¹ Ndatuba vi-a-vi ne dzin e Kristu, epa ndjim ve, etura eme elapea ntiegn djwi na Mpeve Santu eli ya me: ² Ndayug ngy entsign, ndi na ntantu n'etura eme ntangu enkum. ³ Djwi ndeang wuo ngii na nkwuu, nam mpi na Kristu djwi na ngagn atwunga me, vear okwo ome ne Djung, ⁴ wo vear ali aman israel, wo vear ali Nzeam amavey kamsi aman ande, wali na nkembo, amikie alien n'da wo, na nsiku i Moise, oshin osama wo Nzeam, na nsilulu. ⁵ Mpi wa patriachi wo atsin atea e Kristu, nde wur eli Nzeam ne dzug i vim ankum, avey lokumu e mvwe na mvwe. Amen. ⁶ Epa eling ntuba wuwun nsilulu i Nzeam ikakira ve. Epa wur enkum eli n'israel ali mon israel ve, ata wali n'okwo Abrama epa wa nkum wali aman ande ve, kansi wamifugn wuwun : ne kati e Isaaka, enkean yie apwe wo ne dzin iyie. ⁸ Eli ntuba wuwun, aman amiwur wo ne djung epa wali aman a Nzeam ve, kansi eli aman a nsilulu wog anagn wali aman okwo e Abrama. ⁹ Yenagni otuba e nsilulu: Ko ne peang ene ayayiame, ye mpi Sara ayawur nde mon opeam. ¹⁰ Epaka kowog enagn ve, ne mbiy wo Rebeka avey nde djim i mon nde opeam Isaaka eli ndundu su. ¹¹ Djwi ayiwo watowur ata aman ve, watokii n'ipwo ni wuo ve, djwi mabongisi e Nzeam ekiri oshin omison nde, epa djwi na etshia ve kansi djwi na luzolo e wur emivie. ¹² Akabiwo Rebeka wuwun ; "Nsom eteang ayayia nde mfumi e okwom nde, ¹³ a leang me Yakob mpi atun me Ezau." ¹⁴ Nge fituba su ? Nge Nzeam ali na ontsiey? Kaku ata fioti ve. ¹⁵ Djwi atubi nde nda Moise ndenden ayayiame na ngy e wur eyayiame me na ngy ende, ayayiame na mawa e nsarisa ya wur eyayiame na mawa e nsarisa, ¹⁶ enagn epilir luzolo e wur eleang ve, ata luzolo e wur ekim ve, kansi na luzolo e Nzeam eyug ngy. ¹⁷ Djwi n 'enkeane e santu emifuy wo, atubi wo wa falaon wuwun: Awong me vi ayia bana ntama djwi wayen biu e me ye mpi dzin i me epagn buu opfugn . ¹⁸ wog enagn nzeam atsa nde nzug ngy na wur eleang nde ,mpi atshung etura e wur eleang nde. ¹⁹ Asiyueyie yiyen : Djwi na nge Nzeam a te ngnianga diaka ? Nagn esikug na kie ote biu ne luzolu e Nzeam? ²⁰ Oh wur ene ! Yie ko nagn etsug esiy ya Nzeam ? Iwung ikiewo na buu e mpieme asikug nde ntuba nda wur okie ndenden: Djwi na nge eminkie yie oshin one ? ²¹ Wur ekie iwung apa nkum e buu e mpieme,djwi na nkie iwung okina mpi iwung e sadila nde nshuu inkum? ²² Nge sikug su ntuba yug Nzeam, djwi na ngiegne nkier inde, na ngiegne mpi biu ende awundenkung, awung apea nkier emikie djwi wavili othsuag ? ²³ Nge situba su mpi yug akie nde ngean djwi na ngiegne otsun o nkembo nde n'awung a ngy, emiwong nde djwi na nkembo ende ? ²⁴ Nge situba su diaka yug akii nde ene djwi na su, amitevie epa ko ne kati e wa Yuda ve , kansi mpi ne kati empaagn? ²⁵ Oshin omituba nde n'onkeana e ngunza Osea ndenden: "Vear akayiaka vear ame ve, ayavieme vear a me, mpi onkear ekaleangaka me ve, ayovieme onkear eleang me entsign. ²⁶ N'endii eyakabikiwo wuwun epa olagni vear a Nzeam ve, ayavie wo aman a Nzeam e luzingu. ²⁷ Yisaya, nde ko mpi s'adzaminde djwi na Israel ndenden: "Ntangu eyayia aman Israel watikum oluy kamsi zelo i nzey, ko vear itaang eyasavug; ²⁸ ognang Nkum ayakukisa nde otuba o nde enkum eveang-eveang ne buu. ²⁹ Ko n'oshin oyitubi Yisaya nteang-nteang ndenden: Yu nkum ayer-nkuu akwon tepea ndwong aman ne mbiy esu ve, anayia su oshin omog na Sodomo ti Gomori. ³⁰ Nge eyafitubasu? Empaagn ekalingaka lunungu, wamivea lunungu, lunungu eyim ne lukwikilu. ³¹ Kansi Israel eyilingike nsiku etsampea lunungu, akakug na mvea wog ve. ³² Djwi na nge? Djwi Israel akalingaka wog na lukwikilu ve, kansi djwi na etshia ewo. Wamita n'ibagu itari, s'amilog wo. ³³ Oshin oyifugn wo n'enkeana wuwun: "Yenagni, ne Siona, ntitsug itari isilogaka vear n'ibagu, ti iwe iyatwaka wo vear. Wur eyadjir ya nde apayayen nsogn ve."