¹ Ntangu emingama nde tampo e ishiambia, olung oyia pwo, ata minuti osar. ² Mby s'ayen me banzio ishiambia itsangyima ne nteang e Nzeam, wapea asigi ashiambia. ³ Mby wanzio emuu ayia, ayima ne nteang kunda, atikir vim e wolo epiey wo atsa, wopea ananagn a nsuu entsign, djwi apii ne dzug i kunda e wolo eli ne nteang e nkway ekub ti bisamu i wasantu inkum. ⁴ Edjinga e ananagn a nsuu evean, ti bisamu i wasantu, yim n'ewuo e wanzio tii ne nteang e Nzeam. ⁵ Wanzio avey vim e wolo enagn, ayura tshiya eyim ne kunda, mby s'atwomi nde ne buu. Mby, yugaka etuba, apfung a mvuye, nzari, ti oshin ognug buu. ⁶ Mby banzio ishiambia iyii n'asigi ashiambia wayirika na mbur wog. ⁷ Wanzio enteang abur isigi. Mby mvuye atari ti tshiya, watitshib n'aluung, sa'atwomiwo ne buu, mpi ikab imog i buu ne dzug akab asar eya tshiya, ikab imog eshung ne dzug akab asar eya tshiya, ti adjiu a mvu ankum aya tshiya. ⁸ Wanzio ozole abur isigi. Vim emog kamsi ombimi oninen emibwo wo tshiya, watwomo ne nzey, mby etign e nzey emog ne dzug e itign isar ekum aluung-aluung. Mpi ikab imog ne dzug akab asar a vim ankum ayiiki Nzeam ne nzey, vim ayiike na luzingu awa; ikab imog i ashwa ne dzug akab asar ewa. ¹⁰ Wanzio otatu abur isigi. Mby weer emog eninen ekb tshiya eyim dzug olung kamsi eviy e tshiya, elog n'etign emog e wanzey ne dzug akab asar, ti ne wa nto i vay. ¹¹ Dzin i weer enagn eli Absinte; etign emog e wa vay anagn esogno, ekum Absinte, mby vear entsign s'awikiwo ko djwi na vay anagn, djwi akum wo oluu. ¹² Wanzio oya abur isigi. Mby ikab imog i vuna ne dzug akab asar eyaba mpura, ti ikab imog i ngwon ne dzug akab asar ti ikab imog i weer ne dzug akab asar, mby ikab imog inagn ekum mpib. ikab imog i mbiiy n'akab asar anagn ekafipeaka oveanga ve, ata otshuu mpi oshin omog. ¹³ Ndir, s'ayug me mpumfurualeyim ne ngnina olung, aletubi na biu ndenden: Mpay, mpay, mpay ya vear apier ne buu, djwi n'asigi aleye mbur banzio isar imuu ine!