^{1 2} आने तुमा वोराड वेल्या थेअयुहू आपु माट्या ताबाम ऱ्या, काहाका केडो वचनाल माननारे नाय वेरी ताहा तुमाबीनारो नाय ऐहेडो हारो वागनुक विईन तो वचनाल तिईन आपु थेअयी ही वागुलाम ऐकजागे बांदले जाई काहाका तो तुमा चोखो मानपान वागुलो वेरी. ³ तुमा सोबावुलो ई केहे ओखलीन शेड्या पोरुलो होना डागुने पोवुलो आने मोणे पोतडे वापरुलो इया बारेण्यो सोबानेय जोजे, ⁴ पेन मोनाम गुप्त रेणारा माआहा सोबावाम काहाका देवा होवेणे खुबहारो वेरीता सौम्य आने शांत आत्माम किदिहीज नाय पारखाणारो डागुनाहा मे ती रा जोजे. ⁵ काहाका देवावे आशा थोवणाऱ्या खुब जुन्या कालामेने पवित्र थेअयु बी एहेडा प्रकाराकी आपु माट्या ताबाम रिईन सोताहाल पिडायने रेहेल्या होच. ⁶ तियाहोस सारायबी आब्रामाहाल धोनी आखीन तिया आखलया गोठ्या पाल्या, तुमा हारो केअतो वेरी ओन केल्लीबी धाकाल बीते नाहा ताहा तुमा तियु पोयऱ्या वेल्या हाय. ⁷ माट्याहा तुमा आपु थेअयुले खुबे होवालो बासणा होचे आपु ओकलोकी, मानपान देजा आने जिवना कृपाकी जोडीहीकी वारीस होमजीन एक जागे ऱ्या, ताहा तुमा प्रार्थनाम अडचण वेरा नाय जोजे, येशु ख्रिस्ताल तिन रेवूलो माहांन सोबेहे ⁸ शेवट बांदे जाई एकमोन व्या ओन एक मोनाहाकी विईन पावुहू मोया थोवणारा मोयादायालोन प्रेमकेणारा मोना होच व्या. ⁹ ताहा खाराब बोद्दोल खराब आने निंदा बोद्दोल निंदा एहेकी तियाहोच क्या हाना पेन आशिर्वाद देजा काहाका इया केअता तुमाहा हादलो हाय. तियाहाल तुमाहाल आशिर्वाद इ वोतन मिला जोजे. ¹⁰ काहाका जो जीवनाल हारो तीन चालेहे ने हारा दिही वेअरा जोजे एहेकी इच्छा केतो हो तियाय खाराब गोठीमेने आपु जीव कोपटी गोगुलामेन आपु मुय आवरा जोजे. ¹¹ तियाय खाराब सोडीन हारो केरा जोजे शांती होद किईन तिया फासला चाला जोजे. ¹² काहाका परमेश्वरा डाओवा नितीमानपे रेताहा ने तिया कान तिया विनंती होवे रेताहा पेन खाराब गोठ्या केणारापे परमश्वराले रोगकी एहेडी नाजोर वेहे. ¹³ आने तुमा जाहा हाऱ्या गोठ्या लिईन चालणारे वेअयतो ताहा तुमा माेठो केडो केरी का ? ¹⁴ पेन नितीमाना केअता तुमाही सहन केअयो ताहा तुमा धन्य. ! तिया धाकाहाकी तुमा बियाहा नाहा तुमा धासती क्याहा मा. ¹⁵ पेन ख्रिस्ताल प्रभु, आखीन आपु मोनाम पवित्र माना ने मुमा आशा कारण फुसणाराहा एक एका माआहाल सौम्यताहाकी ने मानपानाहाकी उत्तर देवुलाम तुमा सादा तयार रेजा. ¹⁶ आन हारो मोन थोवा, तहा तुमा बोद्दलाम खाराब गोठ्या गोगते वेरी ताहा ख्रिस्ताम तुमा हारो वागणुकी ने खोटो दोषे देणाराहान लाजे वाटा जोजे. ¹⁷ काहाका हारो करुला बोद्दल तुमा सहन केतेहे इ जाहा देवाल हारा लागेहे तहा वाईट केरुला बोद्दल सहन केरा पेक्षा तो खुबूज हारो. ¹⁸ काहाका आपुहूल देवा होवे लावुला ख्रिसताबी पापहाकेता नितीमान अनितीमान लोकहाकेता एकुज दाव मोयो तो डिलाहाकी मोये पेने आत्माम जिवतो केराम आलो. ¹⁹ आन तो तियाहाकी गियो ने तियाय कोडवाला आत्म्याहान आखी देखाव्यो, ²⁰ नोहा दिहाम तारणे तियार केती वोखोत देवा सहन केरुला वाटवेतीवेल पेअला जियाही अपमान केयो ते ऐअ आथे, तिया तारवाम थोडेहे वायज आथे तिही आठ जीव पायामेने वाचाय गिये ²¹ आमीबी तिया रुपाहोच एहेडो बाप्तिस्मा (डीलामोल काडुलो नाह पेन हारा मोनाहाकी देवाल देदलो वचन म्हणुन) येशु ख्रिस्ता फाचे जिवी उठुलो हाकी आपुहून तारी लेहे. ²² तो होरगाम गेहलो नि देवा हुडीवेले हाय आने देवदुत अधिकारी ने सत्ताधिश तिया ताबाम हाय.