¹ Atwung, ndatuba ya gnu na ngy e Nzeam, na mpea djung ignu kamsi empeab eli na luzingu, e santu, esileang Nzeam, enagn asiyia wo bisamu iwuo ya nde. ² Oyalanagni vii a buu ene ve, kansi sognagni, nginu ignu ikum impa, djwi ojiagni vim nge eleang Nzeam: aleang vim ewuo, eli kaku kifu. ³ Mpi ndatuba, djwi na ngrasia eyimpii Nzeam, ne kati egnu, oyaleang ve nginu iyie isipeayie elengi i vear amuu. Kansi yindula n'oshin o waagn, oshin omipea Nzeam ikab i wur na wur ne lukwikilu ende. ⁴ Djwi, sili n'ilim entsign ne djuung imog, kansi ilim inkum epa wali ko na otshia omog ve. ⁵ Oshin omog mpi, su sili vear entsign, kansi sikie ko djuung imog ya Kristu, sili mpi wur na wur elim emog-emog. ⁶ Djwi sili na akab a Mpeve eshin n'eshin ne ngrasia emipea wo. Yug na wur eli na ikab imbikula vii a Nzeam, abikuli n'onen e lukwikilu ende. ⁷ Yug na wur eli n'ikab inkie otshia djwi na vear amuu, akii. Yug na wur eli n'ikab impea along, apii along. ⁸ Wur epea vear ilag, apii; eli n'ikab impea vear vim, apii viim n'etura ewuo. Yug wur ali na ikab ingya nkum e vear, ayii , kansi akii na wuo. Yug na wur eli n'ikab ingyug vear ngy, akii n'osiang. ⁹ Ekug wuo wur eli na lutondo akwon ngya n'oyang. Siangagni nankie ipwo, Kamagn na nkie iwuo. ¹⁰ Djwi na ngangn atwung, yiagni na ngangn gnug na gnug; lemfukagni mpi gnug na gnug. ¹¹ Yiangi na ngangn enkie otshia, oyakiagni ontsun ve, yiagni na kikesa,kiagni otshia e Nkum. ¹² Yiagni n'osiang n'ekaagn elignu na wo ne vii aleye, yiagni n'etura enkuung, tsugagni ko inaagn ne bisamu. ¹³ Vim ali wasantu na mpuy ewo, siangagni ekum kamsi gnu vear ali na mpuy ewo. Kiagni n'oshin onkum ewuo djwi na ngyama vear aleye ne mvuru ignu. ¹⁴ Sakumunagni vear alopeagni mpay; sakumunagni wo kansi oyatsugagni nkuu ve. ¹⁵ Yiagni n'osiang ti vear ali n'osiang; liyagni ti vear aliye. ¹⁶ Yiagni na nginu imog gnug na gnug. Oyayiagni na lulendo ve ne nginu ignu, yamagni vear ali kaku omwong. Oyayenagni gnugnun olagni vear waagn ne vy agnu gnemie ve. ¹⁷ Oyakearagni ipwo i wur na wur ve. Kiagni iwuo ne vy a vear ankum. ¹⁸ Yug ekug, enkum enagn eloliragni ko gnu gnemie, yiagni na ngemba ya wur enkum. ¹⁹ Oyakearagni mbela gnemie ve, kansi siangagni nkier i Nzeam ikii. Djwi wamifugn wuwun: "Nkum atuba ndenden: Siangagni me nkeari mbela, siangagni me mpi ifutu." ²⁰ Kansi yug mbeni eyie ali na nziya, peande vim anda; yug ali na mpuy e vay, peande vay agnua. Djwi yug okiagni oshin onagn, eli akeatshiya etsug yie n'ote ende. 1 Oyasiangagni ve ipwo iyii ne dzug ignu, kansi mambote iyi ne dzug ipwo.