¹ Fugna wanzio e evuru eNzeam e Sardes yiyen: Yen vii amituba wur emikir mpeve ishiambia i Nzeam, ti weer ishiambia: Ndajia etshia eyie. Ndajia memen oleleg djwi oyii na luzingu, kansi yie, omiwa. ² Olir wuo, kaba amuu aling ngwa anagn wayii biu, djwi ntoyen eatshia eyie wuo ve ne nteang e Nzeam eme. ³ Wung nkana oshin oyiviy yie mpi eyiyug yie otuba o Nzeam, wum wog mpi tshima etura eyie.Yug okalir wuo ve, ayayiame kamsi nkea wumu, opajia ve ntangu nge eyayiame etay eyie. ⁴ Ntangu ene, ne Sardes, oli na vear amuu watopiy ileama iwo ve, ayakieanakawo ti me, n'ileama i siy, djwi wakug oshin onagn. ⁵ Wur eyanunga ayalwernde ileama i siy, mpayabvuo dzin inde ve n'onkeana e luzingu, mpi ayatangame dzin inde ne nteang e Teame ti ne nteang e banzio inde. ⁶ Eli n'atii, awung ngyug vii atuba Mpeve ya vear a mvuru i Nzeam! ⁷ Fugna wanzio e evuru e Nzeam e Filadelfia yiyen: Yen vii atuba osantu, wur e kieleka, wur eli na nsab e David, wur etsangama, kaku wur esitshung ve; wur etsantshung, kaku wur esingama ve: ⁸ Ndajia etshia eyie.Yen, djwi kaku yie na biu entsign ve, omiwum otuba ome, okasan dzin ime ve, ntitsug epfug ngingam ne nteang eyie, kaku wur esikug ntshung wog ve. ⁹ Yen, ndopea vear amuu ali ne sinagoga e satana, waletubi wuwun wali waYuda kansi epa wali waYuda ve, waledjim; yen, ayatum me waye nkr abongo ne nkuu iyie, mby wajii wuwun oleang me yie. ¹⁰ Djwi omiwum otuba ne dzin ime n'inaagn iyie, ayowum me mpi ne ntangu e mpukumuna eleye ne buu opfugn, djwi na ntesa vear a buu. ¹¹ Etean kaku, ndeye. Kir ko vim eliyie na wo, djwi wur emuu akavey impu iyie ekub. ¹² Wur eyanunga, ayotsug me akum itaga ne tempelo e Nzeam eme, apafipwe ve; ayafugn me ne djuung inde dzin i Nzeam eme, ti dzin i wiya enen e Nzeam eme, Yeruzalem empa ekra yim olung etay e Nzeam eme, ti dzin ime impa. ¹³ Eli n'atii, awung ngyug vii atuba mpeve e Nzeam ya vear a mvuru i Nzeam! ¹⁴ Fugna wanzio e evuru e Nzeam e Laodisea yiyen: Yen vii atuba Amen, ntiegn e ekaagn e kieleka, itsin i vim ankum ayikii Nzeam: ¹⁵ Ndajia etshia eyie. Ndajia oli epa mpio ve epa tshiya ve. Osikug ngya ata mpio ata tshiya! ¹⁶ Kansi, djwi oli elii-elii, opa oli mpio ve ata tshiya ve, ayoluwame n'odzum ome. ¹⁷ Ognang otuba yiyen: Ndi nkea otsun, mivea otsun, kakume diaka na mfunu e vim emog ve, mpi opijia ve yiyen oli wur e mpay, e ngy, omva, omibuye viy, opuu-opuu, ¹⁸ mopea ilag na nshum ya me wolo emitsug wo ne tshiya, djwi okum nkea otsun, na ileama i siy, djwi oyii n'ileama ne djuung, wakwon ngyen nsogn oshin oli yie opuu-opuu, ti ete enkwe ne viy djwi okey ngyen. ¹⁹ Me, atsame ngnianga mpi atsame mpea ndola ya vear aleang me. Yia na mpuy e nkie wuo, tshima etura eyie. ²⁰ Yen, mean ntiyima n'epfug, ndakokola. Wur esiyug otuba omempi esingama epfug, asishweme n'evuru ende, asilame ti nde, asilande mpi ti me. ²¹ Wur eyanunga, ayagneme nde ti me, ne kiti eme ekub, kamsi eyinungime, mpi migneme ti Teame ne kiti ende. ²² Eli n'atii, awung ngyug vii atuba Mpeve ya vear amvuru i Nzeam!