¹ ''Mi nao mi tru stamba blong grep, mo Papa blong mi hem i man blong lukaot long garen. ² Evri branj blong grep we oli stap long mi be oli no karem frut, bae hem i katem aot. Be evri branj we oli karem frut, hem i klinim blong oli save karem mo frut. ³ Naia yufala i klin tru long tok we mi bin talem long yufala. ⁴ Yufala i mas stap insaed long mi mo bae mi mi stap insaed long yufala. Olsem wan branj spos i no joen long stamba, bae hem i no save karem frut. I semak, spos yufala i no joen long mi, bae yufala i no save karem frut. ⁵ Mi mi stampa,mo yufala i ol branjes. Man we i stap insaed long mi, mo mi mi stap insaed long hem, bae hem i karem plante frut from spos i no mi, bae yufala i no save mekem wan samting. ⁶ Spos wan man i no joen gud long mi, God bae i sakemaot hem olsem we oli sakemaot wan branj blong tri mo i stap redi blong drae, mo bae oli putum ol branj ia wan ples mo bae oli sakem i go long faea, mo bae faea bae i bonem olgeta evri wan. ⁷ Spos yufala i stap long mi, mo spos ol tok blong mi i stap long yufala, yufala i save askem wanem we yufala i wantem, mo bae wanem we yufala i wantem bae mi mekem blong yufala. ⁸ Papa blong mi i kasem glori tru long ol samting ia, from yufala i karem frut mo save prufum se yufala i ol disepol blong mi. ⁹ I olsem we Papa blong mi i lavem mi, mo Mi tu mi lavem yufala. Yufala i mas stap long lav blong mi oltaem. ¹⁰ Spos yufala i kipim ol komanmen blong mi, bae yufala i stap long lav blong mi, olsem we mi mi kipim ol komanmen blong Papa blong mi mo mi stap long lav blong Hem. ¹¹ Mi bin talem ol samting ia long yufala, blong joy blong mi i save stap long yufala, mo joy blong yufala i save fulap. ¹² Hem ia hemi komanmen blong mi se yufala i mas lavem wan wan long yufala olsem we mi bin lavem yufala. ¹³ I nogat lav we i mo big wan bitim hem ia we man i givim laef blong hem long biaf blong ol fren blong hem. ¹⁴ Spos yufala i mekem wanem we mi talem long yufala, yufala i ol fren blong mi. ¹⁵ Bae mi nomo singaotem yufala se ol wok man, from wan wok man i no save wanem we masta blong hem i stap mekem. Be mi bin singaotem yufala se ol fren, hemia nao mi soemaot finis long yufala olgeta samting we mi bin harem long Papa blong mi. ¹⁶ Yufala i no bin jusum mi, be Mi bin jusum yufala, Mi putum yufala blong yufala i save go mo karem plante frut, blong ol frut ia bae i save stap go go i no save finis. Blong eni samting we yufala i askem long Papa God tru long nem blong mi, bae hem i givim long yufala. ¹⁷ Mi givim konammen ia long yufala se yufala i mas lavem yufala wan wan. ¹⁸ Spos wol ia i no laikem yufala, yufala i mas save se oli no bin laikem mi fastaem bifo we oli no laikem yu. ¹⁹ Spos yufala ol man blong wol ia, wol ia bae i lavem yufala from yufala ol man blong hem. Be from we yufala i no blong wol mo from we mi bin jusum yufala aot long wol, from samting ia nao wol i no laikem yufala. ²⁰ Yufala i mas tingbaot toktok we mi bin talem long yufala se, 'Wokman i no hae bitim masta blong hem.' Spos oli bin spolem mi, bae oli spolem yufala tu. Spos oli bin folem toktok blong mi, bae oli folem toktok blong yufala tu. ²¹ Bae oli mekem olgeta samting ia long yufala from nem blong mi, from we oli no bin save hem we i sendem mi. ²² Spos mi no bin kam mo toktok long olgeta, bae oli no save se oli gat sin, be naia oli no save haedem sin blong olgeta. ²³ Man we i no laikem mi i no laikem Papa blong mi tu. ²⁴ Spos mi no bin mekem olgeta wok we i nogat man i bin mekem long foret blong olgeta, bae oli no save se oli gat sin, be naia oli bin luk mo oli heitem mi mo Papa blong mi. ²⁵ Be i olsem, blong tok ia i save kamtru we loa blong olgeta i talem se, 'Oli no laikem mi from nating nomo.' ²⁶ Taem we bae helpa i kam-we bae mi sendemaot hem long Papa God i kam long yufala, bae hem i givim witnes blong mi. Hem ia nao i Spirit blong trut we i stap kam aot long Papa God. ²⁷ Yufala tu i mas wintes, from se yufala i bin stap wetem mi long stat go go kasem naia.