अध्याय – 4
1
तियाहाल ख्रिस्ताय डिलाम दुख सहन केअयो आन तुमाबी तीया मोना होच शस्त्रसामग्री (चाल चलवणुक) पाेवील्या, काहाका जियाय डिलाम सहन केलो हाय तो पापाहिने दुर गेहलाे हाय.
2
तियाहाल एहेडा माअहाय आपु दिलामेन आवणारो आयुष्यामे माअहा वासणा केअता नाहा पेन देवा इच्छा केअता जिवा जोजे.
3
काहाका परराष्ट्रीयाहा मोनाहोचे करुलामे गेहेलो काल पुरा वेयो, ताहा तुमा कामातुरपणाम, वासणाम हारो पिवुलाम, भानगुडीमे, तेहकीज सिनाले, खाराब मुर्तीपुजामे आपु चालीरुडीमेने गिया,
4
एहेड्या बेनी जीवनालीन जिवणारा सुटका मोना आमी तुमा तियाहा आरी रेताहा चालता नाहा इया तियाहाल नाेवाय लागी आवीने ते तुमा निंदा केअते हे.
5
तेबी देव जो जिवतोहा जे मोअलाहा न्याय केरा खातोर तियार हाय तियाल ते आपु हिसाब दिई.
6
काहाका इया केअता मोअलाहानबी हारी गोठ आखाम आल्ली आथी, ताहा जाहा माअहा होच डिला न्याय वेयोहो तबी तिया देवाहोच आत्माम जिवतो वेरा जोजे.
7
पेने बाद्दी गोठीही सेवट जोगे (पाही) आल्लो हाय तियाहाल होमजीनाऱ्या ओन प्रार्थना खातोर तियारीतम ऱ्या.
8
आन बादाहामेने महत्वा गोठ इ हायका आपुमे वादती प्रिती थोवा काहाका प्रितीकी पापा राहा बजाय जाहे.
9
केल्लीज कुरकुर नेय केअता तुमा बाद्दे जाई एकबिहीरा गोवारचाकरी केणारे व्या.
10
तुमा देवा जुद्या जुद्या कृपा हारा कारभारी इया नाताहाकी एका एकाले मिलल्या कृपा दानाहाकी एक बिहिरा सेवा केअजा.
11
जो संदेश आखेहे तियाय आपु देवा वचन गोगे एहेकी गोगा जोजे ने जो सेवा केअहे तियाय आपु सेवा देवाय देदली शक्तीहीकी किरोयाहो एहेकी केरा जोजे, ताहा येशु ख्रिस्ताहोच बाद्या गोठीहोम देवा गौरव केरा जोजे तियाल गौरव ने पराक्रम इ युगानयुग रेअ. आमेन.
येशु ख्रिस्ताखातोर दुख सेहेन केणू हक्को
12
माआ मोयालाहा परिक्षाखातोर तुमा अग्नीपरिक्षा वेरा केअता तुमाहाल काय नोवाय वेअयेा एहेकी होमजीन तिया नोवाय नाहा क्याहा.
13
उलटो तुमा ख्रिस्ता दुखाम भागीदार विई रियेहे तियाहाल आनंद क्या ताहा तिया गौरव प्रगट वेरी ताहाबी खुब मोडा आनंदा हाकी तुमा खुब मोडी खुशी वेरा जोजे.
14
ख्रिस्ता नावा केअता तुमा निंदा वेरी ताहा तुमा धन्य ! काहाका गौरवा आत्मो म्हणजे देवा आत्मो तुमाहापे आविन रेहलो हाय.
15
पेन तुमाहाने केडो खुनी, नेता बाड म्हणुन वाईट केअणारे नेता बिहीरा कामाम गडबड (बिगडवुकाम) केअणारा तियाहाल केडोबी दुख भोगा नाय जोजे.
16
ख्रिस्ती आखीलीन जाहा केडाल दुखा सहन केरा पोडतो वेरीता तियाल लाज नाय आवा जोजे, तिया नावाल देवा गौरव केरा जोजे.
17
काहाका देवा घराणामेने न्यायनिवाडा सुरवात केरुली वेल आमी आल्ली हाय ओन तो जाहा पेअला आपुवेने वेअयो ताहा जे देवा शुभवर्तमान मानता नाहा तियाहा शेवाट काय वेरी ?
18
नितीमान जाहा कष्टाकी ताहा जो भक्तीम नाहा ने पापी इयाले जागो किईही मिली.
19
तियाहाल जे देवा इच्छाप्रमाणे सहन केतेहे तियाही हारो केअता रिईन जो विश्वास उबजावणारो हाय तिया आथाम आपु जिवन होपा जोजे.