¹ Mweni watambikidi eni oshu kumi ni mbadi, wa wahwa kiyeka ni ngolu jia kukaya pevi jia bola, ni kuwuka makhashi. ² Wa watumini mu kulonga kimfumu kia Nzambi ni mu kuwuka akhashi. ³ Wa walejidi etshi: "Nu senda oku ata kima kimoshi mu jietulu, koka lo, waba lo, kima kia kudia lo, mbongu lo, mashimishi madi lo. ⁴ Koshu nzu yinwa kengila, khalenu momu tii koku ku nwa kendila. ⁵ Awana aka leka ku nu yamba, tangwa dia kuwudika, pupulenu miendu mienu mu ku waleza etshi ahanga kubola." ⁶ He eni endidi mu membu, ni kulonga tsangu ya mboti, ni kuwuka akhashi mwosu mwahitanga. ⁷ Tala he Fumu Herode kievidi moshu mahitanga, wekhinini kisakasaka, kikuma athu ekha akulanga etshi, Yowani Mbotika wafutumuka, ⁸ ekha etshi Eliya wa weza epi, ekha kama etshi, muthu mumoshi mu katshi ka ambikudi akulu wafutumuka. ⁹ Erode wakudidi etshi: " Ami nia betudidi mutwa wa Yowani. Nani epi yoyu wu ni kwivwanga ku tsangu? Henihohu Erode wakhedi kuhenga pila ya kijiya Yesu. ¹⁰ Tangwa diejidi kuvutuka athu atumini, eni amulejidi mambu moshu mahangidi. Wa wanonini waya kaka ni eni ku dimbu dia Bethsayida. ¹¹ Kashi hundji dia athu kievidi kienekina dia mu laba. Wa wa yambidi, wayandjika kuwa longa mambu ma tadila kifumu kia Nzambi, ni kuwuka athu awana akhedi ni makhashi. ¹² Kingweji ki kiayanjikidi kubwa, alonguki kumi ni mbadi endidi kudi mweni a muleza etshi: "Tusula hunji dia athu endi mu membu ma penapena ni kudi athu enda kuhanga yilanga, endi kuhenga yima ya kudia, ni homa ha kulangala kikuma tudi mu tseki." ¹³ Kashi wa walejidi etshi: "Enu mweni wahwenu yima ya kudia."Eni etshi: " Tudi kaka ni mapa matanu ni hashi mbadi, akula etshi twendi kusumba yima ya kudia kikuma kiowu oshu." ¹⁴ Akhedi kitezu kia amala mafunda matanu(5000). Wa lejidi alonguki jienji etshi: "Wa shikimisenu hashi mu yibudi makumi matanu." ¹⁵ A hangidi kienekina, athu oshu ashikama. ¹⁶ Wanonini mapa matanu ni ashi mbadi, wa tala ku wulu, wa wa sakumuna, wa ma vuka yitshini yitshini, kumanima wa mahana kudi alonguki mu ku kapila Hunji dia athu. ¹⁷ Eni oshu adidi, akuta. Atongunini yitshini eyina ya sadidi azadisa yinda kumi ni yadi. ¹⁸ Kiakhedi kusambila enjimweni, alonguki ejidi ku muwana, wa wehula etshi: "Ekhi athu edi kwakulanga kikuma kia memi?" ¹⁹ Eni avutudidi etshi: " Yowani Mbotika. Kashi athu ekha etshi Eliya, ekha kama etshi mumoshi mu katshi ka Ambikudi a tangwa dikulu wafutumuka." ²⁰ Mweni wahwela etshi: "Kashi enu kama ekhi nwakula, nidi nani ami? Petulu wa vutdidi etshi: "Khidishitu wakutukidi kudi Nzambi." ²¹ Kashi mweni wa walekishidi kaleza oku ata muthu, ²² etshi: "Mwana wa Muthu wa kamona pashi jingi, mu mambu mengi aka muleka kudi a mambuta Dibundu ni kudi a mambuta ma a Nganga Nzambi, ni kudi a malongi ma tshiku. Aka mujiya, mu lutshiku lwa kisatu wa ka tokama mu lufwa." ²³ Wa walejidi owu oshu etshi: "Yivwa muthu wa zola kulaba ami, aleki kudibanjila enjimweni, azangula kulunji dienji koshu lutshiku eji kungu laba. ²⁴ Koshu wazola kukeba moyi wenji enjimweni, waka wu bidisa. Oyuna wazola kuwu bidisa kikuma kia memi, waka wu hulusa. ²⁵ Ekhi ya hitangana kuhwaha, kukhala ni kimvwama lawu ashi, to kubebisa moyi wenjimweni? ²⁶ Mwoshu wevwa soni kikuma kia memi ni kikuma kia ndaka yemi, Mwana wa muthu waka mwivwa soni tangwa dia keza mu khembu yenji, ni khembu ya Tata, ni ya awanjio. ²⁷ Kashi nia nuleza ni kiedika kioshu etshi, kudi ni athu ekha mu katshi kenu nudi henaha, akafwa oku kadi tii koku kwa kamona kifumu kia Nzambi ni mesu mowu." ²⁸ Matshiku nana mahitidi kumanima ma kwakula ndaka mweneyina. Yesu wa nonini Petulu, Yowani ni Jakin, waya nawu ku mundonda mukwenda kusambila. ²⁹ Tangwa diakhedi kusambila, mbunzu yenji ya lumukini, miledi yenji yekhinini yitoka kamu ni kukedia. ³⁰ Mumbala yimoshi, eni amweni athu mbadi akhedi kusolula ni mweni, Moshi ni Eliya, ³¹ amwekinini ni khembu ya ku wulu. Akhedi kusolula nenji pila ya kenda kufwa ku Yeluselemi. ³² Mu tangwa dienedina, Petulu ni awana akhedi nawu abwidi kutulu. Kashi kiela atokama, amweni khembu yenji ni athu mbadi akhedi amakana ni mweni. ³³ Mejidi ku mwekana etshi, kia kapangana ni Yesu, Petulu wa muleza etshi: "Longi, medi mboti kudi etu mukukhala henaha. Tu kutunga manzu masatu ma kapo. Yimoshi yayeyi, yikowu ya Moshi, yekha ya Eliya. Eni kakhediku kwijiya mambu makhedi kwakula. ³⁴ He kiakhedi kwakula kienekina, tuta dimoshi diezidi kuwawinda, eni evidi woma kikuma akhedi akuwinda ku matuta. ³⁵ Ndaka yimoshi ya wudikidi mu tuta yakula etshi: "Oyu wudi mwana wamemi, wunia sola. Nu feti kumwivilanga." ³⁶ Kiela ndaka ya dibata, Yesu wasadidi enjimweni. Akhedi adibata kuleza ata muthu lo mambu mamweni. ³⁷ Ku manima ma lutshiku lumoshi, tangwa diakhedi kukulumuka ku mundonda, hunji dia athu lawu diejidi kuwa wanina. ³⁸ Muthu mumoshi mu katshi ka hunji wakudidi kiangolu mweni etshi: "Longi nia kubondila wutadi mwana emi mumoshi kaka wu nidi nenji. ³⁹ Mu mbala yimoshi, pevi yenda ku mu kwata yamubwisa, wa yanjika ku ngangumuka kiangolu, ni kukonia, ni kuwudisa mafulufulu kukanu. Pevi eyi yenda kuwudika mu pashi ni ku munikisa kiangolu. ⁴⁰ Nia bondididi a longuki jieyi mu ku yiwudisa, kashi eni ka kukidiku." ⁴¹ Yesu wa vutudidi etshi: "Nudi kikanda kia athu nwa konda lukwikilu! Nudi nwa bola! Matangwa mangahi ni kukhala ni enu, mu kunu kashila mutshima? ⁴² Neha mwana eyi aha." Mwana kiakhedi kupusana, pevi ya bola ya mubwisa hashi, ya munikisa kiangolu. Kashi Yesu wa nganina pevi ya bola, wawuka mwana wa yala wa muhana kudi tata enji. ⁴³ Eni osu ayitukidi mu kumona ngolu jia Nzambi. Kiakhedi kuyituka mu mambu menamana mahangidi Yesu, mweni wa lejidi alonguki jienji etshi: ⁴⁴ "Leka ndaka mweneyi yingidi mu matu menu, kikuma mwana wa muthu aka muhana ku mokhu m 'ambeni." ⁴⁵ Kashi enu kabakishidiku ekhi akhedi kuzola kwakula. Makhedi kisweki kudi eni pila ya kubakisa lo. Akhedi ni woma muku muhula kikuma kia mambu menamana. ⁴⁶ He pika jiengididi mu katshi kowu mu kwijika nani wa wahita. ⁴⁷ Kashi Yesu, wejikidi ngindu jiakhedi naji ku mitshima miowu, wanonini mwana mubibi, wa mushia mukhulu yenji. ⁴⁸ Wa waleza etshi: "Yivwa muthu wayamba mwana mudi oyu mu jina di'emi, wangu yamba ami. Mwosu wangu yamba ami, wa yamba oyuna wathumini. Kikuma oyu wahitangana kukeha wahita akowu mu kimbuta." ⁴⁹ Yowani wa vutudidi etshi: "Longi, twa mweni muthu wakhedi kuwudisha pevi jia bola mu jina diehi, etu twa mulekishidi kikuma kakhediku kutulaba etu." ⁵⁰ Kashi Yesu wa mulejidi etshi: "Nu mukasa oku njila, yivwa muthu keshiku mbeni wenu wudi ni enu dingulu dimoshi." ⁵¹ Kiela Matshiku makwenda ku hulu mafinama, wazengidi mu kwenda ku Yeluselemi. ⁵² Watuminu angenji ha mesu, endi kwingila ku dimbu dimoshi dia Samariya, mu ku muhangikila fundu. ⁵³ Kashi eni alekidi kikuma wakhedi mu kuhita mukwenda ku Yeluselemi. ⁵⁴ Jaki ni Yowani kiamweni kienekina, eni etshi: "Fumu wazola tuhani njila kudi thuya, tukatuki kuhulu twiji kuwajiya?" ⁵⁵ Kashi mweni walumukini kudi eni wa wanganina. ⁵⁶ Akatukidi henahana aya dimbu diekha. ⁵⁷ Kiakhedi kwenda mu njila, muthu mumoshi wa muleza etshi: "Ami nia kakulaba koshu ku wakabula kwenda." ⁵⁸ Yesu wa mu vutudidi etshi: "Mikiengi midi ni mabuku, tujila ku hulu tudi ni mazamba, kashi Mwana wa muthu keshiku ni homa ha kuzeza mutwa." ⁵⁹ Walejidi epi muthu mwekha etshi: "Yiza wungu labi." Kashi mweni etshi: "Fumu, nguhu njila thethi niendi kujika tata." ⁶⁰ Kashi Yesu wa mulejidi etshi: "Leka amvumbi adijiki hohumweni, kashi ayi, ndanga ni kulonga mu kifutshi kiosu kifumu kia Nzambi." ⁶¹ Muthu mwekha wa muleza etshi: "Ami ni kukulaba ayi Fumu. Kashi thethi nguhu njila niendi kuhwa athu edi kunzu yemi mboti ya tshuka." ⁶² Kashi Yesu wa mu lejidi etshi muthu wa yanjika kuhanga kisalu, ni kutala epi kumanima, kalungidiku kahangila Nzambi."