¹ Mby ngyen ne wum ewuo e wur eyii ngigneme ne nkway ekub onkeana emog, wamifugn neti ti nelien, wamitsug tampo ishiambia. ² S'ayen me wanzio emog e biu, adzama na biu ndenden: Nagn ekug na ngama onkeana one, alimi ti watampo ine? ³ Kaku ata wur emog ve, ne dzug olung, ne buu, ata ne ngie e buu, eyikug na ngama ata na ndir onkeana owo. ⁴ Mby ndiye entsign djwi kaku ata wur emog eyikug na ngama mpi na ndir onkeana owo ve. ⁵ Mby ognuy omog ne kati ewo atuba nda me ndenden: Oyaliye ve; yen, ntambu e okuu e Yuda, onkean e David, anunginde djwi na ngama onkeana one mpi na ndima watampo ishiambia ine. ⁶ Mby ngyen ne kati e nkway ekub ti e vim anign a luzingu anagn ti e agnugn anagn, imon imeme ayinde kog kamsi wamodjag. Ayiinde na asigi ashiambia ti viy ashiambia, eli wampeve ishiambia i Nzeamemitum nde ne buu opfugn. ⁷ Ayia, avey onkeana owo ne wum ewuo e wur eyignemike ne nkway ekub. ⁸ Ntangu emivey nde onkeana owo, vim anign a luzingu ti agnugn omab n'inignenagn wababa ne nteang e Mon imeme, emog n'emog atikir kidar ti akob a wolo atijuo na ananagn a nsuu, enagn eli bisamu i wasantu. ⁹ Ashwikiwo lim emog e mpa, wuwun: Okug na mvey onkeana ti na ngama watampo, djwi odjag wo yie, omiteshum n'aluung ayie djwi na mpea vear a ekuu enkum, etuba enkum, e buu enkum; ¹⁰ wamikum vear a ekub eyie ti vear apea empeab ya Nzeam esu, ayayiawo ankum a ekub ewo ne buu. ¹¹ Ndir, mby s'ayug me otuba e wa banzio entsign watidjing mbeama na nkway ekub ti vim a luzingu ti agnugn, isuu i wa banzio iwo ayiwo entsign-entsign, kaku mpila. ¹² Atubikiwo n'otuba o biu, wuwun: Mon Imeme eyidjag wo akug na mvey biu, otsun, waagn, osiang, nkembo, ti lokumu. ¹³ Mpi vim ankum ayiiki Nzeam n'olung, ne buu, ne ngie e buu, ne nzey, ti vim ankum ali neti, ayug me watuba wuwun: Wur emigneme ne nkway ekub, ti Mon Imeme, lokumu, osiang, nkembo, ti biu eyii ya nde mvwe na mvwe! ¹⁴ Mby, vim anign a luzingu anagn watubike: Amen! Kansi agnugn anagn wababa, s'afukiminikiwo.