¹ Yesu wakhedi kuhita mu katsi kayilanga mu lutsiku lwa posa. Alonguki jienji akhedi kuhela kheni jia ble ni ku ji nika kikuma eni adi. ² Kashi ndambu yekha ya afidishi ejidi ku muleza etsi: "Kikuma kiakhi nudi kuhangilanga mambu medi kijila mu lutshiku lwa posa?" ³ Yesu wa wavutudila etshi: "Enu kandiku nutanga mambu mahangidi Davidi tangwa dievidi nzala ni mweni ni athu jienji? ⁴ Wengididi mu nzu ya Nzambi, wanona mapa mahanini makabu, wadia wahwa athu jienji. Mapa menamana makhedi makijila muthu mwekha mu kumadia, kaka a nganga Nzambi." ⁵ Mweni wa walejidi etshi: "Mwana wa muthu wudi fumu wa lutsiku lwa posa." ⁶ Lutsiku lwekha lwa posa mweni wendidi kwingila mu nzu ya yisambu ni kulonga athu. Kwakhedi momu muthu mumoshi kokhu dienji dia kitata dakhedi ni kifu. ⁷ Amalongi ajitsiku ni afidishi akhedi kutala Yesu ni mayela mabola, yivwa walunga ku mu wuka mu lutsiku lwa posa. Kikuma eni aswakadi ku mufunda etsi, wahanga kima kimoshi kiabola. ⁸ Kashi mweni wejikanga mabanza mowu, kieni kioki alejidi muthu wakhedi ni kifu mu kokhu etshi: "Zanguluka, wiji kumakana akatshi ka athu oshu." Muthu mwenoyuna, wazangulukidi, waya kumakana henahana. ⁹ Yesu wa walejidi etshi: "Nia zola kwijiya, kudi pimbu mu kuhanga mambu mawaha to ma bola, ho kubidisa moyi?" ¹⁰ Yidi kikuma kia kuhulusa moyi wa muthu to ku wubidisa? Wahitisa mesu ni kuwatala owuoshu, momu mwakhedidi, wakula kudi muthu mweno oyuna etshi: "Tandulula khokhu dieyi." Mweni waditandulula, khoku dionunuka. ¹¹ Eni azala ni khabu, ayanjika kushia pika, ni kuhenga pila ya kukwata Yesu. ¹² Mu tangwa mwenedina kaka Yesu wanini ku mundonda waya kusamba Nzambi. Wakhedi koku pipa yoshu. ¹³ Kiela kuma kwakhia watambika alonguki jienji, wa sola kumi ni mbadi wa wahwa jina dia athumwa. ¹⁴ Majina ma athumwa mwena wana amekhi: Simoni wamuhwedi jina dia Petulu ni a pangi enji Andela, Yakobi, Yoani, Fidipa, Batolomayi, ¹⁵ Matayi, Toma, Yakobi mwana wa Alfe, Simoni, oyu wakhedi kutambika Zeloti, ¹⁶ Yudashi, mwana wa Yakobi, ni Yuda yishikadioti, wa mu sumbisidi. ¹⁷ Yesu wakatuka ku mundonda ni alonguki jienji weza kukulumuka, weza kumakana homa hakhedi honunuka. Hunji dia alonguki lawu akhedi hohu ni ndambu ya athu ekha akhedi akwa Zude, akwa Yeluselemi ni akwa membu mekha ma Tire ni Sidon. ¹⁸ Akhedi kwiza ku mwivwa ni kuhenga awawuki mu makhashi makhedi namu. ¹⁹ Awana akhedi ku niokwama ku ji pevi jia bola akhedi kuwawuka. Hunji dia athu dioshu diakhedi kuzola kaka ku mukwata ku mwila kikuma ngolu jiakhedi kuwudika kudi mweni, jiakhedi kuwa wuka owuoshu. ²⁰ Kiela mweni watala alonguki jienji Yesu wa waleza etshi: "Kieshi kudi enu nudi atshukami, kikuma kifumu kia Nzambi kidi kienenu. ²¹ Kieshi kudi enu nudi ni nzala, kikimweni nu kukhuta. Kieshi kudi enu nudi kudilanga, kikuma nwaka bula kuseya. ²² Kieshi kudi enu yivwa athu enda anushia kimbeni, ni kuleka mu kukhala nawu, ni ku nukaya, ni ku nutukana, kuzola kwivwa jina dienu lo, kikuma kia mwana wa muthu. ²³ Khalenu ni kieshi kingi seyilenu kikuma matapishi menu medi majima ku hulu. Kaka Kienikioki a khakha jiowu akhedi kuniokula a mbikudi. ²⁴ Kashi kiadi kingi kudi enu a mvwama, kikuma nwanona kadi matapishi menu. ²⁵ Kiadi kudi enu nudi kadi nwakuta, kikuma nwa kevwa nzala kumesu. Kiadi kudi enu nudi kuseyanga nwa kakhala ni mafwa, nwa kabula kudila tangwa dioshu. ²⁶ Enu nudi mupashi yivwa enda anu shikumuna etsi nudi athu a mboti, kikuma akhakha jienu akhedi kuhanga kienekina kudi a mbikudi a wukhubidi. ²⁷ Kashi ami nienda nia nuleza, enu kungwivwanga lo, zolangenu a mbeni jienu, hangenu mambu ma pimbu kudi athu aku lekanga ku nuzola. ²⁸ Wa hangilangenu mambu ma pimbu, ata eni enda anu hanga kubola. Sambilangenu kikuma kia athu aku nu mwesanga pashi. ²⁹ Yivwa muthu wa kuhwa mbata mu tafu dimoshi, wa muhwa edina dikowu. Yivwa muthu wa kaba Kazaku keyi, mushishidi tangwa anoni epi shimisi dieyi diasala. ³⁰ Kapila koshu muthu wa kulomba koshu kima kiwudi naki. Yivwa muthu wa kutambula koshu kima kiwudi naki, wu mu lomboku akuvutudidi. ³¹ Koshu mambu nwa zola akwenu ha hangi kudi enu, enu wa hangilenu namu. ³² Yivwa nwenda nwa zola kaka athu enda ku nu zola, kia matapishi nwa kanona? Kikuma athu enda kuhanga kubola, ni eni enda kuzolangana owumweni. ³³ Yivwa nwenda nwahanga mambu ma pimbu kudi athu enda ku nu hanga mambu ma pimbu, kia matapishi nwa kanona? Kikuma athu abola epi enda kuhanga kienekina. ³⁴ Yivwa nwenda kutefisa kaka athu anwenda kushila mutshima, etshi aka nu vutudila, kia matapishi nwa kanona? kikuma athu abola epi enda kutefisa kaka athu abola, ni kumakinina awa futi fhuka pila yimoshi mudi enu. ³⁵ Kashi zolangenu ambeni jienu. Wa hangilangenu mambu ma pimbu. Tefwangenu athu fwalanga konda kubokuta, ata eni kanu futidiku fhuka. kikuma matapishi menu medi majima. Enu nwa kakhala ana jia Nzambi udi ku hulu. kikuma enjimweni wudi wa pimbu, kudi athu enda kuleka ku muhwa matondu ni kudi athu edi abola. ³⁶ Nu feti kwivilanga athu ekha khenda mudi tat'enu wudi mukwa khenda. ³⁷ Nu sambisanga oku akwenu, enu akaleki ku nu sambisa. Nu bedisanga oku akwenu, enu epi akaleki ku nu bedisa. Lolulangenu akwenu, enu epi aka nu lolula. ³⁸ Kapilangenu athu ekha. Enu epi akubula ku nu kapila mu kitezu kia mboti, akubula ku nushila yima yingi mu masaki menu, yazala ya hita kitezu, ya kuniema. Kikuma a kabula ku nu teshila ni kitesilu eki nwenda ku teshila akwenu ekha. ³⁹ Mweni wa watedidi epi kingana kimoshi. "Pofu kalungidiku kutwadisa pofu. Yivwa lo, owu mbadi akwenda kubwa mu buku. ⁴⁰ Mulonguki kafwaniniku kuhita longi dienji. Kashi koshu mulonguki walaba malongi mboti mboti, walunga kwikhina mudi longi dienji. ⁴¹ Kikuma kiakhi ayi wenda kuzola kutala kaka kiswaswa kidi mu disu dia mukwenu, kashi wu kumonanga oku kisweledi kidi mu disu dieyi? ⁴² Kiehi walunga kuleza mukwenu etsi, yiza ni kukatudi kisweledi kidi mu disu dieyi, yivwa wushiku kumonga kisweledi kidi mu dishu diayi mweni? Wudi mukhubidi! Katula thethi kisweledi kidi mu disu dieyi kumanima wamba kumona pila ya kukatula kidi mu disu dia mukwenu. ⁴³ Kwakhala oku ni mutondu wa pimbu wenda kubuta yibundu ya bola, to mutondu wa bola wenda kubuta yibundu ya pimbu. ⁴⁴ Koshu mutondu wenda kwijiangana ku yibundu yowu. Mutondu wudi ndema ndema wu kubutanga oku yibundu ya fige to ya vinu. ⁴⁵ Muthu wa pimbu wudi ni mutshima wa pimbu, wenda kuwudisa mambu ma pimbu. Oyu wa bola wudi ni mutshima wa bola, wenda kuwudisa mambu ma bola. Kikuma mambu medi mazala ku mutshima meni momu menda kuwudika mu kanu. ⁴⁶ Ekhi nudi kutambikilanga etshi: "Fumu, Fumu," enu athu kuzola kuhanga ma nidi kunu lezanga lo? ⁴⁷ Koshu muthu weza kudi ami, wevwa mambu ma nidi kwakulanga, wa mahangila, ami ni ku nuleza wafwana nani. ⁴⁸ Wafwana muthu oyuna wakhedi kutunga nzu, wa shimini muzwila hulaha, washia fundatio awulu dia mayala. Tangwa dia nokini mvula, ata meya mazadidi, madituta kunzu, yabwidiku. kikuma wa yitungidi pimbu. Kashi, oyu wevwa ndaka yemi konda kuyihangila, wudi mudi muthu watunga nzu a wulu dia fufuma konda fundasio. Meya ma mvula mazala, madituta kunzu, nzu yikubwa mvimba. ⁴⁹ Kashi oyu wevwa ndaka yemi konda kuhihangila, wudi mudi muthu watunga nzu a wulu dia fufuma ya konda fundatio. kiela meya mazala, ma dibula ku nzu, mu mbala yimoshi nzu yamba kubwa, ya fwa kimakulu."