1
Siks dei bifo long pasofa, Jisas i kam long Betani, ples we Lasaros i stap long hem, man we Jisas i bin mekem hem i laef bakegen long ded.
2
Long ples ia, olgeta oli mekem wan kakai blong hem. Mata i stap serem kakai. Be Lasaros i wan long olgeta we i stap sitdaon blong kakai wetem Jisas.
3
Nao Meri i karem haf kilo blong wan senta nad we i sas tumas, mo i kapsaedem long leg blong Jisas. Afta, i waepem leg blong Jisas wetem hea blong hem. Haos blong olgeta i smel bigwan long senta ia nomo.
4
Judas Iskariot, wan long ol disaepol blong Jisas, we hemi wantem salemaot Jisas, i talem se,
5
''From wanem hem i no salem senta ia blong tri-handred denari, blong i save givim mani ia long ol pua man?''
6
Hem i talem olsem, i no from we i kea long ol puaman ,be from hem i wan stil man. Hem ia nao i holem baus blong mani, mo i stap karem ol samting we i stap insaed.
7
Afta, Jisas i talem se, ''Yu no blokem woman ia. Hem i bin holem taet samting ya from dei blong ded blong mi.
8
From ol puaman oli stap wetem yufala oltaem. Be bae mi nomo stap oltaem wetem yufala.''
9
Nao i gat wan bigfala grup blong ol man Jiu oli save se Jisas i stap ia, mo olgeta oli kam, i no blong kam luk Jisas nomo, be blong kam luk Lasaros tu, we Jisas i bin mekem hem i laef bakegen long ded.
10
Be ol jif pris oli tokbaot se hao nao bae oli save kilim ded Lasaros tu;
11
From plante Jiu oli lego olgeta from Jisas, mo oli biliv long Jisas.
12
Long neks dei fulap man we oli kam long lafet blong pasova. Taem oli harem se Jisas i stap kam long Jerusalem,
13
oli karem ol lif blong pam tri mo oli go mitim hem. Mo oli krae se, ''Hosana!Presem King blong Israel we i stap kam long nem blong Masta.''
14
Taem Jisas i faenem wan yang fala dongki, i sitaon long hem, olsem we skripja i talem se,
15
''Gel blong Zion, yu no fraet; Yu luk, king blong yu istap kam, hem i istdaon long wan yang fala dongki.''
16
Ol disaepol blong hem oli no andastanem ol samting ia fastaem; be afta we Jisas i soemaot glori blong hem, oli tingbaot ol skripja we oli tokbaot hem, mo tu ol samting ia we olgeta oli bin mekem long hem.
17
Naia ol man oli testifae se olgeta oli bin stap wetem Jisas taem we hemi bin singaotem Lasaros aot long tum mo i mekem hem i laef bakegen long ded.
18
Mekem se, ol man oli kam mitim hem from we oli harem se hem i bin mekem merikel ia.
19
Naia ol farasi oli stap stori tugeta se, ''Yufala i luksave we yumi no win nating? Yu luk, ful wol i stap folem hem.''
20
Mo i gat sam man Grik long olgeta we oli kam antap blong wosip long lafet.
21
Olgeta ia oli kam luk Filip blong Bethsaida, (wan taon long Galili), mo oli askem long hem se, ''Bigman, mifala i wantem luk Jisas.''
22
Filip i go mo talem long Andru; Andru i go wetem Filip, mo tufala i go talem long Jisas.
23
Jisas i ansarem olgeta se, ''Naoia i taem blong oli leftemap glori blong Pikinini blong Man.
24
I tru we i tru, Mi talem long yufala. Spos wan sid blong wit i no foldaon long graon mo i ded, bae i stap hem wan nomo. Be spos i ded, bae i karem fulap frut.
25
Man we i lavem laef blong hem, bae i lusum. Be man we i no lavem laef blong hem long wol ia, bae hem i kipim i go long laef we i no save finis.
26
Spos eni man i wok blong mi, hem i mas folem mi. Mo weaples mi stap, wok man blong mi tu bae i stap long ples ia. Spos eni man i wok blong mi, Papa blong mi bae i leftemap hem.
27
Naia Soul blong mi i harem nogud. Be bae mi talem wanem? 'Papa, sevem mi from taem ia'? Be hemia stamba samting we mi bin kam long taem ia from.
28
Papa, leftemap glori blong nem blong yu. ''Nao wan vois i kamaot long Heven i talem se, ''Mi leftemap finis, mo bae mi leftemap bakegen.''
29
Nao ol man we oli stap stanap mo harem, oli talem se, ''Tanda ia,'' Sam narawan oli talem se, ''Wan enjel i toktok long hem.''
30
Jisas i ansa se, ''Vois ia i no kam from mi, be from yufala.
31
Naia jajmen i kam long wol. Mo naia bae God i sakemaot rula blong wol ia.
32
Taem we bae oli leftemap mi long wol ia, bae mi pulum olgeta man oli kam long mi.''
33
Hem i talem olsem blong soemaot fasin we bae hem i ded.
34
Ol man oli ansarem hem se, ''Mifala i bin harem long loa se, '' Kraes bae i stap foreva. Olsem wanem nao yu talem se, 'Oli mas leftemap Pikinini blong Man'? Huia nao hemi Pikinini blong Man?''
35
Nao Jisas i talem long olgeta se, ''Smol taem iet, laet i stap wetem yufala. Wokbaot naia taem yufala i gat laet, blong tudak i no save kasem yufala. From man we i wokbaot long tudak, i no save se hem i stap go weaples.
36
Taem yufala i gat laet, yufala i mas biliv long laet ia. Blong yufala i save kam pikinini blong laet. ''Jisas i talem ol samting ya finis, ale, hem i aot, mo i haed long olgeta.
37
Nomata hemi mekem fulap merikol olsem long foret blong olgeta, be iet oli no bilivim hem.
38
Blong mekem toktok blong profet Asaea i save kamtru se, ''Masta, huia i bilivim ripot blong mifala? Mo Hae God i singaot paoa blong hem long huia?''
39
Nao oli no save biliv from we Asaea i bin toktok bakegen se,
40
''Hem i blaenem ae blong olgeta mo i mekem oli gat hat we i strong tumas; blong oli no save luk wetem ae, mo andastanem wetem hat; blong oli no save kam long mi, blong mi no save hilim olgeta.''
41
Asaea i talem ol samting ia mo i tokbaot Jisas, taem i bin luk glori blong hem.
42
Be iet, fulap rula oli biliv long hem, be oli no talemaot from maet ol farasi bae oli aotem olgeta long sinagog.
43
From we oli lavem glori blong man mo long glori we i kam long God.
44
Jisas i singaot se, ''Man we i biliv long mi, hem i no biliv long mi nomo, be hem i biliv long man ia we i sendem mi tu,
45
mo long hem we i luk mi i luk Man ya we i sendem mi.
46
Mi mi kam olsem laet blong wol ia, blong mekem se eni man we i biliv long mi bae i no stap long tudak.
47
Spos eni man i harem vois blong mi be i no kipim olgeta, bae mi no jajem hem; from mi mi no kam blong jajem wol, be blong kam sevem wol.
48
Man we i ronemaot mi, mo i no wantem risivim tok blong mi, i gat wan we i stap jajem hem. Toktok we mi bin talem, bae i jajem hem long las dei.
49
From we mi no bin toktok mi wan nomo, be Papa God we i bin sendem mi, hem i givim wan komanmen long mi, wanem blong talem mo wanem blong tokbaot.
50
Mo mi save se komanmen blong hem i laef we i no save finis. Mekem se, mi talem wanem we Papa blong mi i talem long mi.''