¹ Kiela Yesu, wazala ni Pevi ya Longu, wa katuka ku meya ma Yoludani, he Pevi ya mu senda ku mutemu mwazala fufuma, ² kwenikwoku endidi kumumeka kudi satana. Yilumbu makumi ni mawana, ka diangangoku yilumbu yene yina. Tangwa dia hita yilumbu yene yina, wevidi nzala. ³ Satana wa muleza etshi: " Ivwa wudi mwana wa Nzambi, leza yala edi dikhini dipa." ⁴ Yesu wamu vutudidi etshi: "Medi masonama etshi: 'Muthu kendoku kujingila kasu dipa.'" ⁵ Tangwedi he Satana wa mushia mutshima mu wulu, mu mbala yimoshi sa, wa mulejidi yifumu yosu ya hashi. ⁶ Satana wa muleza etshi : "Nikukuhwa kiyeka kiosu ni lukumu lwosu, kikuma ami nanona Kadi kiyeka eki, nia lunga kukihana kudi mwosu wu nia zola. ⁷ Kienikioki, ivwa wangu fukimina, ni kukuhwa kiyeka kioshu. ⁸ Kashi Yesu wamu vutudila etshi: "Medi ma kusonika etshi, 'Ayi wufeti kusambila Mfumu Nzambi, wudi Nzambi weyi. Kaka mweni kasu ufeti ku muhangila.'" ⁹ Kumanima Satana wa senda Yesu ku Yeluselemi, wamushia ha yangi dia nzu ya Nzambi ya Ayuda, wa muleza etshi: "Ivwa ayi wudi mwana wa Nzambi, Leka wu dikongi hashi. ¹⁰ Kikuma asokina etshi: 'N zambi wa katumisa awanjo muku kukeba.' ¹¹ Eh aka kwaka ha mokhu mowu, mu pila etshi mwendu weyi wu totukoku ku yala.'" ¹² Yesu wamu vutudidi etshi: "Medi makusonika etshi: 'Wa lungidiku kumeka Fumu Nzambi weyi.'" ¹³ Tangwa dia manisa Satana mu kuphaka, Yesu wendidi kitamina ni mweni ti kumbala yeka. ¹⁴ Kumanima Yesu wa vutukidi ku Galile, wa zala ni ngolu jia Pevi, tsangu jienji jia mwanginini kizunga kiosu. ¹⁵ Wa yanjikidi kulonga mu jinzu jiowu jia yisambu ya Ayuda. Athu osu akhedi ku muhwa lukumu. ¹⁶ Mweni wa katukidi ku Nazareti, dimbu dia kudididi. Mudi kiakhedi kifu kiowu, wengididi mu nzu ya yisambu mu kilumbu kia posa. Wa zanguluka mu kutanga mu ndaka ya ngolu. ¹⁷ Amu hwedi mukanda wa mbikudi Yesaya. Wanzulula mukanda he wa mona homa akhedi asonika: ¹⁸ Pevi ya fumu yidi kudi ami, kikuma wa ngu sodidi mu ku lombulula tsangu ya pimbu kudi a thsukami. Wangu tumini pu keza athu edi mu boloku etshi akuwa tusula, apofu aka mona, ni muku kangula athu enda kumwesa pashi. ¹⁹ Ni muku lombulula mvula yimoshi ya khenda jia Nzambi." ²⁰ kumanima wa kashidi mukanda, wa vutula kudi asadi, washikama. Owu osu mu nzu ya yisambu akhedi a mushanginina. ²¹ Mweni wayanjikidi ku waleza etshi: "Lelu dienedi mambu ama ma nwevwa ma lungisama kioki ki nwa mevwa mu matu menu." ²² Owu osu akhedi athemu mu mambu makudidi, ni kuyituka mu mambu ma pimbu makhedi kuwudika mu kanu dienji, ni kwakula etshi: "Keshiku mweni mwana wa Yosefi?" ²³ He wa waleza etshi: "Kiedika nidi ku nu lezanga kingana eki : 'Munganga, diwuki ayi mweni. Mambu mosu ma twevidi, ma wa hangidi ku Capernaum, mahangi kwimbu dieyi.'" ²⁴ Kashi mweni wa walezidi etshi: "Kiedika niakula, kushiku ni mbikudi enda kukumbula kwimbu dienji. ²⁵ Kashi kiedika nidi ku nulezanga, ku Yiseledi kwakhedi afidi lawu mu tangwa dia Eliya, tangwa dia kangidi wulu mvula jisatu ni angonda asambenu, kwakhedi ni kalamba ka nzala mu tshi yosu. ²⁶ Kashi Eliya kamu tuminiku kudi athu osu, kaka kudi mufidi wa jinganga ku Sarepta ku Sidoni. ²⁷ Kwakhedi epi ni akwa makhashi ma bwashi lawu ku Yiseledi mu tangwa dia mbikudi Eliya, mukatshi kowu osu ata muthu ka kodidiku kaka Namani mukwa Syria." ²⁸ Tangwa dievidi mambu menamana, owu osu akhedi mu nzu ya yisambu evidi khabu. ²⁹ Azangulukidi, amu kayidi hanji dia dimbu, amu sendidi ku tsongi ya mundonda kwa tungidi lupangu lwa dimbu, endidi ku musweka kweno kuna. ³⁰ Kashi mweni wa hitidi mu katshi kowu wendidi ndambu yekha. ³¹ Wa kulumukini ku Kapernaum, dimbu dia Galilea, wa yanjikidi ku walonga mambu ma tadila kilumbu kia posa. ³² Akhedi ku yituka malongi menji, kikuma mweni wakulanga ni kikesa mudi fumu. ³³ Kwakhedi ni muthu mumoshi mu nzu ya yisambu wakhedi ni pevi ya bola, wa tatudidi mu ndaka ya ngolu etshi: ³⁴ "Ah khia mambu tudi namu niayi, Yesu waku Nazareti? Ayi wezidi mu ku tujiya? Ami niejiya etshi ayi wudi muthu wa vedila wa Nzambi!" ³⁵ Yesu wa nganina pevi ya bola, wakula etshi: "Dibati! Wudika kudi muthu oyu!" Tangwa edi pevi ya bola ya bwisa muthu mweni ashi, ya wudikidi, konda ku muhanga kubola. ³⁶ Eni osu ayitukidi, he eni ayanjika kwakwanga owumweni. Eni etshi: "Khia mambu menama? Mweni wenda wakula ni kiyeka ni ngolu, pevi jia bola jenda jia wudika." ³⁷ Kieni kioki tsangu jia Yesu jia mwanginini lukalu lweno luna ni mu kinjunga kiosu. ³⁸ Yesu Kia wudikidi mu nzu ya yisambu, wendidi kwingila mu nzu ya Simoni. Wa wanini mahenda ma Simoni wakhedi ni makhasi ma ngolu, amu bondididi mu kuhanga kima kimoshi kikuma kia mweni. ³⁹ Wa bukama kudi mweni waleza makhashi muku wudika, makhashi ma wudikidi. Mu mbala yimoshi kaka, wa zanguluka wekhina kuwa hangila. ⁴⁰ Kingweji ki kiabwidi, athu akhedi ku nehina Yesu athu akhedi ni makhashi ma mutshindu ni mutshindu. Wakhedi kushia kosu muthu mokhu ni kuwa wuka. ⁴¹ Mu katshi kowu pevi jia bola epi jia wudikanga ni kwakulanga kiangolu etshi: "Ayi wudi mwana wa Nzambi!" Yesu wa nganinanga pevi jia bola ka wa hwanganga oku njila mu kwakula, kikuma abakisanga etshi wakhedi Khidishitu. ⁴² Kuma ki kwakhiedi, wa wudikidi, wendidi kuma kumoshi kwa kingenga. Lawu dia athu kia mu henganga, endidi homa hakhedi. Azodidi etshi amu lekishi ka khaloku kwalaha nieni. ⁴³ Kashi wa walezidi etshi: "Nifeti ku lombulula epi tsangu jia kifumu kia Nzambi mu membu mekha, kikuma kia kienekina angu tumini henaha." ⁴⁴ Kumanima wakhedi kaka kulonga mu nzu ya yisambu kudi Ayuda osu.