¹ येशु ख्रिस्ता प्रेषित पेत्र इयाहीने पंत गालतीया कप्पादुकीया आशिया ने बिथुनिया दया प्रांताम देशाम ऐहेकी फेलाय गेहेले देवा लोकाहान पत्र, ² देवापित्या पुर्वज्ञानाहाकी आत्म्याकी पवित्र कारणाहाकी येशु आज्ञाम राआखातोर तिया रोगोत हिपडीन निवडुले तुमाहाल कृपा ने शांती मिले. आभारप्रदर्शन ³ आपु प्रभु येशु ख्रिस्त इया देव आन बाहाको धन्यवादीत रेअ तियाय आपु मोडी दया की येशु ख्रिस्ताल मोअलामेने उठवीन आपुहून एक जिवती आशाम फाचो जोन्मो देदलो हाय. ⁴ आन तियाहाच मिलणारो अविनाशी ने निर्मल आन नाय कोमाजानारो वाेतन होरगाम तुमा खातोर राखी थोवलो हाय. ⁵ आन शेवठ्याकालाम प्रकट केरा खातोर सिद्ध केलया तारणाखातोर तुमा देवा सामर्थ्याकी विश्वासा खातोर राखले हाय. ख्रिस्तशिष्यांहान तारणप्राप्ती आशा हाय तिया खातोर आभारप्रदर्शन ^{6 7} आने इया खातोर आज्या कालाम जुद्या जुद्या प्रकारा परिक्षाहाकी तुमाहाल थोडो वेल भाग पाडुलाम तुमा दुख सहान केअता आनंदाम रेताहा. काहाका नाशवेणारा होना परिक्षा आगीकी केतेहे तिया होनापेने किंमतीवान हाया तुमा विश्वास परिक्षा येशु ख्रिस्ता आवुलो वेरी तितया समयाल प्रशंसाल, गौरवाल व मान पानाल कारण वेरी ⁸ तुमाही तियाल देखलो नाहा तेबी तुमा तियापे प्रिती केअतोहा आने तियाल वेअलो नाहा तेबी तियापे विश्वास थोवीन तुमा गौरवी आनंदाहाकी खुशीम वेताहा. ⁹ काहाका तुमा विश्वास प्रतिफल मोनजे तुमा आत्म्या तारण तुमा मिलवुताहा. ¹⁰ तुमाहाल प्रगट वेणाऱ्या कृपाबोद्दल जिया संदेष्ट्यांही संदेश आख्यो, ते इया तारणा बोद्दल विचार ने होद केअते आथे. ¹¹ तियाहामेने ख्रिस्ता आत्मो जाहा ख्रिस्ता दुखाबोद्दल जे तिया फाचलाने तिया जिवतो आवुलाम गौरवी गोठीबोद्दल पेअलाज आरवी थोवलो आथो, ताहा तियाय केल्लो का केल्ला प्रकारा काल देखावलो इया ते विचार केतला आथा. ¹² तियाहाल प्रकट वेअलो आथो का, स्वर्गामेने अेठा तोरतीपे मोकलुलो पवित्र आत्म्या मोदतीही की तुमाहाल सुवार्ता आखणाराही आमी ज्या गोठ्या तुमाहाल आख्या, तियावाचमे ते सोताहा नाहा, पेण तुमा सेवा केतले आथे. त्या गोठ्या निरखीन वेरुली इच्छा देवदुताहान हाय. ख्रिस्तशिष्यांहान सोबे ऐहेकी रेवूलो ¹³ तियाहाल तुमा आपु मोना कंबर बांधीन सावद रेजा आने येशु ख्रिस्ताआवुलो वेरी त्या समयाव तुमापे जी कृपा वेअणारी हाय तियापनेज पुरी आशा थोवा. ¹⁴ तुमा आज्ञा पालणारा पोयरे विईन तुमा पेअला आज्ञापेणाम वासनामे सोवताहाल वलण लागवाहा नाहा. ¹⁵ पेन तुमाहाल जियाय हादला हाय तो जेहकी पवित्र हाय तेहेकी तुमा बी आपु बाद्दा वागुलाम-चालुलाम पवित्र व्या. ¹⁶ काहाका एहेकी जो पवित्र शास्त्राम लिखलो हाय का, “तुमा पवित्र रेजा काहाका आय पवित्र हाय.” ¹⁷ आने भेदभाव नाय केअता जो एक एक माआहा कामापेन न्याय केअतोलो तियाल जाहा बाहाको एहेकी आखिन हात केताहा ताहा तुमा प्रवासा कालाम तुमा बिख तिईन वागा जोजे. ¹⁸ काहाका तुमाहाल मालुम हाय का तुमा वाडवडीलाही लागवी देदल्या वायबार वागुलामेने चांदी होना होसच नाशा गोठीहोच तुमा सुटका वेअली नाहा. ¹⁹ निष्कलंक ने दोषनय आथो एहेडो मेडा पाटडाहोच वेअणाऱ्या ख्रिस्ता मोलवान रोगताहाकी तुमा मुक्त वेअेले हाय. ²⁰ खेरो खेर जागा स्थापना पेअला तो पेअलानेज नेमलो आथो पेन इया शेवट्याकालाम तो तुमा खातेार प्रकट वेअयो, ²¹ आने तियापेन तुहाय देवावे विश्वास थोवलो हाय, काहाका देवापे तुमा विश्वास ने तुमा आशा राआ जोजे तियाहा तियाल मोलामेंने उठविन गौरव देदो. ²² तुमा जाहा आत्म्यामेने खेरोज हाय तिया आज्ञापालीन मोनाम कपट नाय रेयो न पावुहू प्रेमाखातोर जीव शुध्द केला हाय, ताहा तुमा खेरामोनाकी एक बिहीरापे मोनाहाकी माेया केरा. ²³ काहाका तुमा नाश वेअले तियापेने नाहा पेने अविनाशी बायापेने तियापेन देवा जिवंता आने टिकणारा वचनापेन तुमा फाचो जन्मो वेअले हाय. ²⁴ काहाका पवित्र शास्त्राम ऐहेकी लिखलो हाय, “बाद्दा माआहा जात कोचरा होच हाय ने तिया बाद्दो वैभव खेड कोचरा फुला होच हाय कोचरा हुकायहाय ने तिया फुल गोलेहे, ²⁵ पेन परमेश्वरा वचन सादाने कादा टिकनारो हाय.” तुमाहाल तिया वचना सुवार्ता तुमाहाल आखाम आल्ली तो तोज हाय.