¹ ''Yufala i no letem hat blong yufala i trabol. Yufala i biliv long God; yufala i mas biliv long mi tu. ² I gat fulap rum long haos blong Papa blong mi. Spos no, bae mi talemaot finis long yufala. Be mi stap go blong mekem redi ol ples blong yufala. ³ Spos mi go blong mekem redi ol ples blong yufala, bae mi kam bak mo karem yufala i kam long mi, blong mekem se long wea ples mi stap, bae yufala tu i stap long hem ⁴ Yufala i save wea ples nao mi mi stap go long hem.'' ⁵ Tomas i talem long Jisas se, ''Masta, mifala i no save wea ples nao yu stap go long hem; hao nao bae mifala i save rod ia?'' ⁶ Jisas i talem long hem se, ''Mi mi rod, mi mi trut, mo mi mi stamba blong laef. nokat man i save go long Papa blong mi, spos i no pass tru long mi. ⁷ Spos yufala i bin save mi, bae yufala i sud save Papa blong mi tu. Stat naia, yufala i save hem mo yufala i bin luk hem.'' ⁸ Filip i talem long Jisas se, ''Masta, soemaot Papa God long mifala, mo bae hemia hemi i naf long mifala.'' ⁹ Jisas i talem long hem se, ''Filip, mi bin stap long taem wetem yu, be yu no save gud mi? Man we i bin luk mi, i bin luk Papa God. From wanem nao yu talem se, 'Soemaot Papa God long mifala'? ¹⁰ Yu no biliv se mi stap insaed long Papa God mo tu Papa God i stap long mi?Ol toktok we mi stap talem long yufala, mi no talem mi wan. Be Papa God we i stap insaed long mi, hem nao i mekem wok blong hem. ¹¹ Yufala i mas bilivim mi se mi mi stap long Papa God mo Papa God i stap insaed long mi. Spos no, yufala i mas bilivim mi from ol wok nomo. ¹² I tru we, i tru, mi talem long yufala, man we i biliv long mi bae hem i mekem ol wok we mi stap mekem, be ol wok blong hem bae oli moa big wan bitim olgeta, from we mi stap go long Papa blong mi. ¹³ Eni samting we yufala i askem tru long nem blong mi, bae mi mekem, blong Papa God i save kasem glori tru long Pikinini blong hem. ¹⁴ Spos yu askem eni samting tru long Papa blong mi, bae mi mekem from yu i blong mi. ¹⁵ Spos yufala i lavem mi, kipim ol komanmen blong mi, ¹⁶ mo bae mi prea mo askem Papa, mo bae hemi givim wan narafala helpa long yufala, we bae hem i save stap wetem yufala oltaem. ¹⁷ Hemi Spirit blong trut. Wol ia i no save risivim hem, from we i no luk hem mo i no save hem. Be yufala i save hem, from hem i stap wetem yufala, mo bae i stap insaed long yufala. ¹⁸ Bae mi no save lego yufala i stap yufala nomo; Bae mi kam bak from yufala. ¹⁹ Bae i no long taem bambae wol ia bae i nomo luk mi, bae yufala i luk mi. From we mi laef, bae yufala i laef tu. ²⁰ Long dei ia bae yufala i save se mi stap insaed long Papa blong mi, mo yufala i stap insaed long mi, mo mi mi stap long yufala. ²¹ Man we i save ol komanmen blong mi mo i stap kipim olgeta hemi man we hem nao i lavem mi, mo man we i lavem mi Papa blong mi bae i lavem hem, mo bae mi lavem hem, mo ba mi soemaot mi wan long hem.'' ²² Judas (i no Judas Iskariot) i talem long Jisas se, Masta, hao nao bae yu save soemaot yu wan long mifala be i no long wol?'' ²³ Jisas i ansarem mo talem long hem se, ''Spos eni man i lavem mi, bae hemi folem tok blong mi. Papa blong mi bae i lavem hem, mo bae mifala i kam long hem mo mekem ples blong stap wetem hem. ²⁴ Man we i no lavem mi hem i no folem ol tok blong mi. Tok we yufala i harem, i no blong mi, be blong Papa God we i sendem mi. ²⁵ Mi talem ol samting ia long yufala naia, taem we mi stap iet wetem yufala. ²⁶ Be, Helpa ia we - hem i Holi Spirit, we Papa God bae i sendem long nem blong mi-bae hemi tijim olgeta samting long yufala,mo bae i mekem yufala i tingbaot evri samting we mi bin talem long yufala. ²⁷ Mi livim Pis i stap wetem yufala, mo mi givim Pis blong mi i kam long yufala. Mi no givim long yufala olsem we wol i stap givim. Yufala i no letem hat blong yufala i trabol. Mo yufala i no fraet. ²⁸ Yufala i bin harem we mi talem long yufala se, 'Mi stap go, be bae mi kambak from yufala,' Spos yufala i lavem mi, bae yufala i glad from we mi talem se, 'Mi go long Papa God.' From Papa blong mi i hae bitim mi. ²⁹ Naia Mi talem long yufala bifo we i hapen, blong mekem se long taem we bae i kamtru, yufala i save biliv long mi. ³⁰ Afta long taem ia, bae mi no stori fulap wetem yufala. From rula blong wol ia i stap kam, be hem i no faenem wan rong akensem mi. ³¹ Be wol ia i save se mi lavem Papa blong mi. Mi stap mekem ol komanmen we Papa God i bin givim long mi, blong mekem se wol i save. Ale, yufala i girap yumi go."