¹ Yamagni wur eli na lukwikilu e fioti, oyabagagni ewu ne vii atubande ve. ² Wur emog ali na lukwikilu enda vim ankum, emuu eli na lukwikilu e fioti, atsande nda ko ndunda. ³ Wur ela vim ankum apikug ngyen wur ela enagn ali wur e mpama ve. Ata nde wur epile vim ankum enagn, apikug mbag ewu e wur ela vim ankum ve. Djwi Nzeam amoyama. ⁴ Yie oli nagn, yie wur ebag ewu e wur enkagn otshia? Ata atiyima, ata atilog, elir ko nkum ende otshia. Kansi asiyima nde djwi nkum ende asopeande biu. ⁵ Wur emuu ayen ndenden eshuu emog eli na ntina elenga nshuu imuu. Wur emuu ayen ndenden nshuuinkum ili ko na ntina. Ekug wuo wur na wur ajir n'etura ende. ⁶ Wur elemfuka na nshuu, alemfuka djwi na Nkum; ata wur ela, ala djwi na Nkum, djwi alepii Nzeam nsag-na-viye. Wur epile enagn, yug apile eli djwi na Nkum; alepii mpi Nzeam nsag-na-viye. ⁷ Djwi, kaku wur emog ve ne kati esu ezinga ko djwi na nde ndemie. ⁸ Djwi yug sizinga, silazinga djwi na Nkum; yug silawa, asiwasu mpi djwi na Nkum. Wog enagn, ata silazinga, ata silawa, sili ko vear aNkum. ⁹ Djwi na wo eyiwi Kristu na eyikeynde mfutumuka, djwi ayii Nkum e vear amiwa ti vear ali ne luzingu. ¹⁰ Kansi yie, djwi na nge ebag yieewu otwung oyie? Mby yie, djwi na nge eyenyie otwung oyie wur e mpama? Djwi sankum ayasama su ne nteang e tuminar e Nzeam. ¹¹ Djwi wamifugn wuwun: "Nkum atuba ndenden: Abong ankum ayakrawo ne nteang eme, elem enkum ayapeawo Nzeam lokumu." ¹² Mby wur enkum ayasama nde ne nteang e Nzeam djwi na nde ndemie. ¹³ Wog enagn, sikwon mfibagagni ewu sug na sug, kansi sivey mukanu ngean: wur apikug ntsug ibaag ata ilung ve, djwi na otwung onde. ¹⁴ Ndajia mpi ndajir ne dzin i Nkum Yezu memen kaku vim eli mbin nkeangawo ve, vim asiyiawo mbin ko yug wur atibansa ndenden eli mbin. ¹⁵ Yug djwi na vim anda otwung oyie atiyen ndenden otokie ipwo, enagn opikafikien ne mbug e ngangn ve. Osug, oyapiy etura e wur ve djwi na vim anda, djwi Kristu awinde djwi na nde. ¹⁶ Oyapeagni mbug ya vear amuu ve wayui two na etshia egnu ewuo ekiegnu ve. ¹⁷ Djwi ekub e Nzeam epa eli vim anda ve, ata djwi na gnua ve, kansi eli ngemba ti osiang djwi na Mpeve-Santu. 8 Wur ekie otshia e kristu oshin onagn ali wur ewuo ne nteang e Nzeam, ti vear asoleang wo. ¹⁹ Wog enagn , siling'agni vim epea ngemba na ntsug vear ondii omg. ²⁰ Oyadjag otshia e Nzeam ve djwi na vim anda . Evi-a-vi , vim ankum ali wuo na nda,kansi epwo eli ko yug ne ntangu ela wur ,afikum ibag'u djwi na vear amuu. ²¹ Eli wuo na nkwon nda ekiy engam, na nkwon gnua viana, na nkwon nkie vim e sikum ibag'u djwi na otwung yie. ²² Ekaagn eli yie na wo enagn , wum djwi na yie ne nteang e Nzeam. Lusakumunu ya wur epikey mbag ewu ende ndemie ve ne vii a wuo alekinde. ²³ Kansi wur eli n'itura ipe ne vim alande , ali na ndola djwi apa alakie na ekaagn ve. Vim enkum ekiewo yug ekwon ekaagn eli disumu.