¹ Wu sambisanga oku athu, ni ayi akaleki kukusambisa. ² Yivwa lo, ayi aka kuzengila mudi kiwenda kuzengila athu ekha, aka kutesila mu kitesilu kinwenda kuteshila akwenu. ³ Kyehi wudi kutalanga kisweledi kidi mu disu dya mukwenu, kashi wusiku kutalanga kidi mu disu dyeyi. ⁴ Kyehi wufeti kuleza pangi eyi: Leka ni kukatudi kisweledi mu disu dyeyi, ayi mweni ephi ni kiswaswa naki mu disu dyeyi. ⁵ Ayi mukhubidi, katula thethi kisweledi mu disu dyeyi, kumanima wijiki kya kukatula ka kisweledi kedi mu disu dya pangi eyi. ⁶ Nuhananga oku yima ya vedila kudi ambwa, nukonga oku wusanga wenu kudi angulu, yivwa lo akuwukonga, kaku wuvutula oku, akuwuzanga.. ⁷ Lombenu, akunuhwa, hengenu nukumona, kokutenu akunwanzulula. ⁸ Kikuma, oyu walomba, wukunona, kosu wahenga wukumona, mosu wakokuta akumwanzuludila. ⁹ Nani mu katshi kenenu wukuhana yala kudi mwana enji yivwa mweni wamulomba mungumba? ¹⁰ Yivwa wakulomba shiya wukumuhwa nyokha ? ¹¹ Kyenikyoki, Yivwa enu nudi nwabola, nwenda kuhwa ana jenu yima ya phimbu, ekhi yikukonda kudi Tata yenenu wudi kuhulu, aleka kunuhwa yosu yinudi kumulombanga? ¹² Mosu ma nudi kuzolanga etshi athu ayangi kudi enu, hangenu phila yimoshi kudi eni, kikuma tshiku yidi ku makulanga ni ambikudi. ¹³ Engilenu mu kakishu katsyotu. Kikuma, ekina kijima, kidi njila yidi kusendanga ku lufwa, athu lawu enda kukihitila. ¹⁴ Kashi kishu kidi kitsyotu, njila yoki ephi yidi yitshiotu, yidi njila yenda kusenda mu kunona moyi, yikuhitilanga oku athu lawu. ¹⁵ Kebenu ni ambikudi aluvunu. Enda kwiza kudi ni yiketa ya mamemi, kashi mu katshi kowu edi athambu. ¹⁶ Enu nwa kawejiya mu yisalu yowu. Walunga kuhela yibundu ya vinu mu mutondu wa ndema ndema, ngololo yibundu ya figi mudi ni makala? ¹⁷ Mutondu wa phimbi wenda kuhudisa yibundu ya phimbu, Kashi mutondu wabola wenda kuwudisa yibundu yabola. ¹⁸ Mutondu waphimbu wenda oku kuwudisa yibundu yabola. Mutondu wabola wenda oku kuwudisa yibundu yaphimbu. ¹⁹ Mutondu wosu wenda kuleka kuwudisa yibundu ya phimbu enda ku wuvuka, awukonga kujiku dya thuya. ²⁰ Kyenikyoki, nwa kejiya ambikudi aluvunu mu yisalu yowu. ²¹ Keshiku oshu enda kuthambika Fumu Fumu, akengila mu kifumu kya kuhulu, kashi awana enda kuhanga luzolu lwa tata wudi kuhulu. ²² Lutshiku mwenoluna athu lawu akakula kudi ami: Fumu, Fumu, Wajimbangana? Mu jina dyayeyi twakhedi kumwanga ndaka yakatukidi kudi Pevi ya Vedila. Mujina dyayeyi twakhedi kuhudisa pevi ja bola. Mujina dyeyeyi twahangidi yipedikisa yingi. ²³ Kashi ami nyaka waleza: ami ninwijiku; Katuka kumesu mamemi, enu nudi athu akhu. ²⁴ Kyenikyoki mwoshu wevwa malongi manidi ku nulonganga niku mahangilanga, wa kakhala mudi muthu wa mayela, oyuna watungidi nzu yenji a wulu dya mayala. ²⁵ Mvula kiyedidi yanoka, meya mazadidi, funji ya ngolu ya pupudidi kya ngolu, ku nzu mweneyina, kashi ya bwidiku, kikuma ayi tungidi hahulu dya mayala. ²⁶ Kashi muthu oyu wukwivwanga malongi mamemi ku mahangilanga lo, wakakhala mudi muthu waswinga, oyuna wa tungidi nzu yenji ha wulu dya fufuma. ²⁷ Mvula kiyanokini, meya ma zadidi, funji ya pupudidi kia ngolu kunzu yeneyina, ya bwidi yoshu ya zanginini. ²⁸ Kyela Yesu wamanisa mukwakula mambu menamana, hunji dyoshu dyakhedi kuyituka phila ya longilanga. ²⁹ Kikuma wakhedi kulonga ni kiyeka kioshu, kashi keshiku mudi a malongi ma ji tshiku.