¹ Kebenu mu phila ya kuhangila Nzambi kumesu ma athu, kikuma kya kudimwekinisa kudi eni. Yivwa lo, nwa kanona oku matapishi kwa tatenu wudi ku wulu. ² Henihohu tangwa di wahana makabu ma khenda, wuta oku mukanda mudi kyenda kuhanga akhubidi mu manzu ma yisambu ni mu mukhidi. Nya kuleza ni kyedika kyoshu esthi, eni anona kadi matapishi mowu. ³ Tangwa dinwa zola kuhana makabu ma khenda, leka kokhu dyeyi dya kimama dijikoku ma ku hanganga kokhu dya kitata, kikuma makabu menu, ⁴ nu mahani mu kisweki. He Tatenu wudi ku nu labanga mu kisweki wu kunuhwa matapishi. ⁵ Yivwa nwenda nwa samba Nzambi nukhala oku mudi akhubidi, kikuma eni enda kuzola kusambila mu manzu mowu ma yisambu, ni mumakhanu ma njila , athu awamoningi. Nya nuleza ni kyedika kioshu, anona kadi matapishi mowu. ⁶ Kashi tangwa diwudi kusambilanga, engilenu ku suku dyeyi, andjika kisu kyeyi, sambila tateyi mu kitsweki. He tateyi, wenda kumona mu kitsweki, wu kukuhwa matapishi. ⁷ Mu kulomba kweyi, wulata oku dya kuwudisa jindaka ja konda fhunu mudi apani, eni enda kubanza etshi akuwevila yivwa enda alapikisa kwakula. ⁸ Kyenikyoki nukhala oku mudi eni; kikuma tatenu wejiya ekhi yidi nzala yenu, ata kandiku kadi nu mu lomba nayi. ⁹ Tala phila enu nefeti sambilanga: Tata yetetu wudi ku wulu! leka jina dyeyi dikhadi dya lukumu; ¹⁰ Leka kifumu kyeyi kiji; Leka luzolu lweyi luhangami hashi mudi kyoki kidi kuwulu. ¹¹ Tuhu lelu madya metu ma koshu lutshiku. ¹² Tuvidishidi kubola kwetu mudi ki twenda ku vidishila awana enda kutuhanga kubola. ¹³ Wu tu leka oku atuhukumuni, kashi tutambudi ku mokhu ma Satana. Kikuma kudi ayi kweni koku kudi luyalu lwa ngolu ni khembu ni lukumu lwa mvula ni mvula, Amen! ¹⁴ Kikuma yivwa nwa vidishila athu kubola kwowu, tatenu wudi ku wulu wuku nu vidishila enu ephi. ¹⁵ Kashi yivwa nwa wa vidishididiku kubola kwowu, tatenu kaku nu vidishila oku kubola kwenu. ¹⁶ Yivwa nwa leka kudya kikuma kya kusamba, nukhala oku ni khenda mudi akhubidi. Eni enda kusoba bunzu yowu mu ku dimwekinisa kudi athu etshi, aleka kudia kikuma kya kusambila. ¹⁷ Nya nuleza ni kyedika kyosu, eni anona kadi matapishi mowu. Kashi enu yivwa nwa leka kudia kikuma kya kusambila, hangikenu suki, ovwenu mbunzu yenu, ¹⁸ mu kuleka kumwekinisa kudi athu etshi nudi nzala kikuma kya yisambu, kashi tatenu wu kwijikanga mu kisweki wu kunuhwa matapishi. ¹⁹ Nudi lumbikoku kivwama kya lawu henaha hashi, misobi ni wukelengi yaka kizanga, eji alunga kwingila akaba. ²⁰ Mboti mu kusweka kivwama ku wulu, kwakonda misobi ni wukelengi mu ku kizanga eji ephi kalungidiku kwingila mu kukaba. ²¹ Kikuma hoshu hedi kimvwama kyeyi, heni hohu ephi hedi mutshima weyi. ²² Dishu didi mwinda wa mwila. Yivwa dishu didi phimbu, mwila woshu wu kukhala ni kyeji. ²³ Kashi yivwa dishu didi dyafwa mwila woshu wu kukhala mu katshi ka phipa. Henihohu yivwa kyeji kidi kudi ayi kyajima, phipa yi kukuyala. ²⁴ Kushiku ni muthu walunga kuhangila afumu mbadi. Yivwa lo wu ku beya mumoshi, wukudihana kudi mwekha: yivwa lo wu kukumbula mumoshi, walehudila mwekha. Enu nwa lungidiku kuhangila Nzambi ni kivwama. ²⁵ Henihohu ami nidi ku nu lezanga nu leki ku diyangisanga kikuma kya lujingu lwenu etshi, ekhi twa kadia to ekhi twa kunwa ( kikuma kia mwila wenu ekhi twa ka vwata). Kikuma, moyi wenu wa hitidiku madia to mwila wahitidiku muledi? ²⁶ Talenu tujila ku wulu: twendoku kukuna ni kuhela, tu kuswekanga oku mu jikhila. kashi tatenu ku wulu wenda ku tudisa. Enu nwa tuhidiku fhunu? ²⁷ Nani mu katshi kenenu, ata wa diyangisa wa lunga kusyetula lutshiku lumoshi mu moyi wenji? ²⁸ Ekhi nudi ku diyangishilanga kikuma kya miledi? Talenu yithundu mu yilanga kyehi yenda kumena: Yenda oku kuhanga, yenda oku kutunga miledi. ²⁹ Kashi ami nya nuleza etshi, ata Salomoni mu lukumu lwenji lwoshu ka vwatidiku mudi yithundi. ³⁰ Yivwa Nzambi wenda kuvwatisa mwangu lelu, ameni awoshia thuya, he kyehi akuleka lo ku nu vwatisa, enu nudi ni lukwikilu lutshiotu? ³¹ Nu diyangisanga oku, nwakulanga oku: ekhi twa kudia? ekhi twa kunwa? ekhi twa kavwata? ³² Kikuma yima mweneyi yoshu, aphani enda kuyihenga. Tatenu wudi ku wulu wejiya ekhi yidi nzala yenu. ³³ Hengenu thethi kifumu, ni masonga ma Nzambi; yoshu eyina yekha wa ka nuhwa nayi. ³⁴ Nu diyangisa oku kikuma kya lutshiku lwa hameni; Kikuma lutsiku lwa hameni ludi ni pila yolu yekha. Koshu lutshiku ludi ni mambu molu.