¹ Kiela Yesu wa manisa mosu makhedi kwakula kudi athu akhedi ku mwivwa, wengididi ku Kapernahumi. ² Fumu mumoshi wa asuta wakhedi ni muhika mumoshi wazolanga hengi, mweni wakhedi mukhasi ni kutaba. ³ Kiela Fumu wa asuta wevwa tsangu jia Yesu, watumini a mambuta ma ayuda kudi mweni, mu ku mu bondila eji kuwuka muthu wendji wa kisalu. ⁴ Kia tudidi kudi Yesu, eni a mu bondididi, akula etshi: "Ayi wa lunga ku mu hangila kienekina, ⁵ kikuma mweni wazola thothu yetu, mweni wa tutungididi nzu ya yisambu." ⁶ Kienikioki he Yesu wendidi ndjila yimoshi ni eni. Kiela atula penapena ni nzu ya fumu wa asuta, watuma andoyi jiendji mu ku mu leza etshi: "Fumu, wudimwesa oku pashi, kikuma ami nishiku nia lunga mu ku kutambika ku nzu yemi. ⁷ Kienikioki ki nia ditadidi ami mweni, niamweni etshi nia lungidiku kwiza kudi ayi. ⁸ Kashi, akula ndaka yimoshi, muthu wemi wa kisalu akodi. Kikuma ami epi nidi ni kiyeka kudi asuta. Niakula kudi mumsohi etshi: 'Ndanga ' mweni wu kwenda, kudi mwekha etshi: 'Yiza,' wu kwiza. Kudi muthu wemi wa kisalu, Leka wuhangi kidi luzolu lweyi." ⁹ Yesu kievidi ndaka jienejina, wa yitukidi. Walumukini kudi hundji dia mu labanga, wakula etshi: "Nia nu leza, ata ku yiseledi nia mona oku kadi muthu wudi ni lukwikilu olu." ¹⁰ Kiedidi athu atumini avutuka kunzu yendji, eni endidi kuwana muthu wa kisalu wa kola. ¹¹ Kumanima ma matangwa, Yesu wendidi ku vidi dimoshi jina diodi Nayini, ni alonguki jiendji, ni hundji dia athu akhedi kwenda ni mweni. ¹² Kia tudidi pena pena ni kishu kia vidi, mweni wa mona athu akhedi azangula mvumbi ya mwana wa yala, mumoshi kaka wa mama wakhedi mufidi, ni hundji dia athu lawu akhedi kwenda nawu. ¹³ Kia mu mweni, Fumu wevidi khenda jingi, kikuma kia mweni. Wa mu leza etshi: "Wu dila oku." ¹⁴ He mweni wa kokulukidi, wakwata mukunzu wakhedi ni mvumbi. Athu akhedi kusenda mvumbi amakana. Mweni wakula etshi: "Ngunza yala, nienda nia ku leza, tokami." ¹⁵ Mvumbi wa shikimini, wa yandjika kwakula. Yesu wa muhana kudi mama endji. ¹⁶ Athu oshu evidi woma, ayandjikidi kuhwa Nzambi lukumu, ni kwakula etshi: " Mbikudi mujima wa wudika mu katshi ketu, Nzambi weza kutala athu jendji." ¹⁷ Tsangu eyi ya Yesu ya mwanginini mu Zude dioshu ni mu kizunga kioshu. ¹⁸ Alonguki a Yohani a mu tedidi mambu menama moshu. ¹⁹ He Yowani watambikidi mbadi mu katshi kowu, wa watuma endi kwihula Fumu etshi: "Ayi yuyu weza, ho tutadikidi mwekha?" ²⁰ Kia tudidi kudi Yesu, athu mwena awana akula, eni etshi: "Yowani Mbotika wa tutuma kudi ayi, twihudi, 'Yidi ayi yuyu weza, ho tutadikidi mwekha?'" ²¹ Kaka mu tangwa mwenedina, Yesu wa wukidi athu lawu, akhashi, akwa jipashi jia pila ni pila, ena pevi jia bola, ni apofu lawu atemunini. ²² Wawa vutudidi mvutu wa waleza etshi: "Ki nu ku vutuka enu, nu tedi Yowani mambu nwa mona, ni ma nwevwa. Apofu, amona, yikata ya zanguluka, ena bwashi a kola, yihulu yevwa, amvumbi atokama, atsukami evwa tsangu ya mboti. ²³ Kieshi kudi oyu wa leka kushia pika, kikuma kia yisalu yamemi." ²⁴ Tangwa dia vutukidi tupungu twa Yowani, Yesu wayandjika kwakudila Yowani kudi hundji: "Ekhi nwakhedi kwenda kutala mu tseki? Mwangu wakhedi kunikana ku fundji e? He ekhi nwendi kutala? Yala mu moshi wavwatidi miledi ya thalu e? ²⁵ Kashi awa enda kuvwata miledi ya mafeti ni kujinga lujingu lwawaha enda kijingila mu manzu m'afumu. ²⁶ He nani kamu nwendidi kutala e? Mbikudi e? Ee ami nienda niakula hitila mbikudi. ²⁷ Tala oyu mweni yuyu wa sonikinini etshi: "Tala, nia tumisa kapungu kemi athethikidi kwiza kuhangila ndjila." ²⁸ Nia nu leza, mu katshi ka awa oshu atetuka kudi mukhetu, kusiku ni muthu wahita Yowani. Kashi ku wulu dia Nzambi, muthu wa tsuka wa mu hita mweni." ²⁹ Kiela athu oshu ni Tulaki a mwivwa, akudidi eni etshi, Nzambi wudi masonga, eni akumbudidi mu kunona mbotika ya Yowani. ³⁰ Kashi Afadishi ni ambaku jia Ayuda, abeyidi ma wa hangikididi Nzambi, kikuma aleki kubotama kudi Yowani. ³¹ "Nikhi nia lunga kutesa athu a tangwa mwenedi? Niku wafwanikisa nikhi? ³² Edi afwanangana ni ana enda kusema mu mukhidi, ashikama mu fufuma, ni kuleza a doyi jiowu etshi: 'Etu twenda twa bula yishingu, enu kukina lo. Etu twa yimbanga mimbu mia malunga, enu ni kudila lo.' ³³ Kashi Yowani Mbotika wezidi, kadiang'oku mapa, kanwangang'oku vinu. Enu nwa muleza etshi: 'Wudi ni pevi ya bola.' ³⁴ Mwana muthu weza, wenda wadia ni kunwa, nwenda nwa muleza etshi: 'Tala, wudi mudi muthu wakata kudia ni kunwa, wudi futa dia tulaki ni athu a bola!' ³⁵ Kashi mayela ma Nzambi menda me jiangana kudi ana jienji." ³⁶ Tala mufadishi mumoshi wa mu tambikidi mu kudia nenji. He Yesu wengila munzu a mufadishi mwenoyuna, wa shikama wa yandjika kudia. ³⁷ Mukhetu mumoshi wa ha vidi wakhedi mwenedina, wakhedi kamu mukwa masumu, wejidi kwingila mumbala yimoshi kievidi etshi Yesu wakhedi mu nzi'a mufadishi. Wa nehini mulangi wa madiashi ma albatre. ³⁸ Wejidi wa makana ku mutanda wendji, penapena ni miendu mia Yesu, wa yandjikidi kwovwa miendu miendji, ni masanga, ni kukumuna, ni suki jiendji, ni ku yi fuwa, ni ku yi kwita madiashi. ³⁹ Kiela Mufadishi wa tambikidi Yesu wa mona kienekina, wa diakudila etshi: "Yivwa kamu muthu oyu wudi mbikudi, wela kwijiya nani edi mukhetu mwenoyu, wudi ku mukwatanga, wudi mukhetu wa bola. ⁴⁰ Yesu wathuthidi ndaka wa mu leza etshi: "Simon, nidi ni diambu dia ku kuleza." Mweni etshi: "Longi akula!" ⁴¹ Yesu wakula etshi: "Muthu mumoshi wakhedi ni athu mbadi a mukhedi ni fhuka. ⁴² Mumoshi khama yimoshi, mukowu makumi matanu. Kia lekidi kukuka kufuta fhuka yowu wa wa vidishididi owu mbadi. He mu katshi kowu mbadi, nani wudi ku mu zola hengi? ⁴³ Simoni wa mu vutudidi wakula etshi, nia banza oyuna wakhedi ni fhuka ya lawu. Yesu wa mulezidi etshi wa zenga mboti." ⁴⁴ Yesu walumukini kudi mukhetu wa leza Simon etshi: "Wa mona mukhetu oyu. Ami niengilanga mu nzieyi, ayi wovidingiku miendu miemi. Kashi mweni wa yovwa ni masanga mendji, wa kukhumuna ni suki jienji. ⁴⁵ Ayi wangu fuwidiku, kashi mweni yandjika kioki kiengilanga, ka hwididiku mu ku fuwa miendu miemi. ⁴⁶ Ayi wa washidiku mutwa wemi maji, kashi mweni wakwitidi madiashi mu miendu miemi. ⁴⁷ Kienikioki nia ku leza etshi, yivwa a mu vidishila kubola kwendji kwa lawu, kikuma mweni wa lombululanga luzolu lwa hitangana. Kashi oyu wenda kuvidishila ka ndambu, wenda kuzola ka ndambu." ⁴⁸ Kiela wa mu leza etshi: "Kubola kwehi kwoshu nia kuvidishila naku." ⁴⁹ Eni akhedi kudia nawu, akwangana etshi: "Nani edi muthu oyu mu kumuvidisila masumu?" ⁵⁰ Kashi Yesu walejidi mukhetu etshi: "Lukwikilu lwehi lwa ku hulusa, ndanga ni ngemba."