अध्याय – 5
1
तुमाम जे केडा वडील हाय तियाहाय मायुय एक हेगात्याहा वडील जे ख्रिस्ता दुखा साक्षी म्हणुन ने तियाहोच आगला प्रगट वेणारो रिता गौरवा एक भागीदार एहेकी आय आखु.
2
तुमामेने देवा टोला पालन केरा, केरा पोडेहे तियाहाल नाहापेन देवाल पोटे एहेडो सोताहा मोनाकी धनालोबा खातोर नाहा पेन हारा मोनाहाकी केरा.
3
आने तोणारा होच वतनाल चालवा जाहा पेन टोलाल नमुनो वाईलीन पालन केरा.
4
आन मोडा मेढपाळ प्रगट वेरी ताहा तुमाहाल गौरव ने नय कोमाणारो मुकूट मिली
5
तेहेकीज जुवाण्याहा तुमा वडीलाहा आरी मिलीन ऱ्या आन तेहेकीज तुमा बादे जाआ एक बिहीरा वेसा केरुलाम नम्रता रुप पोतडो लिइन कोबराम वेटाला, काहाका देव गोरवाम पोरालाहा विरोध केहे पेन लिनाहाल कृपा पेरवेहे.
6
तियाहाल देवा पराक्रमी आथा अेठा नोमीन ऱ्या, इया केताका तियाय तुमहाल योग्य वेले उच्यो केरा जोजे.
7
तुमा आपु बाद्दी चित्ता जियावे टाका काहाका तो तुमा कालजी लेहे.
8
सावद रेजा, जागते रेजा काहाका तुमा दुष्मण सैतान ओबोबलुणारो सिंहाहोच केडाल गिलु ते होदतो फिरेहे.
9
तुमा विश्वासम मोजबुत रिईन तिया विरुध्दाम उबेऱ्या काहाका तुमा जाताहाका जगाम रेणाऱ्या तुमा पावुहू तेहेकीज दुखा लावाी रीयेहे
10
पेन तुमाहाल जियाय ख्रिस्तामे आपु सनातन गौरवाम हादलो हाय तो बांदी कृपा देव तुमा खाराब दिही सहन केया तिया फाचला सोताहा तुमाहाल भरपुरीही की केरी आन पाक्को केरी.
11
तिया पराक्रम युगान युग हाय, आमेन.
12
आय जिया सिलवानाल विश्वासु पावुहू ऐहेकी मानुहू तिया आथाम तुमाहा थोडोहोक लिखीन मोकलुहू हिकवुहू आन साक्ष दिहू का इ देवा खेरी कृपा हाय तियाय तुमा मजबुत ऱ्या.
13
बाबेलामने तुमा आरी निवडुली मंडली तुमाहाल सलाम मोकली रेहेले हाय आन माआ पोयरो मार्क इयालबी मोकला रेहेलो हाय.
14
प्रितीकी खुसालीम का एक बिहिराल सलाम आखा, ख्रिस्तामेने तुमाहाल बाद्दाहान शांती रेअ.