¹ Kiela Yesu wa manisa mu kwakula mambu menamana moshu, walejidi alunguki jienji etsi, ² "Ejikenu etshi khinji ya lufwa lwemi yikukhala mu matshiku madi mwana wa muthu aka mukapa kudi ambeni, aka mukhokha ha kulunji." ³ He afumu jia Anganga-Nzambi ni amambuta ma ayuda endidi kuwanina munzia Kayafwa, fumu dia Anganga-Nzambi. ⁴ Evinginini etshi akwati Yesu mu kitsweki endi kumujiya. ⁵ Akhedi kwakula etshi tu mukwat'oku mu khinji, yivwa lo athu akwivwa khabu." ⁶ Yesu wakhedi ku Betania, wengila munz'a Simoni wakhedi wayela bwashi. ⁷ Mukhetu mumoshi wejidi penapena ni mweni, wakhedi ni mulangi wa madiashi ma thalu yingi, wa ma mwangini mu mutwa wa Yesu kiakhedi a mesa ni kudia. ⁸ Kashi alonguki jienji kia mweni kienekina, abokutidi, eni etshi, "Kikuma kiakhi wa zangila madiashi kienekina? ⁹ Twambidi ku masumbisa mu thalu ya lawu twa kapila awayi fwalanga." ¹⁰ Yesu wejikidi mambu makhedi kwakula, he wa waleza etsi, "Ekhi nu kuhwelakanga mukhetu oyu pashi? Mambu mahanga kudi ami medi mawaha. ¹¹ Kikuma enu nudi ni awayi tangwa dioshu, kashi ami nu kubuloku epi kukhala niami. ¹² Pila ya ngumwangina madiashi mu mwila wemi, wahanga kienikina mu kuhangika mwila wemi, kikuma kwa sala fioti angujiki. ¹³ Kiedika ami nia nu leza etsi, kwoshu kwa kabula kulonga tsangu ya mboti mu kifutshi, akabula kwakudila mambu mahanga mukhetu oyu ni ku mubanzanga." ¹⁴ Mu tangwa mwenedina, mumoshi mukatshi ka kumi ni mbadi dia alonguki jina dienji Yudashi Yiskadioti, wendidi kumona Fumu wa Anganga-Nzambi, ¹⁵ wa wehula etsi,"Ekhi nu kunguhwa yivwa nia nu yekudila Yesu?" Eni amuhwedi fwalanga makumi masatu. ¹⁶ Katuka tangwa mwenedina mweni wa henganga djila ya ku muyekula kudi eni. ¹⁷ Lutshiku lwa thethi lwa khinji ya mapa menda kuleka kunana, alonguki jienji ehudidi Yesu etshi, "Kwehi wazola tu kuhangikidi madia ma khinji?" ¹⁸ Mweni etshi, "Ndangenu ku vidi, mu nzu ya muthu mumoshi, nu muleji etsi: 'Fumu wakula: " Tangwa diemi dia lunga. Ni kuhanga kinji ya Paki kunjeyi ni alonguki jiemi.""' ¹⁹ Alonguki ahangidi mudi kia walejidi Yesu, ahangikidi madia ma khinji. ²⁰ Kingweji ki kia bwidi, Yesu wakhedi a mesa ni alonguki jienji kumi ni mbadi. ²¹ Kiakhedi kudia, Yesu wa waleza etsi: "Kiedika nidi kwakulanga, muthu mumoshi mu katshi kenu wungu yekula." ²² Alonguki ekhinini khenda khenda, ayanjika ku muhula, mu moshi mumoshi Keshiku ami Fumu? ²³ Yesu wavutudidi etsi: "Mwosu oyuna wudi kudianga ni ami longa dimoshi mweni wu kungu yekula. ²⁴ Mwana wa muthu wa kafwa mudi ki medi ma sonama. Kashi khenda jingi kudi muthu waka yekula mwana muthu. Mambidi kukhala pimbu kudi muthu mwenoyuna aleki kutetuka." ²⁵ Yudashi Yiskadioti oyu wa mu yekudidi wehula, "Longi, yidi ami? Yesu wa mu vutudila etshi: "Ayi mweni wa makula." ²⁶ Kiela Yesu wa nona dipa, wa vutula matondu kudi Nzambi, wa di vuka wahwa alonguki jienji wa waleza etsi: "Nonenu nudi owu wudi mwila mwemi." ²⁷ Wanonini dikopa, wa vutula matondu kudi Nzambi, wa wahwa mweni etshi: "Nwangenu enu oshu. ²⁸ Kikuma ama medi mashi mamemi, meni medi kimenga kiengisa kwivwangana kwenenu ni Nzambi kikuma kia kubola kwa athu. ²⁹ Kashi nienda nia nuleza etsi, yanjika kieneki nia kanwa oku epi maluvu menama tii lutshiku lu nia kanwa nienu maluvu mekha mu kifumu kia Tata." ³⁰ Kumanima ma kuyimba mimbu mia khinji, endidi ku mundonda wa Olive. ³¹ Tangwedi he Yesu wa waleza etshi: "Pipa ya lelu eno oshu nu ngu leka, kikuma masonama etshi, 'nia kajiya ngungudi mamemi maka mwangana.' ³² Kashi Yesu wayika epi etsi, ki nia katokama nia kenda kunu makinina ku ngadidi." ³³ Kashi Petulu wanonini ndaka wakula etshi: "Ata athu oshu aka kuleka, ami nia ka kuleka oku lo." ³⁴ Yesu etshi: "Kiedika nidi kukulezanga, mu pipa ya lelu nzolu kamba oku kadi kukokula ayi ki wamba kungusuwangana mbala jisatu." ³⁵ Petulu wa muleza etsi: "Nia ka kusuwangana oku ata fioti, ata kufwa nia kafwa ni ayi." Alonguki ekha akudidi kaka pila yimoshi. ³⁶ He Yesu watudidi ni alonguki jienji mu kilanga kimoshi kienda kutambika Getesemani,wa waleza etshi: "Khalenu henaha ami niaya kusambila okuna." ³⁷ Wendidi ni Petulu ni ana mbadi a Zebede. Wakhedi khenda khenda ni mutshima pashi. ³⁸ He wa waleza etsi: "Mutshima wemi wazala ni khenda mudi ni kufwa, khalenu henaha tukhielenu." ³⁹ Wa pushinini mwa fioti, wa fukama, mbunzu hashi. Wayanjika kusambila Nzambi etsi: "Tata, yivwa wa zola hitisa kopa edi dia pashi didi kungwijilanga. ⁴⁰ Wu hanga oku luzolu lwemi, kashi hanga moshu ma wazola. Wa vutukidi kwakhedi alonguki asatu, wendi kuwawana alangala thulu. Waleza Petulu, kiehi enu nwa leka kukhiela ni ami ata tangwa dimoshi? ⁴¹ Khalenu nwa tokama, sambilangenu Nzambi, mbeni aleki ku nu bwisa. Pevi ya muthu ya zala ni mambu mawaha, kashi mwila wenji ngolu lo." ⁴² Wendidi epi mbala ya kiadi mu kusambila mweni etsi: "Tata, yivwa kopa edi dialungidiku kuhita kaka ni dinu, leka luzolu lweyi luhangami." ⁴³ Wa vutukidi epi kwakhedi Alonguki jienji, wa wawana alangala kaka thulu, kikuma mesu makhedi ma walema. ⁴⁴ Yesu wa washishidi epi waya kusambila mbala ya kisatu, ni kwakula kaka mutishindu wumoshi. ⁴⁵ Kumanima he wa vutukidi kwakhedi alonguki jienji, wa waleza etsi: "Nudi kaka nwa langala e nwa tokama? Talenu, tangwa dia lunga, mwana muthu a ku muyekula ku mokhu ma athu abola. ⁴⁶ Zangulukenu twendenu. Muthu wu ku yekula wudi haha." ⁴⁷ Tangwa Yesu akhedi kwakula, Yudashi, mu moshi mu katshi ka alonguki kumi ni mbadi, wejidi nia athu lawu anehini poku ya mwela ni mbolombolu. ⁴⁸ Muthu wa yekudidi Yesu, wa walejidi pila yamba kumwijikila, mweni etshi: "Muthu wu niamba kuhwa mboti mweni yoyi, hani nu mukwati." ⁴⁹ Mu mbala yimoshi Yudashi wendidi penapena ni Yesu wakula etshi: "Mboti Longi!" Wa muyamba. ⁵⁰ Yesu wa muvutudila etshi: "Pangiemi, moshu ma wazola kuhanga, mahangi tswalu." Awana asadidi ejidi amushia Yesu mokhu amu kwata. ⁵¹ Mumoshi mu kathsi ka athu akhedi ni Yesu, wa wushidi poku yenji, wakuba musadi wa fumu wa Anganga Nzambi, wa muvuka diatu. ⁵² He Yesu wa muleza etshi: "Wutula poku yeyi mu kilalu, kikuma oshu awa enda kunwana ni poku, akafwa ku poku. ⁵³ Wushiku kwijikanga etshi nia lunga kutambika Tata, eji kungu sadisa mu mbala yimoshi wu kuthumisa asuta jienji, awanjio lawu ahita batayo kumi ni mbadi. ⁵⁴ Kashi yivwa nia hanga kienekina, kiehi mambu medi masonama ma ku lunga?" ⁵⁵ Kumanima Yesu wehula athu mwena wana etshi: "Enu nwa lungidiku kwiza ni ji poku ni mitondu mu ku ngu jiya mudi nidi mwiji. Niakhedi kukhala ni enu matshiku moshu mu manzu ma Nzambi, ni ku nu longa, ekhi nwakhedi kuleka kukwatila. ⁵⁶ Menama moshu mabwa mu kulungisa mambu medi makusonika mu mikanda ya ambikudi." Alonguki oshu amushishidi atshina. ⁵⁷ Awana akwatidi Yesu endidi ku musenda kudi Kayafwa mbuta dia Anganga Nzambi, kwenda kuwongama amambuta dibundu ni amalongi ma tshiku. ⁵⁸ Petulu wakhedi kulaba Yesu alaha tii mu lupangu lwa mbuta wa a nganga Nzambi. Wengididi mu lupangu, wa shikama hakhedi akhengididi ni kutala kiehi maku suka. ⁵⁹ Afumu jia Anganga Nzambi ni a mbaku akhedi kuhenga athu alunga kuhunina Yesu mambu, aswakadi ku mu jiya. ⁶⁰ Kashi athu ejidi engi, ejidi mu ku muhunina mambu, amweniku ata kubola kumoshi tii koku kwejidi kutula athu mbadi, ⁶¹ akula eni etshi : "Muthu mwenoyu wakhedi kwakula etshi, 'Ami nia kabwisa nzu ya Nzambi, nia ka yitunga epi mu matshiku masatu.'" ⁶² Mbuta dia anganga Nzambi wa zangulukidi wakula kudi Yesu etsi: "Wendoku wa vutula mvutu? Ekhi akwakulanga ya bola mu jina dieyi? ⁶³ Kashi Yesu wakhedi wa dibata. Mbuta dia anganga Nzambi wa muleza esthi: "Zenga ndefi mu jina dia Nzambi wa moyi, wu tuleji yivwa ayi wudi Mesiya mwana wa Nzambi? ⁶⁴ Yesu wa mu vutudila etshi: :"Ayi mweni wa makula. Kashi nia nuleza eki, yanjika kikimweni, nu kubula kumona ami mwana wa muthu, ki ni kibula kushikama penapena ni Tata ni lukumu lwoshu ti ki niakeza kukulumuka mu matuta. ⁶⁵ He mbuta dia anganga Nzambi wa bakhidi miledi yenji wakula etshi: "Watukana Nzambi! Ekhi epi tukuhengila athemu? Nwa divila enu mweni kia tukana Nzambi? ⁶⁶ Enu kiehi nwa banza? Eni etshi: "Afeti kaka kufwa." ⁶⁷ Ayanjika ku mu lokudila mati ku mbunzu ni ku mu bula khomi, ni mbata ni kwakula ⁶⁸ etshi: "Kamba ayi wudi Masiya, popa wu tu leji, nani wa ku bula? ⁶⁹ Petulu wakhedi wa shikama hanji mu muwangu, musadi wa mukhetu wa mbuta dia anganga Nzambi weza penapena wa muleza etshi: "Ayi epi wakhedi ni Yesu oyuna wa ku Ngandidi." ⁷⁰ Kashi mweni wa suwunginini mu mesu mathu oshu, wakula etshi : "Mambu ma wudi kwakulanga kudi ami, nia mejikidiku." ⁷¹ He waya ku kishu kia lupangu. Mwana kisalu mwekha wa mukhetu wa mumona, waleza athu akhedi nawu etshi: "Muthu oyu wakhedi ni Yesu wa ku Nazaleti." ⁷² Petulu wa tunini epi, wa zenga ndefi, mweni wa mu leza etshi: "Ni mwijiku muthu oyuna!" ⁷³ Kumanima ma mwa tangwa athu akhedi hohu ejidi penapena ni Petulu, eni esthi: "Ayi wudi mumoshi mu katshi keni, kwakula kweyi kwenda kwa ku funda." ⁷⁴ He Petulu wa vutula etshi: "Leka Nzambi anguhu ndola yivwa nia dihuna," nia zenga etshi ni mwijiku. Kaka tangwa mwenedina, nzolu wa kokula. ⁷⁵ Petulu webuka ma mulejidi Yesu etshi: "Nzolu kaka kokula oku kadi, ayi wa ka ngu beya mbala jisatu etshi wu ngwijiku." Wa wudikidi, ni kwenda ni kudila kia ngolu.