Ekug wuo wur enkum alemfuki ya ankum a dzug; djwi kaku ekub emog ve ekwon ngyim etay e Nzeam. Ikub inkum ili ne buu ene, Nzeam wur eyitsug. ² Wog enagn, wur ekie ote biu ya ankum ane, atikie ote biu n'otuba o Nzeam, mby vear atun, wabin ewu e Nzeam ya wo wemie. 3 Djwi, yug atsawonduur ankum abag vii a vear epa djwi na vii a wuo akie vear ve, kansi djwi na vii apwo. Yie opiluur nkum ve? Kie vii awuo mby asopeawo lokumu djwi na wo. ⁴ Nkum ebag vii a vear ali wur otshia e Nzeam djwi na iwuo iyie. Kansi yug olekii ipwo, yia na womo; djwi eli na ntina emapeawo ekub empea wur ndola. Djwi ali wur otshia e Nzeam, atsande nkeara mbela, atsande mpea ndola ko ya wur ekie ipwo. ⁵ Eli mfunu entsign djwi na ndemfuka, epa ko djwi na ndola ve, kansi eli mpi djwi na etura eyie. ⁶ Atsagnu mfuta mpaku mpi ko djwi na vii anagn. Djwi ankumanagn wali vear otshia e Nzeam, walir vii anagn ntangu enkum. ⁷ Peagni wo vim enkum efuete gnu mpea : mpaku ya wur evey mpaku, ekri epeawo ne mbug (taxe) ya wur efuete mvey, womo ya wur efuete su ngyug womo, lokumu ya wur efuete su mpea lokumu. ⁸ Oyayiagni n'ibaya ya wur emog ve. Ibaya isiyiagnu na wo ko i ngangn gnug na gnug. Djwi wur eleang otwung onde atikukisa nsiku. ⁹ Djwi nsiku ine: "opikii itaay ve, opidjag wur ve, opikami wumu ve, opileang vim e wur ve", ti wa nsiku imuu. Enkum ene elakea ko ne otuba omog one: "Leang otwung oyie kamsi yie yemie". ¹⁰ Lutondo epitsunkie otwung ipwo ve, djwi lutondo elakukisa wa nsiku inkum. ¹¹ Djwi na wo, ojiagni ntangu nge eli su: ene eli ntangu embiy ne lwong. Djwi evug etikum pipi, epa kamsi ntangu eyibani su ndjir ve. ¹² Otshuu otikien, vuna aling nkeam. Sifangagni etshia e mpib, silueragni ndug e vear a mwinda. ¹³ Sikienagni wuo, kamsi vear alekien mbiiy enkum, sisiangagni kinduma, na ijuy i veana, mpuy e djuung na mpite, ishia na zua. ¹⁴ Kansi silueragni Yezu-Kristu ne djuung isu, sikwon nkie vii aleang mpuy e djuung isu.