¹ Ne mby ewo, ndir, s'ayen me epfug emog ngingamne dzug olung. Otuba onteang eyiyug me, kamsi wabur asigi, mby etuba wa me wuwun: Vean nendien, asoyegne me vii afwete ndog etean kaku. ² Etean kaku, mpeve ankir. Yenaka, ayiwo na nkway emog ekubne dzug olung, ne nkway enagn, wur emog atigneme. ³ Wur eyignemi neti ayinde kamsi itari imog i biu, kamsi itari ipea oveanga, mby onkuye-mvuye etidjing nkway ekub enagn kamsi itari isuu (emeraude). ⁴ Nkway ikub omab n'inign itidjing nkway ekub enagn, agnugn omab n'inign watigneme ne nkway ikub inagn, watilweraka ileama i siy, ti ampu a wolo n'ete ewo. ⁵ Wanzari, otuba, ti adum a mvuye alepwikiwo ne nkway ekub enagn. Ne nteang e nkway ekub, mwinda ishiambia ilapiey biu, enagn eli wampeve ishiambia i Nzeam. ⁶ Ne nteangewo, ayiwo kamsi nzey eli kamsi tala-tala, oshin omog kamsi itari i kristal. Ne ngnina e nkway ekub ti mbeama na wo ngidjing, ayiwo na vim anign a luzingu, viy atijuo nteang ti mby. ⁷ Vim a luzingu anagn, e nteang ali kamsi ntambu, ozole ali kamsi imon i ngombe, otatu ali n'elung e wur, oya ali kamsi mpumfuru aleyiim. ⁸ Vim a luzingu anagn, emog-emog ali na apabu asom, watijuo na viy ngidjing nelien ti neti. Wapilem ve na ntuba na mbiy na otshuu: Oli Santu, Sanatu, Santu, Nkum, Nzeam, Nkea biu, eyike, aliko, mpi aleye! ⁹ Vim a luzingu anagn, ntangu epeawo lokumu ti osiang ti nsag-na-viye ya wur emigneme ne nkway ekub enagn, ya wur eli na luzingu mvwe na mvwe, ¹⁰ agnugn omab n'inign wababi ne nteang e wur emigneme ne nkway ekub, wafukimina wur eli na luzingu e mvwe na mvwe, watwomo ampu awo ne nteang e nkway ekub, wuwun: ¹¹ Olakug, Nkum esu, Nzeam esu, na mvey lokumu ti osiang ti biu, djwi yie wur eyiiki vim ankum, yie wur eyileang eyii ko oshin oyiikiyie.