¹ Su vear ali na lukwikilu e biu sivari n'itura isu vear apea biu ne lukwikilu iwo, kansi sikwon nding vim esitepea su osiang. ² Wur na wur ne kati esu apiike osiang ya otwung onde djwi na vim ewuo djwi na njir lukwikilu ende. ³ Djwi Kristu akaling vim esopea nde osiang ndemie ve; kansi eli oshin oyifugn wo wuwun: "Itii ivear ayotwike itisalog ya me". ⁴ Djwi vii ankum ayifugn wo nteang, afugn wo djwi siviy waagn, oniang ntangu ekwung su vii anagn n'etura emog, asiyiasu n'ekaagn. ⁵ Opeane, Nzeam elepii vear biu ti inaagn opiagni lutondo ti nginu imog gnug na gnug oshin oleang Yezu-Kristu, ⁶ Djwi ne nginu ti otuba ognu omog n'odzum, oiagni lokumu ya Nzeam Teasu, ti Nkum esu Yezu-Kristu. ⁷ Yamagni gnug na gnug kamsi eyoyamagni Kristu djwi na lokumu e Nzeam. ⁸ Ndatuba ngean: Kristu ayinde wur otshia e vear amibag wo djung djwi na ngyegne masonga i Nzeam, djwi na nsilulu iyipiinde ya ateasu ikug, ⁹ djwi vear apa ali wa Yuda ve wapii Nzeam lokumu djwi na ngy emayug nde. Oshin omifugn wo wuwun: "Mby, ayopeakame lokumu ne kati e vear apa ali wa Yuda ve, ayashuyakame wa liim djwi na lokumu e dzin iyie." ¹⁰ Wamikea ntuba wuwun: "Gnu vear apa ali wa Yuda ve, yiagni n'osiang ti vear ande." ¹¹ "Kumisagni Nkum, gnankum, vear apa ali wa Yuda ve, vear a buu imuu, kiagni nde okina." ¹² Yisaya mpi atuba ndenden: "Oshung omog ayapwe wo ya Yesse djwi eyi nkum e vear apa ali wa Yuda ve, vear anagn ayayia wo n'ekaagn ya nde." ¹³ Nzeam etsug su ekaagn ya nde oyuragni n'osiang ti ngemba djwi odjiragni, djwi ekaagn egnu eyii eninen na biu o Mpeve-Santu. ¹⁴ Atwung, djwi na gnu, ndajia memen otiyuoagni na vii awuo, na waagn o njia vii, okugagni na nkea mpea along gnug na gnug. ¹⁵ Ndofugnagni onkeana ene ti ivim i nkier na vii amuu, djwi okey nkanagni ngrasia eyimpii Nzeam. ¹⁶ Ngrasia ewo ayiwo mfuete ngya wur otshia e Kristu Yezu, eyitum wo etay e vear apa ali wa Yuda ve, djwi nsimpea oshuong o wuo o Nzeam kamsi wur epea empeab. Mfuete nkie oshin onagn djwi makabu i vearapa ali wa Yuda ve eyii wuo n'emipea wo djung iwo djwi na Mpeve-Santu. ¹⁷ Kansi, lokumu eme eli ne kati e Yezu ne vii a Nzeam. ¹⁸ Djwi, mpakug ntuba vim emog ve eli Kristu akakie ne kati eme djwi na mvara vear apa ali wa Yuda ve wakum na ndemfuka, n'otuba ti ne vii alekiiwo, ¹⁹ na biuu e bidimu na vii a ngituka eleyen wo, na biu e Mpeve-Santu. Enagn, ayiwo djwi me mpagn oshuong owuo e Kristu, yim Yeruzalem, ti ne viya enen ili mbeama na wo, tii ko Iliri. ²⁰ Wog enagn, aleangikime nsandong oshuong owuo, kansi epa etay emijiawo Kristu ne dzin ve, djwi nkwon ntwung evuru n'itsin evuru imitwung otwung omuu. ²¹ Oshin omifugn wo wuwun: "Vear akavea oshuong onde ayayen wo, vear akayug ata vii ande ayajiawo ne waagn ewo." ²² Enagn vim etsa mpig me mbug na ngya etay egnu. ²³ Kansi opeane, kakume ata n'ondii diaka ve ne buu enagn, mpi mvwe na mvwe, alime ko na ngangn e ngya etay egnu. ²⁴ Ndabansa ayoyenagni me ntangu eyaleg me na nsa Espania, ayatsagnu ti me yug ntiyia ndima mpuy e ngya etay egnu. ²⁵ Kansi, ntangu ene, mean ndetsu Yeruzalem djwi na otshia e wa santu. ²⁶ Djwi vear a Masedonia ti vear a Akai ayiwo n'osiang na mbug ekri djwi n'ankea emva ne kati e wa santu ili ne Yeruzalem. ²⁷ Wog vear ayileang na ntuma wo ekri enagn, vi-a-vii. Djwi, yug vear apa ali wa Yuda ve wamivea ikab iwo ne vii a kimpeve, ekug wuo wasarisi mpi ne vii ali mfunu na djung iwo. ²⁸ Mby, yug ntikukisa vii anagn mpi ntapea vim asatuma wo, ayaleg me kog yug ndetsu Espania. ²⁹ Ndajia memen ntangu eyayiame etay egnu, ayayiame na lusakumuna eninen e Kristu. ³⁰ Atwung, ndatuba ma gnu ne dzin i Yezu-Kristu mpine lutondo e Mpeve na ndwa mbeagn ti me ne bisamu ignu ya Nzeam. ³¹ Samagni djwi ndim ne kati e vear ane apilemfuki ne Yudea, djwi mpi wa santu wajir otshia ome eletshime nkie ne Yeruzalem. ³² Samagni djwi ngyi n'osiang ne luzolo e Nzeam, ntangu esikum me etay egnu, djwi ntoyia ngyor ne kati egnu. ³³ Nzeam e ngemba ayii nda gnu gnankum. Amen!