¹ Yesu wa wongikidi alonguki jenji kumi ni mbadi, wa wahwedi kiyeka kya kukaya phevi ja bola, ni kyakuwuka akhashi ni kuzangulusa yikata. ² Tala majina ma athumwa kumi ni mbadi. Thethi, Simoni jina dikowu Phetulu, ni phangi endji Andela, Jaki mwana wa Zebede, ni Yowani wakhedi phangi enji; ³ Fidipa, ni Batolomi; Toma, ni Matayi wakhedi kalaki wa futisanga yitadi ya Leta, Jaki mwana wa Alfe, ni Tadi, ⁴ Simoni mukwa Kanana, ni Yuda Yiskadyoti, oyuna wa yekudidi Yesu. ⁵ Yesu watumini eni oshu kumi ni mbadi. Wa wahwedi mulongi: Nwenda oku kudibunda ni aphani, nuphaka oku kwingila mu membu makwa Samadiya. ⁶ Kashi ndangenu kaka kudi mamemi mabila mu katshi ka ana a Yiseledi. ⁷ Ndangenu wa longenu etsi Kifumu kya kuwulu kya kokuluka. ⁸ Wukenu akhashi, tokimishenu athu afwa, wukenu ena bwashi, kayenu phevi jabola. Enu nwa nonini ya phamba, wahwenu ya phamba. ⁹ Nu nonoku wola, to fwalanga, to kibende kya thalu nusweki mu mikaba myenu; ¹⁰ Nu nona oku esu waba dya kukiba nadi mu ndjila, tomiledi myadi, to yidyatudi, to koka. Kikuma muthu wenda kuhanga kisalu enda ku mu futa. ¹¹ Koshu dimbu dijima, to dibibi dinwatula, nufeti kuwula yivwa hedi ni muthu wabathu walunga ku nuyamba mu kukhala, jingilenu kudi mweni tii hohu ha nwa kenda. ¹² Tangwa di nwengila mu nzu, hanenu mboti. ¹³ Yivwa nzu yidi yabathu, leka shipidi dikadi ni nzu yoshu. Kashi yivwa nzu mweneyina yishiku yabathu, leka shipidi dyenu di nu vutukidi. ¹⁴ Yivwa athu aleka ku nu kumbula mu kukhala nawu ni mukwivwa ndaka yenu, tangwa di nukatuka mu nzu, to ha dimbu dyenedina, kukumunenu mavu ma myendu myenu. ¹⁵ Ami nyenda nya nuleza ni kyedika kyosu, Thothu ya Sodomu ni Gomore a kayifundisa oku kuhita dimbu dyenedina, mu tangwa da tsuka. ¹⁶ Talenu, ami nienda nia nu tuma mudi mamemi mu katshi ka athambu, khalenu nwa sunguluka mudi a nioka, nwa tulumuka mudi ma bembi. ¹⁷ Dikebenu kudi athu, kikuma, a ka nu funda kudi a zuji mu ku nu bula fimbu mu manzu mowu ma yisambu. ¹⁸ Enu a ka nu senda kudi a Guvernere ni a Fumu, kikuma kiamemi, ya kakhala kithemu kudi eni ni kudi apani. ¹⁹ Tangwa dia ka nu funda nu diyangisa oku mu kuhenga ekhi nwa kakula, kikuma ma nwa kakula a ka nuhwa namu mu tangwa mwenedina. ²⁰ Kikuma keshiku enu nwa kakula. Pevi ya tatenu ya ka nwakudila. ²¹ A pangi ni a pangi a ka bula ku kapangana, ana epi a ka kapangana ni a tata jiowu. Ana a ka bula kutombukila a tata jiowu ni ku wa jiyishisa. ²² Owu oshu a ka nu menga kikuma kia jina diamemi. Kashi koshu wa ka kasa mutshima tii ku tsuka wa ka huluka. ²³ Yivwa a nuhwa pashi ha vidi dimoshi, tshinenu ha vidi diekha. Kikuma mu kiedika nia nu leza etshi, Enu nwa ka manisa oku mu kwenda mu membu moshu ma Yiseledi mwana mutu wa ka khala weza kadi. ²⁴ Mulonguki ka hitidiku longi diendji, musadi epi ka kuhita oku Fumu endji. ²⁵ Mulonguki a lunga ku mu nona mudi longi diendji, musadi epi mudi fumu endji. Yivwa akhedi kutambika Fumu wa nzu, Belzebul majina ma athu a nzu yendji ma kukhala ma hitanga kubola. ²⁶ Kienikioki nu wevwa oku woma, kikuma kushiku ni kitsweki kia kaleka kwijiangana, kushiku ni kima kia swamana kia ka leka ku mwekana. ²⁷ Moshu ma nia nu leza mu pipa, matungululenu mu mwania; moshu ma nia nu fetisa mu matu, tenu mukanda ha yangi dia nzu. ²⁸ Nu khala oku ni woma wa athu enda kujiya mwila, kashi kalungidiku kujiya moyi. ²⁹ Khalenu ni woma wa oyu wa lunga kuzanga mu mbala yimoshi mwila ni moyi ku thuya twa bilungi. Tujila twadi kenda oku ku tu sumbisa mu thalu yitshiotu. Ata kamoshi kakubwa oku hashi Tatenu akondi kwijiya. ³⁰ Kitezu kimoshi tsuki jia ku mutwa yenu jioshu jidi jia tangiwa. ³¹ Nwivoku woma. Enu nudi fhunu yingi hitila tujila. ³² Kienikioki, Koshu muthu wa ngu kumbula kumesu ma athu, ami epi nia mu kumbula kumesu ma Tata ya memi wudi ku wulu. ³³ Kashi, oyu wa ngu beya kumesu ma athu, ami epi nia ka mu beya kumesu ma Tata ya memi wudi ku wulu. ³⁴ Nu banza oku, etshi ami nieza kuneha ngemba henaha hashi. Ami nia neha oku ngemba, kashi poku ya mwela. ³⁵ Kikuma, niejidi kukapisa mwana wa yala ni tatendji, to mwana mukhetu ni mamendji, to mukhetu wa mwana ni mahenda mendji ma mukhetu. ³⁶ A mbeni jia koshu muthu edi kaka mu katshi ka nzu yendji. ³⁷ Oyu wazola tatendji to mamendji hitila ami, keshiku wa pimbu kudi ami. ³⁸ Oyu wa konda kunona kulundji diendji mu kwiza ku ngu laba, keshiku wa pimbu kudi ami. ³⁹ Oyu wa zola kuhulusa moyi wendji wu ku wu bidisa, kashi oyu wa bidisa moyi wendji kikuma kia memi wa ka wu none epi. ⁴⁰ Oyu wa nu kumbula wa ngu kumbula ami, oyu wa ngu kumbula, wa kumbula oyuna wa ngu tumini. ⁴¹ Oyu wa kumbula mbikudi ni lujitu lwosu kikuma wudi mbikudi, wa ka nona matapishi ma muthu wa mboti. Oyu wa kumbula muthu wa pimbu, kikuma wudi muthu wa pimbu, wa ka nona matapishi ma muthu wa pimbu. ⁴² Koshu wahwa ata kopa dimoshi dia meya ma kunwa kudi mumoshi mu katshi ka alengi, kikuma wudi mulonguki wemi, nia nu leza mu kiedika etshi, mweni ka ka bidisa oku ata kiehi matapishi mendji.