¹ Yilumbu yisambenu ya hitidi Yesu wa nonini Petulu, Jaki, ni pangiendji Yowani, waya nawu ha wulu dia mundonda wumoshi wulaha. ² Mweni wakhedi kubejimina. Mbunzu yendji ni kukedia mudi tangwa, miledi yendji yekhinini ku kejimina mudi mwania. ³ Tala, he Moshi ni ELiya a wa wudikila ayandjika kwakula ni mweni. ⁴ Petulu wa lejidi Yesu etshi: " Fumu yidi mboti kudi etu kitudi henaha. Yivwa wa kumbula nia ka tunga manzu masatu henaha yimoshi yayeyi, yekha ya Moshi, yikowu ya Eliya." ⁵ Mweni kiakhedi kumanisa kadi kwakula lo, tuta dimoshi diakhedi ku kejimina dia wa winda, ndaka yimoshi ya wudikidi yakula etshi: " Tala mwan'emi wu nia hitangana kuzola, wenda ku nguhwa kieshi. Nufeti ku mwivilanga." ⁶ Tangwa dievidi alonguki kienekina, abwidi hashi, mbunzu matadidi lo ni woma woshu. ⁷ He Yesu weza wa wa kwata wakula etshi: " Zangulukenu, nu khala oku ni woma." ⁸ He eni atadidi ku wulu kumona muthu lo kaka Yesu. ⁹ Eni kia kulumukanga, Yesu wa wa leza etshi: " Mambu ama moshu mahita oku, nu lezoku muthu tii hohu mwana muthu a katokama mu lufwa." ¹⁰ Alonguki mwena wana a mwihula etshi: " Kikuma kiakhi amalongi ma jitsiku enda kwakula etshi Yidi mboti Eliya a thethiki kwiza?" ¹¹ Yesu wa wa vutudidi etshi: "Mu kwakula kwa pimbu, Eliya wakeza mu kuhangika mambu moshu. ¹² Kashi ami nia nu leza etshi Eliya weza kadi, kashi heni ka mwijikidiku. Eni a mu hangidi pila ya luzolu lowu. Kitezu kimoshi kioki mwana muthu wa ka niokwama ku mokhu mowu." ¹³ He alonguki a bakisa kia etshi mweni wa walejidi mu kikuma kia Yowani Mbotika. ¹⁴ Kiela a vutuka kwakhedi Hundji dia athu, muthu mumoshi wejidi kudi Yesu, wa fukimini kutwala yendji, wakula etshi: " ¹⁵ Fumu, evila mwana emi khenda kikuma mweni wenda kukonia; wenda wa mona pashi jingi. Mbala jiekha wenda kubwa ku jiku to mu meya. 6 Ami niendi nendji kudi alonguki jieyi, kashi eni kakukidiku ku mu wuka." ¹⁷ Yesu wa vutudidi etshi: " Kikanda kia athu nudi mitshima mia kola mia zala ni kubola, ma tangwa mangahi ni ku nu kashila mutshima? Mu ndehinenu nendji oku. 8 Yesu wa nganina Pevi ya bola, ya wudika mudi mweni. ¹⁹ He alonguki apusana penapena ni Yesu mu kitsweki a mwihula etshi: " Kikuma kiahki etu twa lekanga kukaya pevi mweneyina?" 0 Yesu wa wa leza etshi: " Kikuma lukwikilu lwenu ludi lutsiotu." Kashi ami nia nu leza ni kiedika kioshu etshi, yivwa nudi ni lukwikilu mudi kidi kheni ya mutardi, nwa lunga kwakula kudi mundonda owu etshi: ' Katuka ahudi,' nda wukhadi hahana, wu kutumuka kushiku ni kima ki nu kodila. ²¹ Kashi pevi ya pila mwenehi yenda kuwudika mu ngolu jia yisambu ni kujila kudia. ²² He kia khedi ku Ngadidi, Yesu waleza alonguki jiendji etshi: " Mwana muthu a ka mu kapa kumokhu ma athu, ²³ eni a ka mu jiya, mu kilumbu kia kisatu wa katokama mu lufwa. " Alonguki ekhinini khenda khenda. ²⁴ Kiela atula ku Kapernawumi, Tulaki twakhedi kufutisa kitadi kia nzu ya Nzambi eza kudi Petulu a mwihula etshi: " Fumu enu kendoku kufuta kitadi kia Nzu ya Nzambi? " Mweni wakula etshi: "Ee." ²⁵ Tangwa diendidi Petulu munzu ya Nzambi, Yesu wa thethikila kwakula kudi Petulu etshi: " Ekhi wudi ku banzanga, Simoni? A fumu ha hashi kudi nani enda kunona kibawu? kudi athu jiowu to kudi a nzenza?" ²⁶ Tangwa diela Petulu wa vutula etshi: " kudi anzenza," Yesu wa mu leza etshi: " boshu athu jiowu kendoku kufuta?" ²⁷ Kashi mu kuleka kuhangisa tulaki masumu, ndanga wumbi ndobu mu meya, Shiya wu wukuthethikila kukwata, tangwa di wu ku mu tala mu kanu, wamba kumona kibenda kimoshi. Kinoni wi kiwu tulaki kikuma kia ayi ni ami.