¹ Ayen me wanzio emuu eli na biu entsign, alekrikinde yim dzug, mafuba itodzub; onkue-mvuyeayiwo ne dzug inde ote, elung ende kamsi vuna, mby nkuu inde kamsi ataga a tshiya. ² Atikir imon onkeana omog eli ngingam n'ewuo ende. Atsug ekuu ende e wum ne nzey, mby ekuu e wear ne buu; ³ mby adzama n'otuba o biu, kamsi ntambu abum. Ntangu emidzama nde, apfung a mvuye ashiambia mpi wapur etuba ewo. ⁴ Ntangu emipur apfung amvuye ashiambia etuba ewo, anafugn me, kansi ngyug k'otuba omog ne dzug etuba wuwun: Tsug tamo ne vii amituba apfung a mvuye ashiambia anagn, kansi oyafugn ve. ⁵ Mby wanzio eyiyen me tiyima ne nzey ti nky, asiang ewuo ende ne dzug, ⁶ asila ne dzin i wur eli na luzingu e mvwe na mvwe, wur eyiiki olung ti vim ankum ali neti, eyiiki buu ti vim ankum ali neti, na vay ti vim ankum ali neti, ndenden kaku diaka ntangu ve, ⁷ kansi ne nshuu iyabur wanzio e ndwong ishiambia isigi inde, oziy o Nzeam ayakug wo, oshin oyitubinde nda wangunsa, vear ande otshia. ⁸ Mby otuba oyiyug me ne dzug ekeantuba nda me ndenden: Tshwag, vey imon onkeana eli ngingam n'ewuo e wanzio emiyima ne nzey ti ne nky enagn. ⁹ Mby s'atshime etay e wanzio enagn, mokaba na mpeame imon onkeana ewo. Atuba nda me ndenden: Vey, mign wog; asiyug yie oluun'ipfugn iyie, kansi n'odzum asiyug yie nsa kamsi mpag. ¹⁰ Mvey imon onkeana ewo n'ewuo e wanzio, s'amign me; n'odzum ayug me nsa kamsi mpag, kansi ntangu emimign me, ipfugn ime ikum oluu. ¹¹ Mby wankaba wuwun: Ekug okey mbikula djwi na vear entsign, wa buu entsign, etuba entsign, ti wa vuy entsign.