¹ Kwa hitidi ndambu ya ma tangwa, Yesu wayanga ni kukiba mu ma vidi ni mu membu, ni kulonga, ni ku tendula Tsangu ya mboti ya kifumu kia Nzambi. ² Eni oshu kumi ni mbadi, akhedi ni mweni, ni akhetu awana awudishidi pevi jia bola, ni awana awukidi: Madiya wakhedi kutambika Mandeleni, oyu wa wudishidi pevi jia bola tsambwadi; ³ Jiani, mukaji'a Kuza, wakhedi kuhanga mu bilo dia Herode; Suzana, ni akhetu ekha lawu, awa n'a akhedi kusadisa ni yima yowu. ⁴ Tangwa diakhedi kuwongama hundji dijima penapena ni Yesu, akwa ma vidi ezanga kudi mweni, wa wa tela kingana kimoshi: "Muthu mumoshi wa wudikidi waya kukuna. ⁵ Tangwa diakhedi kukuna, kiatshi kia kheni kia bwidi mu khulu ya ndjila, aji diatidi, tujila twa jididi jioshu. ⁶ Kiatshi kiekha kiabwidi mu mavu makhedi ma dibunda ni mayala, jieni ni kumena jia wumini, kikuma muma mwa khedi mwa tuta. ⁷ Kiatshi kiekha kiabwidi mu ndema ndema, ndema ndema ki jia kudidi djila yimoshi, jia ji shitikisa. ⁸ Kashi kiatshi kiekha kia kheni kiabwidi mu mavu ma pimbu jia butidi yibundu kitesu kia kuhitila khama. Kiela Yesu wakula kienekina, wathuta ndaka etshi: "Kosu wudi ni matu ma kwivila, evi." ⁹ He Alonguki jiendji amwihudidi, eni etshi : "Ekhi kingana eki kulombulula? ¹⁰ Wa walejidi etshi: "Kudi enu, a nuhwa kiyeka kia kwijiya kitsweki kia kifumu kia Nzambi, kashi kudi athu ekha medi mu yingana, mu pila etshi: 'ata enda atala ka kumona oku, ata epi enda evwa, ka ku bakis'oku.' ¹¹ Yivwenu ekhi kingana ki kuzolanga kulombulula: Kheni jidi ndaka ya Nzambi. ¹² Ejina jia bwidi mu khula ya ndjila, edi athu enda kwivwa ndaka, kumanima Satana weza ku yikatula ku mitshima miowu, mu pila etshi ka kwikila oku, eni aleki kuhuluka. ¹³ Ejina jiabwidi mu mayala jidi athu enda kunona ndaka ya Nzambi ni kieshi, kwivwa evwa, Kashi keshiku ni misodi; Enda kukwikila mu tangwa mwenedina, kashi mu tangwa dia kumekama, a konga ndaka. ¹⁴ Eji jiabwidi mu ndema ndema, edi athu enda kwivwa ndaka mu lujingu lwowu, enda kulembwa kikuma kia khenda ku mutshima, kimvwama kia hashi, kieshi kia lujingu, yibundu yenda oku kukula. ¹⁵ Kashi eji jiabwidi mu mavu ma pimbu, edi athu enda kwivwa ndaka ni mutshima watuluka ni wa pimbu, enda kuyisweka ni kubuta yibundu, ni kukasa kwa mutshima. ¹⁶ Tala Kushiku ni muthu wenda kulemisa mwinda awu windi kathini ho a wishi ku mashina ma muhela. Kashi a kuwushia homa hedi ha thuthuka, mu pila etshi, athu akwingila amoningi kieji. ¹⁷ Kikuma, Kushiku ni kima kia swamana kia leka kwijiangana, kikhadi kia kitsweki kiaka leka kuwudika ha mbaji mu mesu mathu. ¹⁸ Yivwenu mboti kikuma akayika kudi oyu wudi kadi naki, kashi kudi oyu wakonda, ata kosu ya kusilanga mutshima mu kuvwa a ka yi tambula. ¹⁹ Kumanima Mama endji ni a pangi jiendji ejidi kudi mweni, kashi pila ya kumomona yakhediku kikuma athu akhedi amujeta. ²⁰ A mulejidi etshi: "Maminu ni a pangi jieyi edi amakana handji, enda azola kukumona." ²¹ Yesu wawa vutudidi etshi: "Mama ya memi ni apangi jiemi, edi awa edi kwivwanga ndaka ya Nzambi ni edi kuyihanga." ²² He Kilumbu kimoshi, Yesu wengididi mu kibeya ni Alonguki jiendji. Mweni wa walejidi etshi: "Tu zawukenu sambwa edina dia jiya." Azawukidi. ²³ Kiakhedi kuzawuka, Yesu wabwa kutulu. Fundji ya ngolu ya nikishini jiya, kibeya kia yandjika kuzala meya, ekhina mu kingosa. ²⁴ He Alonguki jia Yesu apusana penapena ni mweni, a mu tokimisa ni kwakula etshi: "Longi! Longi! Twa fwa etu." Wa tokimini, wa nganina fundji, lundjidji lwa kilama, meya ma kilama. ²⁵ He wa waleza etshi: "Lwehi lukwikilu lwenu?" Evidi woma, ayanjika kufwetangana etshi: "Nani edi mwenoyu, wenda wa nganina fundji ni lundjidji, ni ku mu lemvukila?" ²⁶ Atudidi mu thothu Geraseni yidi ha sambwa dia Ngadidi. ²⁷ Kiela atuluka mu kibeya yala mumoshi wa vidi mwene dina wakhedi ni pevi jia bola, weza ku wanangana ni mweni. Yandjika thunda, kakhediku kuvwata miledi, ka jingilanga oku munzu kashi ku majiamu. ²⁸ Kiela wa mona Yesu, wa ngangumuka wabwa ku mesu mendji. Wakula mu ndaka ya ngolu etshi: "Ekhi wu kozolanga kuhanga kudi ami, ayi Mwana wa Nzambi wa ku wulu? Nienda nia kubondila, wungu yangisa oku." ²⁹ Kikuma Yesu wa lejidi pevi ya bola yi wudiki mudi yala mweno yuna, kikuma yamu yadidi hengi. Ata kioki akhedi kumukasa ni mishinga ni ma shieni ni ku mu kengidila, wakhedi kubetula shieni mu ngolu jia pevi jia mu sendanga mu themu. ³⁰ He Yesu wa muhula: "Jina dieyi nani?" Mweni etshi: "Lawu," kikuma pevi jia bola jingi jiengididi kudi mweni. ³¹ Jia mu bondila ka wa tuma oku ku yilungi. ³² Kwakhedi ni angulu engi akhedi kudia mu miwanda. Pevi jia bola jia mu bondidi awahu ndjila, jiendi kwingila mudi angulu. Wa wahwedi ndjila. ³³ He pevi jia bola jia wudikidi jiengila mwa angulu. Angulu oshu akatukidi miwanda, aya ku dikonga mu jiya, aminuka. ³⁴ Tangwa diamweni athu akhedi kukengidila angulu mambu mahitidi, athsinini, aya kumwanga tsangu ku vidi ni mu membu moshu. ³⁵ He athu awudikidi mu kutala ki mahitidi. Kiela atula penapena ni Yesu, awanini yala washikama mu miendu mia Yesu, oyuna wa wudikidi pevi jia bola, wavwata miledi, wa dijika, he eni evidi woma. ³⁶ He awana amweni ki mahitidi, atela akowu panji kiehi akodidi yala mwenoyuna wakhedi ni pevi jia bola. ³⁷ Athu oshu ku Geraseni alombidi kudi Yesu mu kukatuka kikuma akhedi ni woma lawu. He wa nini mu kibeya wa vutuka. ³⁸ Yala mweni wa wudikidi pevi jia bola, wa mu bondididi a muhu ndjila endi nendji nzila yimoshi. Kashi Yesu wa mushishidi wa muleza etshi: ³⁹ "Vutuka kunzieyi, wu menikini athu mambu majima mahanga Nzambi kudi ayi. Yala mweni wendidi kudimenika, akatshi ka vidi ma hangidi Yesu kudi mweni. ⁴⁰ Tangwa edi Yesu kiavutuka, hundji dia muyamba kikuma dia mu makininanga. ⁴¹ He, yala mumoshi jina dindji Jayirusi, watudidi, wakhedi fumu wa nzu ya yisambu. Wambwidi mu miendu mia Yesu, wa mu bondila endi kunzu yendji, ⁴² kikuma mwana endji mumoshi kaka wa mukhetu, wakhedi ni mvula kumi ni jiadi wakhedi kutaba. Tangwa diayanga Yesu, hundji dia athu lawu diakhedi kumu kwetikisa. ⁴³ Kinga lo mu katshi kowu mwakhedi ni mukhetu mumoshi wa yelanga kimbefu kia ku wudika mashi, wahangidi naki mvula kumi ni jiadi. Wa bebishidi fwalanga jioshu kudi a minganga kashi kakodidiku. ⁴⁴ Wa shietukidi ku mutanda wa Yesu, wa kwata tsongi ya muledi wendji, mu mbala yimoshi mashi mabetukidi. ⁴⁵ Yesu wakudidi etshi: "Nani wangu kwata?" Eni oshu asuwangana. Petulu wa muleza etshi: "Longi, Hundji dia athu dienda dia ku shitikisa ni ku kutshindjika." ⁴⁶ Kashi mweni wa vutudidi etshi: "Kudi ni muthu wa ngu kwata, nievwa ngolu jimoshi jia wudika ku nidi ami." ⁴⁷ Mukhetu wa mweni etshi pila ya ku disweka lo, wejidi ni kutekita, wabwa ku mesu ma mweni. Wa kumbudidi ku mesu mathu kikuma kia mu kwatididi ni pila ya kodidi mu mbala yimoshi. ⁴⁸ He Yesu wa mu leza etshi: "Ndumbu wemi, lukwikilu lweyi lwa ku hulusa. Ndanga ni kusehila." ⁴⁹ Tangwa diakulanga, muthu mukowu watudidi. Watumini fumu ya nzu ya yisambu, wakula eki: "Mwana eyi wa ndumbu wafwa. Wu yangisa oku Longi." ⁵⁰ Kashi Yesu wevidi, wa mu vutudila etshi: "Wivwa oku woma; kwikila kaka, wu ku huluka." ⁵¹ Kumanima, kiela wa tula kunzu, wa lekisa muthu kengila oku ni mweni, kaka Petulu, Yowani, Jaki, ni tata ni mama ya mwana. ⁵² Owu oshu akhedi kudila, ni kudi yangisa kikuma kia mwana. Kashi Yesu wakudidi etshi: "Nu dil'oku; kafidiku, wa langala." ⁵³ Kashi eni ayandjika ku mu seya, kikuma ejikanga etshi wudi wafwa. ⁵⁴ Kashi Yesu wakwatidi khoku dia mwana, wa mutambikidi mu ndaka ya ngolu etshi: "Mwana emi, tokama." ⁵⁵ Watokama, wazanguluka mu mbala yimoshi. Yesu wa waleza amuhu kima kia kudia. ⁵⁶ Tata ni mam'enji a yitukidi, kashi Yesu wa walejidi etshi nuta oku pandji kudi muthu moshu ama mahita.