¹ Fugna wanzio e evuru e Nzeam e Efeso yeyen: "Yen vim etuba wur emikir weer ishambia ne wum ende ewuo, wur elekien ne ngnina e mwinda ishambia i wolo: ² Ndajia vii alekii yie, otshia oyie, ti inaagn ili yie na wo. Ndajia memen opikug mvara vear apwo n'etura eyie ve; omitesa vear amuu ayitubike wuwun wali wantumwa kansi apa wali wantumwa ve, ayen yie wali vear oyang; ³ oli n'inaagn, omiyen mpay djwi na dzin ime, kansi okalem ve. ⁴ Kansi vim etun me ya yie, eli ko ngagn eyie e nteang eyikiyie na wo. ⁵ Keankana etay eyim yie, tshima etura, kie etshia eyiiyie nteang na wo, yug kaku, ayayia me etay eli yie, ayalima me mwinda eyie n'ondii owo. Mpalima ve ko yug omitshima etura. ⁶ Kansi yie, oli na vim ene, opileang etshia e vear a Nicola ve, me mpi atsame ntun etshia ewo. ⁷ Eli n'atii, awung ngyug vii atuba Mpeve nda vear amvuru i Nzeam: Wur eyanunga, ayopeame vim a nda eyim n'oshung o luzingu, eli ne kati e paradisu e Nzeam. ⁸ Fugna wonzio e evuru e Nzeam e Smirne yiyen: Yen vii atuba wur ontete ti wur e nsuka, wur eyiwe, emikea ne luzingu: ⁹ Ndajia mpay iyie ti omva oyie (ata oli nkea otsun), na vii alobeam vear aletubi wuwun wali waYuda, kansi epa wali waYuda ve, kansi wali vear a sinagoga e satana. ¹⁰ Oyayug womo ve na mpay isiyen yie. Yen, ontshung ndean asitwomo nde vear amuu ne kati egnu ne bolog, djwi n'ontesagni gnu, ayayiagnu na mpay ininen i nshuu djum. Yia ko n'ekaagn tii ko ewa eyie, mby ayopeame impu ekub e luzingu. ¹¹ Eli n'atii, awung ngyug vii atuba Mpeve nda vear a mvuru i Nzeam: Wur eyanunga, apafiyen mpay ewa ozole ve. ¹² Fugna wanzio e evuru e Nzeam e Pergame yiyen: Yen vii atuba wur eli na ompien e vur epe, ensor: ¹³ Ndajia ondii ogneme yie, ndajia ondii onagn eli na nkway ekub e satana. Otikir dzin ime, otofangi lukwikilu ya me ve, tii ata ne nshuu iyii Antipasi, ntiegn eme e wuo, eyiidjag wo etay egnu kog, ondii oli satana amitsug evuru ende. ¹⁴ Kansi ndi na vim etun me ya yie, eli vear amuu wamikama ko n'along a Balam, eyilongike Balak na ntsug ibagu ne nteang aman a Israel djwi walog, djwi wale eky e gnam emipeawo n'empeab e biteke, mpi wapea djuung iwo ne kinduma. ¹⁵ Oshin omog, yie mpi, oli na vear amikama n'along a vear a Nicola. ¹⁶ Tshima etura eyie; yug kaku ve, ayayiame etay eyie kaku etean ve, mpi ayadjag me vearanagn n'ompien e vur epe eyim n'odzum ome. ¹⁷ Eli n'atii awung ngyug vii atuba Mpeve nda vear a mvuru i Nzeam: wur eyanunga, ayopeame mana e ngiziy (manne cachee), mpi ayopeame itari i siy; n'itari iwo, wamifugn dzin imog i mpa, kaku wur emog ejia dzin iwo ve, ko wur esivey wog. ¹⁸ Fugna wanzio e evuru e Nzeam e Tyatire yiyen: Yen vii atuba Mon e Nzeam, wur eli na viy kamsi ekb e tshiya, mpi nkuu inde kamsi ewuu epiey tshiya: ¹⁹ Ndajia etshia eyie, ngagn eyie, lukwikilu eyie, otshia eyie e ekaagn, biu oyie, ti etshia eyie e mby-mby elenga etshia eyie e nteang. ²⁰ Kansi vim etun me ya yie, eli olesiangi onkear eviewo Jezabel, eletubi ndenden ali ngunsa, alelong mpi alelogi vear ame otshia djwi wapii djuung iwo ne kinduma, mpi djwi wale eky e gnam emipeawo empeab ya biteke. ²¹ Opiime ntangu e ntshima etura, kansi apileang ntshima etura ve djwi na nsianga kinduma ende. ²² Yen, asotwomo me ne ntir emog, mpi asitum me mpay ininen ya vear alekii itaay ti nde. Mpatum ve ko yug wamikea ntshima itura iwo n'etshia ewo. ²³ Ayadjag me aman ande; mby mvuru i Nzeam inkum ayajiawo wuwun ndi wur etsanjia vii ali n'itura i vear, mpi ayafuta me wur na wur n'etshia ende. ²⁴ Mby gnu, ti vear amuu ankum ali ne Tyatire, gnu vear apitsimvey along anagn ve, mpi otojiagni nzig e satana ve, n'oshin owo olaviwo, mokagni ngean: mpafitsug odzuru omuu ne dzug ignu ve; ²⁵ djwi imog, vim elignu na wo, kiragni tii ko eshuu eyayiame . ²⁶ Wur eyanunga, mpi eyawum etshia eme tii nsuka, aypeame ekub ne dzug i buu e vear. ²⁷ Ayalirakandeti fimbu e ewuu kamsi etsawo mbuye mpugu emikiewo na mpieme, me, memie mpi, mivea ekub enagn ya Teame. ²⁸ Mby ayopeame weer e suka. ²⁹ Eli n'atii, awung ngyug vii atuba Mpeve ya vear a mvuru i Nzeam!