¹ तियाहाल तुमा बाद्दे खाराब गोठ्या बादो कपट ढोंग हेवो ने बाद्दो खराब गोगूलो दुर थोवीन. ^{2 3} परमेश्वरा कृपालो हाय एहेकी तुमाही अनुभव लेदलो हाय ताहा तियाहीने तारणाखातोर तुमा वादते जोजे तियाहाल नाेवो जोन्मो लेदल्या हान बालका होच आध्यत्मिक निऱ्या दुधा इच्छा तेरा. ⁴ माअहाय नाय आखलो – नाकारलो पेन देवाय निवडुलो खुब किमती एहेंडो जिवता डोगउा होवे तुमा आवताहा. ⁵ तुमाबी जिवता दोगडाहोच आत्मिक भवन एहेडो रेचलो जाय रेहलो हाय पोटणारा आध्यात्मिक वोली येशु ख्रिस्ताले अपर्ण केरा खातोर एक पवित्र याजकगण एहेडो उबारलो जाय रियोहो. ⁶ तियाहाल शास्त्रलेखामबी एहेकी लाय का, “वेरा, आय ए निवडुला ने खुबमोलवान रेणारो कोनशिला (कोपरादोगडो) सियोनाम थोवतोहो आने जो तियावे विश्वास थोवेहे तो फजीत वेअणारो नाहा.” ⁷ तियाहाल विश्वास थोवणारा तुमाहाल तो खुब किमती हाय पेन जे विश्वास थोवते नाही तियाहान मिस्त्रीही जो दोगडो नाकार केलो आथो तोज कोपरा खेरो दोगडो वेअेलो हाय. ⁸ एहेकी बी शास्त्रलेख हाय “ठेस खाणारा डोगडो ने ठोकोर खाणारो खोडको वेयलो हाय.” ते वचन नाय मानतुले तियाबोद्दल ठोकोर खातले ओन तिया खातोरुज ते नेमाले आथे. ⁹ पेन तुमा ऐके निवड केअलो वंश एके राजकीय याजक गण एके पवित्र राष्ट्र देवा सोताहा लोक ऐहेकी हाय, दया खातोर का तुमाहाल जियाय आंदारामेने आपु नावा उजवाडाम हादले हाय तिया हारा गुण तुमा प्रगट केरा जोजे. ¹⁰ ते तुमा पेअला लोक नाय आथा पेन आमी देवा लोक हाय तुमाहापे दया केली नाय आथी पेन आमी दया केली गेहेली हाय. ¹¹ मा मेरालाहा, तुमा परदेशी ने प्रवासी आथे तियाखातोर आय तुमाहाल विनंती कीहू का आत्म्याआरी लोडाई केराहा शारिरीक वासनाहीने दुर रेजा. ¹² विदेशी लोकाहाम आपु चालुलो वागुलो हारो थोवा काहाका तुमाहाल मानीन ते जाहा तुमा बोद्दल हारे नाहा गोगते तहा तुमा जे हारे कामे तियाहा देशाय तियापेने तिया भेटुलो दिही तियाही देवा गौरव केरा जोज. सरकारी अधिकाऱ्याहा मानीन रेवुलो ¹³ हरेक प्रकारा माआहा व्यवस्थाल प्रभु केअता आज्ञापालनारे रेजा, राजो मोडो हाय तियाहाल तिया आधीन रेजा. ¹⁴ जे अधिकारी हाय तियाहा आज्ञाम रेजो काहाका वाईट केणाराहान शिक्षा केरुलाम ने हारो केराखातोर प्रशांसा केराने ते मोकलुलो हाय. ¹⁵ काहाका देवा इच्छा हाय का तुमा हारो केते रिईन मुर्खने अज्ञान माआहाल ठाके केवो. ¹⁶ तुमा सुददे हाय पेन वाईट गोठीपे फागीलेवुलो सुहा केरा वापोर नेया केअता देवा दास एहेकी जोगा जोजे. ¹⁷ बादाहान मान द्या, पावुहू पावुहूप प्रिती केअजा, देवा बिख तेअजा, राजाल मान द्या, सेवा करुलो अर्थ ¹⁸ कोमेने नोवकराहा तुमा पुरा मोनाहाकी आपु मालका आज्ञाम रेजा, जो हारो आने सहानशील वेरी तियाहालुज नयता पेन मोनाकी कोठीण वेरी तियाहानबी आज्ञाम ऱ्या. ¹⁹ काहाका जो केडो देवा बोद्दल हारो वागुलाम अन्याय सहन किईन दुखे सहन केतेवेरी ताहा ते स्तुत्या हाय. ²⁰ पेन तुमा पाप केतेहे ताहा तुहान देले गियेहे आने तुमा तो सहन केअयो ताहा तियावोचमे केल्लो मोडापण हाय ? पेन हारो किेईन सहन केरा पोडो ताहा तुमाहाय तो सहन केअयो ताहा तेा दवाल पोटणारो हाय. ²¹ काहाका इयाखातोरुज तुमा निवड करुलाम आले हे, काहाका ख्रिस्ताबी तुमा खातोर दुख सहन केअयो आने तुमा तिया पागाप पाग टाकीन पासला पासला जा जोजे काहाका तियाय तुमा खातोर नमुनो थोवलो हाय. ²² तियाय पाप केअलो नाहा ने तिया मुखाम काय कपट देखायो नाहा. ²³ तिया निंदा वेतलो आथे ताहा तियाय फिरीन तियाहान निंदा नाह केअयो आन तो सहन केअयो तियाय धोमकाव्यो नाहा पेन देव जे नितिहीकी न्याय केअहे तिया आथाम तिया सोताहा होपाय गियो. ²⁴ तियाय तुमा आमा पापे सोताहा डिलाप लिईन वधस्तंभापली गियो इया खातोर का आपु पापल माईन नीतीमत्वाम जिवतो रेअ. तियाल बोठला माराहीकी तुमा हारे वेअले हाय. ²⁵ तियाल तुमा मेडाहोस भोटकुते आथे, पेन जो तुमा जिवा मेढपाळ ने राखवाल्यो हाय जिया होवे आमी फाचो आला हा.