¹ Wanzio otanu abur isigi. Ngyen weer emog eyim dzug elog ne buu. Woea nsab ibulu i mpib. ² Mby angama ibulu i mpib enagn. odjinga omog epwe yim n'ibulu iwo, kamsi edjinga e tshiya eninen; mby vuna ti opepe ekum mpib djwi n'edjinga eyim n'ibulu i mpib iwo. ³ Abampay s'alepwikiwo n'edjinga enagn, wapagn ne buu opfugn; mby s'apiiwo ekub emog kamsi ekub eli ya angge (scorpions) ne buu. ⁴ Akabiwo na nkwon nkie ipwo ya adjiu ne buu, ata ya nkaya i mvu inkum, ata ya oshung omog, kansi ko ya vear ali kaku kidimu e tampo e Nzeam n'ilung iwo. ⁵ Akabiwo, epa na ndjag vear ve, kansi na mpea ko mpay ngwon itean; mby mpay ilepiikiwo, ayiwo kamsi mpay itsampea angge (scorpions) yug atikama wur dzin. ⁶ Ne nshuu inagn, vear ayaling wo ewa, kansi wapayawa ve; ayaleangaka wo wawe, kansi ewa ayakim nde etey na wo. ⁷ Abampay anagn ayiwo kamsi wa mpunda imiwong wo djwi na ntsa ndwa mbaagn, n'ete ewo, kamsi impu ili kamsi wolo, mby elung ewo kamsi elung e wur. ⁸ Ayiiwo n'awuu kamsi awuu ankear, ti vin awo n'odzum kamsi vin a ntambu. ⁹ Ayiwo na (cuirasses) kamsi (cuirasses) e ewuu, mby oshuru apabu awokamsi oshuru e wa mpunda entsign walebin pfupfur e ayer-nkuu ne mbaagn. ¹⁰ Nsiya iwo i ntshung ayiwo nsor kamsi ejir e angge (scorpions), ekub ewo ayiwo ne nsiya iwo i ntshung djwi na nkie vear ipwo ngwon itean. ¹¹ Nkum eyalirike ayiwo wanzio e mpib eviewo n'otuba e waYuda Apollyon. ¹² Mpay inteang wean itileg. Yenaka mpay ip imuu wean ileseye ne mby ewo. ¹³ Wanzio e isom abur isigi. Mby s'ayug me otuba omog oyim n'asigi anign ali ne kunda e wolo eli ne nteang e Nzeam, ¹⁴ mby atuba nda wanzio e ndwong isom inan ndenden: Puba banzio inign imitshung wo eshing ne nzey eninen e Efrata enagn. ¹⁵ Mby banzio inign inagn, iyikungike ko ntangu, eshuu, ngwon ti mvwe ewo, s'apubiwo eshing djwi wadjag ikab imog i vear ne dzug akab asar. ¹⁶ Isuu i vear alevarike wampunda i mbaagn ayiwo awugu omab e awugu djum e vear: ayug me isuu iwo. ¹⁷ Mby n'emono enagn, ayen me wampunda ti vear ayikunike ne dzug iwo, ayiwo na wa(cuirsses) kamsi tshiya, kamsi (hyacinthe), ti etugu e tshiya (soufre). Ete e wampunda ayiwo kamsi ete e wantambu, tshiya alepwikiwo n'edzum ewo, ti edjinga ti etugu e tshiya (soufre). ¹⁸ Ikab imog i vear ne dzug akab asar awiwo na ndola isar inagn: na tshiya, n'edjinga ti n'etugu e tshiya (soufre) eyiipwike n'edzum ewo. ¹⁹ Djwi ekub e wampunda ayiwo n'edzum ewo ti n'ejir ewo; ejir ewo ayiwo oshin omog kamsi wandjwa ili n'ete, akiikiwo vear ipwo n'ejir enagn. ²⁰ Vear amuu akawa ve na ndola inagn, wakatshima itura na nsianga etshia e mbwo iwo ve, wakasianga na mfukimina ensthung ve, ti wanziam i biteke i wolo, i etie-mpar, i kotshu, i atari ti eshung, ili wapikug ngyen ve, wapikug ngyug ve, wapikug nkien ve; ²¹ mpi wakatshima itura ve na ndjag vear, na alog awo, na kinduma ewo, na wumu ewo.