¹ Tangwa dyakhedi kukulumuka Yesu mu mundonda, athu lawu amulabidi. ² Mukhashi mumoshi wakhedi ni bwashi wejidi kudi mweni. Wa fumukama, wakula: Fumu, yivwa wa zola walunga ku nguwuka. ³ Yesu wa tanduludidi khokhu, wa mukwata, he wakula: Nya kumbula, Kola. Kaka mu tangwa mwenedina, bwashi dya kukumuka. ⁴ Yesu wa mulejidi etshi: wuleza oku muthu. Ndanga kudilombulula ayimweni kudi nganga Nzambi, wuhani makabu ma nulongidi Moshi, yikhadi boshu kithemu kudi eni. ⁵ Tangwa Yesu akhedi kwingila ku Kapernahum. Fumu mumoshi wa asuta wejidi ku mwakusa. ⁶ Wa mu bondila etsi Fumu, muthu wemi wa kisalu wudi munzu walangala, bukabuka dya mu bwisa wenda wa mona pashi jingi. ⁷ Yesu wa muleza etsi: nyamba kwenda kumuwuka. ⁸ Kashi fumu wa asuta wakudidi: Fumu ami nishiku nyalunga mu ku kwingisa munzu yamemi. Akula kaka ndaka yimoshi muthu wemi wa kisalu wu kukola. ⁹ Kikuma ami ephi nidi muthu wudi ni kiyeka, nidi ni asuta enda kungu lemvukila. Ami nituma mumoshi ndanga, waya; nileza mwekha, yiza, weza. Kikuma kya muthu wemi wa kisalu, wuhanga kyenekina makuhangama. ¹⁰ Tangwa Yesu kyamwiva yimeni, mweni wayituka. He waleza athu akhedi kumulaba etsi, kyedika nya nuleza ami kanduku kadi ni monanga mu katshi ka Yiseledi muthu wudi ni lukwikilu lwa kyeneki. ¹¹ Nya nuleza ni kyedika kyoshu, Athu lawu akakatukila kwenda kuwudikila tangwa, ekha kwenda kujokila tangwa, akengila mu kifumu kya kuhulu, akhadya mesa ma moshi ni Abalahami, ni Yizaki, ni Yakobi. ¹² Kashi ana akifumu kya kuhulu akawakonga anji hedi phiphwa, akabula kudila ni kudisuma mazewu. ¹³ Yesu waleza he fumu wa asuta, ndanga wendi, leka mambu mahangami mudi kidi lukwikilu lweyi. Muthu wenji wa kisalu wakodidi kaka tangwa mwenedina. ¹⁴ Tangwa dyatudidi Yesu kunzu ya Pilatu, wawanini mahenda ma Petulu wakhedi walangala ni kuyela. ¹⁵ Yesu wa mukwatidi mu khoku, kuyela kwahwa, wazangulukidi, wayanjika kumuhangila. ¹⁶ Mu kingweji, anehinini Yesu athu lawu akhedi azala ni phevi jabola. Mweni wawukidi akhashi oshu akhedi kumunehina. Yesu wanganinini; wakayidi ehphi phevi mwenejina jabola, ¹⁷ mu kulungisa mambu makudidi mbikudi Yesayac: mweni wanonini pashi jetu, ni kutuwuka mu makhasi metu. ¹⁸ Yesu, kyamweni hunji dyathu dya mujeta, wakudidi: tu zawukenu mu sambwa edina. ¹⁹ Longi mumoshi wa tsiku wakokulukidi wamuleza: Longi, Nyaka kulaba kosu kuwakenda. ²⁰ Yesu wa muvutudila: Miyewa myenda kujinga mu mabuku, tujila tudi ni mazamba, kashi mwana wa muthu keshiku ni homa ha kuzeza mutwa wenji ²¹ Mulabi mwenji mwekha wakudidi: Fumu, nguhu thethi ndjila nyendi kujika tata yamemi. ²² Kashi Yesu wamulejidi: Ngulabi ami, leka amvumbi adijiki owumweni." ²³ Yesu wengididi mu watu, alonguki jenji amulabidi. ²⁴ Mu mbala yimoshi kipupulu kyangolu kya nikisa jiya, he meya mayanjika kwingila mu watu ni lunjinji lwingi. Yesu wakhjedi walangala. ²⁵ Alabi akokulukidi kwakhedi Yesu, amutokimisa, akula: Fumu Tuhulushi, ngololo tukufwa! ²⁶ Yesu wa wavutididi: Kikuma kyakhi nudi kwivwanga woma, lukwikilu lwenenu lubibi? Tangwedi he, mweni wazangulukidi, wanganina kipupulu, meya madibata. ²⁷ Athu oshu ayitukidi, ayanjika kwakula: Kya phila ya muthu edi, ni kipupulu kyenda kya lemvuka kudi mweni? ²⁸ Tangwa dyatudidi Yesu mu sambwa dya jiya, mu thothu ya Jenezaleti, athu mbadi akhedi ni phevi jabola, awukidi mu majamu, ejidi kudi mweni. Eni akhedi khabu jingi, athu kahitilanga oku munjila mweneyina. ²⁹ Athu mwena wana yanjikidi kungangumka: "Kya mambu tudi namu etu ni ayi, Mwana wa Nzambi? Ayi weza kudi etu mu kutu yangisa, tangwa dya tsuka dya lungidiku kadi?" ³⁰ Kingalo angulu lawu akhedi kudya wusa wenowuna, halaha. ³¹ Phevi yabola yabondidi Yesu yakula:" Yivwa wazola kutukaya, tutumi twendi kwingila mudi angulu awana. ³² Yesu wakudidi: Ndangenu! Phevi jabola ja wudikidi, jaya kwingila mudi angulu. Mu mbala yimoshi, angulu akatuka tswalu ku mudonda aya kwingila mu jiya, aminuka. ³³ Athu akhedi kukengila angulu atshina, endidi ku vidi mu kusenda musamu wa mambu menamana kimahitidi, ni mambu mabwididi athu akhedi azala ni phevi jabola. ³⁴ Mumbala yimoshi akwa vidi mwenedina oshu awudikidi mu kwenda kuwanina ni Yesu. Tangwa dya mumona, eni amubondidi mu kukatuka mu thothu yowu.