¹ Atwung, opijiagni ve gnugnun, (nda ntuba na vear ajia wa nsiku), wa nsiku eli n'ekub ne dzug i wur ntangu enkum eli nde ne luzingu? ² Onkear ivea amikama nda wum nde ne wa nsiku ntangu eli wum nde ali ne luzingu;yug wum nde atiwa, atipwe ne nsiku ivea. ³ Ntangu eli wum nde ali ne luzingu, yug atikum wear e wur emuu, atikie itaayi. Kansi yug wum atiwa ,atipwe ne nsiku, kokog ata atikum wear e wur emuu, kaku diaka itaayi ve. ⁴ Atwung, na gnu mpi awignu ne djung Krisru djwi na wa nsiku djwi okumagni ya wur emuu, ya wur eyifutumuki ne kati e bafwa djwi siwur atub awuo djwi na Nzeam. ⁵ Oniang ntangu eyikisu ne kimpika e djung, wa mpwyi ipwo e masumu akiakawo n'ilim su ne dzug nsiku i Moise s'awurikiwo ewa. ⁶ Kansi opeane, eminam su na wa nsiku i Moise, ntangu emiwasu ne ngie e nsiku inagn eyitekirike, djwi na nsadila na Mpeve e mpa kansi epa n'enkeana emignwign . ⁷ Nge sifituba su ? Nge nsiku n'oshin eliwo nsiku eli disumu? Kaku ata fioti ve. Kansi eyi nsiku ekwon ngya ve , mpina kieka disumu ve. Kansi me , mikie masumu ko djwi na nsiku. Yug nsiku ekwon ntuba wuwun oyaleang vim e wur ve, me ko mpinaleangaka vim e wur ve. ⁸ Mbiy disumu eyim ne nsiku, samiwur wo ya me wa mpuy eshin n'eshin. Djwi yug nsiku kaku ve, disumu asiwawo. ⁹ Djwi na me , nteang-nteang eyi nsiku kaku, ayime na luzingu,kansi ntangu emiyia nsiku,disumu etivey egnim ne kati eme,mbiy s'amiwa me. ¹⁰ Mbiy nsiku elevari vear n'evug,jwi na me , etikum mvara vear n'ewa. ¹¹ Djwi disumu etindogo me ne nsiku, mbiy nsiku etimvara n'ewa. ¹² N'oshin onagn, nsiku i Moise eli santu,ye mpi onkwon eli santu,masonga mpi eli wuo. ¹³ Nge vim eli wuo asifiyiawo ekum ewa djwi na me ? Kaku ata fioti ve. Kansi disumu, djwi ewung mpwe disumu,ne kati e vii awuo, s'amiwurwo ewa djwi na me.Djwi ne nsiku inagn ,disumu elega nkum onen. ¹⁴ Sijia susun nsiku eli kimpeve, kansi me, ndi ko wur emisarwo ne kimpika e masumu. Oniang mpiwung njia vii akieme ve. Djwi mpileki vii eleang me ve, kansi ndeki vii atun me. ¹⁶ Kansi yug na kie vim epileang me ve ,kog ndajia memen nsiku eli wuo. ¹⁷ Djwi epa me wur eleki vim anagn ve, eli masumu elepier ne kati e me. ¹⁸ Djwi ndajia ne kati eme, kaku vim e wuo. Djwi ndi na luzolo enkie vii awuo kansi mpikug ve. ¹⁹ Djwi mpiki iwo itsame ndeang ve, kansi ndeki ko ipwo iletun me. ²⁰ Yug ndeki ipwo iletum me, epa diaka me wur eleki ve, eli masumu elepier ne kati eme. ²¹ Mbiy s'amiyen me ne kati eme nsiku ene: Yug nding nkie iwuo, ipwo etikama ya me. ²² Djwi, ndi na osiang na nsiku i Nzeam n'etura eme. ²³ Kansi ne ilim i me i djung, ndayen nsiku emuu eyalwa mbaagn ti nsiku eli ne etura eme, etintsug mpfumi e nsiku i masumu ili n'ilim i me i djung. ²⁴ Ngy ya me ! Nagn esindima ne djung i ewa ene? ²⁵ Nsag-na-vie sipii ya Nzeam djwi na Nkum esu Yezu-kristu ! Djwi na wog nda jir na nsiku e Nzeam oshin eyug me, nkeang'ame ndajia ndi mpika nsiku e masumu ne djung ime.