman i stap bonem bebi, hem i harem nogud from taem blong hem i kam, be taem hem i bonem bebi finis, hem i nomo tingbaot hadtaem ia, from hem i glad we wan man i bon long wol. ²² Naoia yufala i sori, be bae mi luk yufala bakeken, mo bae hat blong yufala i glad, mo i nogat wan man i save tekemaot joy blong yufala. ²³ Long taem ia nao, bae yufala i no askem wan samting long mi. Be i tru, we i tru, mi talem long yufala, eni samting we yufala i askem long Papa God tru long nem blong mi, bae hem i givim long yufala. ²⁴ Kasem naia, yufala i no bin askem wan samting tru long nem blong mi.Taem yufala i askem mo bae yufala i kasem, blong mekem se joy blong yufala i fulap. ²⁵ "Mi bin toktok parabol long yufala. Be long taem we i stap kam bae mi nomo toktok parabol long yufala, be bae mi talem i mo klia long yufala blong save gud Papa God. ²⁶ Long dai ia, bae yufala i askem ol samting tru long nem blong mi mo Mi no talem long yufala se mi mas go askem long Papa God long bihaf blong yufala. ²⁷ Papa God i stap lavem yufala,from we yufala i lavem mi, mo from we yufala i biliv se mi mi kamaot long God. ²⁸ Mi bin kamaot long Papa God, mo mi bin kam long wol. Bakeken, bae mi aot long wol, mo bae mi gobak long Papa God." ²⁹ Ol disaepol blong hem oli talem long hem se," Be naia yu stap talem klia finis, yu no stap toktok long parabol. ³⁰ Mifala i sua finis se yu yu save olgeta samting, mo yu no nidim blong eni man i askem kwesten long yu. From samting ia nao, mifala i biliv se yu kamaot long God." ³¹ Jisas i askem long olgeta se, "Naia yufala i biliv? ³² Yu luk, aoa ia i stap kam, yes, hemi stap kam nao, bae yufala i seseraot, mo ko stap long wanwan haus blong yufala. Mo bae yufala i lego mi, mi stap mi wan. Be iet bae mi no stap mi wan nomo from Papa God i stap wetem mi. ³³ Mi bin talem ol samting ia long yufala blong mekem yufala i save gat pis tru long mi. Long wol, bae yufala i gat had taem, be yufala i mas glad. Mi bin winim wol ia finis."