¹ He Kifumu kia Nzambi kia kakhala mudi a ndumba kumi akonda kwijika yala, awa anonini minda miowu aya kuwanangana ni Yala. ² Atanu mu katshi kowu akhedi aswinga, atanu ekha akhedi ni mayela. ³ Kiela awana akhedi aswinga anona minda miowu, eni a jimbangana maji. ⁴ Kashi awa akhedi mayela anonini ni ma bolu ma maji ni minda miowu. ⁵ Yala kiakhedi kujieta mu kwiza kutula, owu oshu alembwidi, alangala thulu. ⁶ Kashi mu katshi ka pipa evidi mayema, " Tala, yala watula! Ndenu nu waningini nendji." ⁷ He a ndumba mwena wana akonda kwijika a mala atokimini ahangika minda miowu. ⁸ Awana a swinga aleza awana akhedi mayela etshi: "Tubangisenu kama tu maji kikuma minda mietu mia jima." ⁹ " Kashi awana akhedi ni mayela awa vutudidi etshi: 'Ma ku tulunga oku ni enu ni etu, ndenu kudi athu enda kusumbisa nu sumbi kikuma kienu mweni.' ¹⁰ Tangwa diendi kusumba, yala watula, awana akhedi akubama, engila ni mweni mu feti dia wala, akanga kisu ni tsabi. ¹¹ Kumanima tangwa awana ekha epi atudidi, akula etshi: 'Longi, longi, tukangudidi kishu.' ¹² "Kashi mweni wa vutudidi etshi: 'Kiedika nidi ku nulezanga, ami ni nwijiku.' ¹³ Sungulukanga enu kikuma enu nwijiku tangwa ni kilumbu. ¹⁴ Kikuma ma kakhala mudi tangwa dia zola kwenda muthu mu thtothu yekha. Wu ku tambika athu jiendji oshu a kisalu wa wa shishila kimvwama kiendji. ¹⁵ Kudi mu moshi mu katshi kowu, wa muhwa pata jitanu, kudi mukowu pata jiadi, oyuna mwekha kama pata yimoshi. Koshu muthu wa nonini thalu ya lungidi mu ngangu jiendji, muthu mweni wendidi pila ya kanini ndjila yendji. ¹⁶ Mu mbala yimoshi oyu wanonini pata jitanu, wa ji hangila kisalu wa wudisa pata jikowu jitanu ha wulu. ¹⁷ Pila yimoshi oyuna wa nonini pata jiadi wabutidi jiadi jiokwu. ¹⁸ Kashi oyu wa nonini pata yimoshi kiendidi washima buku mu mavu, wa vumbika fwalanga jia Fumu endji. ¹⁹ Yilumbu lawu ya hitidi Fumu wowu weza kuvutuka, wa wa lomba a mu tedi fishi. ²⁰ Oyu wa nonini pata jitanu waneha jitanu jiekha. Wa leza fumu endji etshi: 'Longi, ayi wa pedi pata jitanu tala jitanu jiekha.' ²¹ "Longi diendi wa muleza etshi: 'Wahangidi pimbu, ayi wudi muthu sa kisalu wa mboti! Wenda kulemvuka. ki wa lemvuka mu yima yitshiotu mbala yakeza nia ka kuhwa ya hitangana mu kuyi keba.ˋYiza wukhadi mu kieshi penapena ni Longi dieyi.' ²² Muthu wa kisalu oyuna wa nonini pata jiadi, wezidi,wakula mweni etshi, 'Longi, wa nguhwedi pata jiadi. Tala jiadi jiekha ji nia nonini a wulu.' ²³ Longi diendji wa mu lejidi etshi, 'Kienikioki, wahangi mboti ! wudi muthu wa kisalu wa mboti. Wakhedi mboti mu yima yitshiotu nia ka kuhwa kiyeka kia yima yingi. Yiza wukhadi ni kieshi kidi kudi Longi diehi.' ²⁴ Ku tsuka, muthu wa kisalu oyuna wa nonini pata yimoshi, wejidi wakula etshi, ' Longi, niejiya etshi ayi wudi muthu wa mathatha. Ayi wenda kusanda yima yi wa konda kukuna, wenda epi ku wongika yima wa leka kuyungula. ²⁵ Nievidi woma, he ami niendidi kusweka pata yeyi mu mavu. Tala eyekhi pata yeyi. ²⁶ "Kashi Longi diendji wa mu vutudila etshi, 'Ayi wudi muthu wa kisalu wa bola, wudi epi mumolu, wejika esthi nienda kusanda mbutu ata nia kuniniku. ²⁷ Wambidi kusweka fwalanga jiemi mu bangi dimoshi, mu kuvutuka kwemi niambidi kunona fwalanga jiemi ni matapishi ha wulu. ²⁸ Mu tokununenu pata eyi nu yiwu muthu wa kisalu oyuna wudi ni pata kumi. ²⁹ Kikuma kudi oyu wudi ni kima, a ka lunda yima lawu. Kashi oyu wa konda kima, yosu yedi nayi a ka yi tambula. ³⁰ Mushienu muthu wa kisalu oyu wudi wa swinga hanji, hendi kukhala mu midima; kwenokuna akadidingi ni kudi suma mazewu. ³¹ Kia kela Mwana wa muthu weza mu lukumu lwendji ndjila yimoshi ni a wandjio je, wa ka shikama ha kitshi kia watha wendji ni lukumu lwoshu. ³² Makanda moshu ma kawongama ku mesu mendji, wa ka kapa athu mudi kienda kukapa mvungi mamemi ni a khombu. ³³ Wa kashia mamemi ku khokhu dia kitata, a khombu ku khokhu dia ki mama. ³⁴ He Fumu wa kakula kudi awa edi ku kokhu diendji dia kitata etshi, 'Yizenu, enu nudi ni lusakumunu lwa Tata yamemi, nu noni kifumu kia nu hangikididi yandjika ku kishina. ³⁵ Kikuma, ami ki nievidi nzala, enu nwa pedi yima ya kudia; ki nievidi pwisa, enu nwa pedi meya ma kunwa; ki niakhedi nzenza, enu nwa ngu yambidi; ³⁶ Ki niakhedi khonga, enu nwa nvwatishidi muledi; ki niakhedi nia yela, enu nwa ngu wukidi; ki niakhedi mu boloku, enu nwejidi kungu tala.' ³⁷ "He athu mwenawana a ka muhula etshi, ' Fumu, tangwa ekhi etu twa kumweni ni nzala, twa kuhwedi yima ya kudia? To wakhedi ni pwisa twa kuhwedi meya ma kunwa? ³⁸ Tangwa ekhi wejidi mudi nzenza etu tu ku yambi? To wakhedi khonga etu tu ku vwatishi? ³⁹ Tangwa ekhi wakhedi wayela etu twa kuwukidi to wakhedi mu boloku etu twendidi ku kutala? ⁴⁰ "Fumu wa ka vutula etshi, 'Kiedika nidi ku nu lezanga, koshu mambu ma pimbi ma nwa hangidi kudi koshu muthu, yikhadi kalengi, wudi kaka pangiemi, nwa ma hangidi kudi ami.' ⁴¹ Kumanima wa ka leza awa akhakhala ku kokhu dia kimama etshi, 'Katukenu penapena ni ami, enu anu shinga. ⁴² Ndangenu nwingidi ku jiku dia thuya twa kondanga kijima, otuna twahangikila diabulu ni a wandjio jiendji. Kikuma nia khedi nzala, enu nwa pediku kima kia kudia; nia khedi ni pwisa ni meya ma kunwa enu nwa pediku; ⁴³ Nia khedi nzenza, enu nwa ngu khayidi ; nia khedi khonga, enu nwa mvwatishidiku miledi, nia khedi kuyela mu boloku, enu nwa ngu tadidiku. ⁴⁴ "He, eni epi a ka vutula ni kwakula etshi, 'Fumu, tangwa ekhi etu twa kumweni ayi nzala ni pwisa, to nzala, to khonga, to etshi wa yela, to mu boluku nga twa lekidi ku ku sadisa? ⁴⁵ "He wa ka wa vutudila etshi, 'Kiedika nidi ku nu lezanga, kosu kima ki nwa khedi kuleka kuhanga ata kudi mwana kalengi, nwa yi hangidiku kudi ami.' ⁴⁶ He athu mwenawa a kunona ndola ya mvula ni mvula, awana a pimbu a ka nona moyi wa mvula ni mvula."