¹ Ne mby ewo, s'ayen me banzio inign watiyima n'akuu anign a buu; akirikiwo epepe enkeanign e buu, djwi opepe ekwon mfileg ne buu, ata ne nzey, ata n'oshung omog. ² Mby s'ayen me wanzio emuu, alevean etay etsampwe vuna, atikir tampo e Nzeam e luzingu; adzama na biu, nda wa banzio inign iyitum wo na nkie ipwo ne buu ti ne nzey, ndenden: ³ Oyakiagni ipwo ne buu ti ne nzey ve, ata n'eshung mpi ve, tii ko yug sititsug kidimu e tampo n'ilung i vear otshia e Nzeam esu. ⁴ Mby s'ayugme isuu i vear ayitsug wo kidimu e tampo, ayiwo vear awugu nkama emog n'onign n'inign, e okuu onkum e aman Israel: ⁵ okuu e Yuda, vear awugu djum n'ipe wativey kidimu e tampo, okuu e Rubeni, vear awugu djum n'ipe, vear wugu djum n'ipe n'okuu e Gad; vear awugu djum n'ipe, ⁶ n'okuu e Aser; vear awugu djum n'ipe, n'okuu e Neftali; vear awugu djum n'ipe, n'okuu e Manase; vear awugu djum n'ipe, ⁷ n'okuu e Simeona, vear awugu djum n'ipe, n'okuu e Levi; vear awugu djum n'ipe n'okuu e Isakar; vear awugu djum n'ipe, ⁸ n'okuu e Zabuloni, vear awugu djum n'ipe, n'okuu e Yozefo; vear awugu djum n'ipe n'okuu e Benjamin, vear awugu djum n'ipe eyitsug wo kidimu e tampo. ⁹ Ne mby ewo, ndir, s'ayen me oluy o vear, kaku wur esikug ntanga isuu iwo ve, vear a buu inkum, ekuu enkum, etuba enkum. Watiyima ne nteang e nkway ekub ti ne nteang e Mon Imeme, watilweraka elobo i siy-siy, ti veang ava ne mbwo iwo. ¹⁰ S'adzamikiwo na biu wuwun: Evug eli ko ya Nzeam esu ti ya Mon Imeme. ¹¹ Mby banzio inkum watidjing mbeama na kiti ekub, agnugn ti vim anign a luzingu anagn wababa, watsug ilung iwo ngie ne nteang e kiti ekub, wafukimina Nzeam, ¹² wuwun: Amen! Lokumu, nkembo, waagn, nsag-na-viye, osiang, ti biu eyii ya Nzeam esu, mvwe na mvwe! Amen! ¹³ Mby ognugn omog avey otuba nda me ndenden: Vear amileraka elobo e siy-siy ene wali wa nagn, wayim nonkagn? ¹⁴ Mokeara memen: Nkum eme, yie wur ejia. Mby ankaba ndenden: Eli vear ayim ne mpay ininen; wamisuy elobo ewo, wamitsug n'aluung a Mon Imeme s'amikum wo siy. ¹⁵ Wog enag emiyia wo ne nteang e kiti ekub e Nzeam, walakie otshia onde na mbiiy na otshuu neti e tempelo. wur emigneme ne kiti ekub ene ayatwung nde itsug i kapo ne dzug i vear anagn; ¹⁶ wapayafiyug nziya vewapayafiyug mpuy e vay ve, mpi kaku vuna ata mbiiy eyafiyugaka wo ve. ¹⁷ Djwi, Mon Imeme eli ne ngnina e kiti ekub ayapeakande adjiu anda, mpi ayavaraka nde ne nto i vay a luzingu, mby Nzeam ayadjwende viey ne viy awo.