¹ Mby ngyen olung o mpa; djwi olung na buu eyii nteang atshiwo ntu, nzey mpi ekafiyiaka ve. ² Mby ngyen wiya enen e santu, Yeruzalem e mpa, elekri yim dzug, yim etay e Nzeam, watowong kamsi wear emilwer wo ayaga djwi na wum nde. ³ Ngyug otuba emog e biu epwe ne kiti ekub, etuba wuwun: yen ondii o santu (tabernacle) e nzeam ti vear! Ayapier nde ti wo, ayayiawo vear ande, mby Nzeam ndemie ayayia nde nda wo. ⁴ Ayadjwende viey ne viy awo, ewa mpi epafiyia ve; epafiyia n'okio ve, ata nziaru, ata mpay, djwi vii anteang anagn atilim. ⁵ Mby, wur emigneme ne nkway ekub atuba ndenden: Yen, ntikeara vim ankum ko mpa. Atuba ndenden: Fugn, djwi ene eli vi-a-vii, mpi masonga. ⁶ Mby ankaba ndenden: Eyii oshin onagn! Me, ndi Alfa ti Omega, itsin ti nsuka. Wur eli na mpuy e vay, ayopeame nto e vay a luzingu, e ngor. ⁷ Wur eyanunga, ayavey nde oleama-nzo e vim ane; ayayiame Nzeam ende, nde ayayiande mon me. ⁸ Kansi djwi na vear apikig ve, djwi na vear apileang ndjir ve, vear alekii vii apuo, vear aledjag vear, alekii kinduma, alekii alog, alesami biteke, ti ankea eyang enkum, ikab iwo miwum n'ibulu ekb e tshiya ti etugu, enagn eli ewa ozole. ⁹ Mby wanzio emog ne banzio ishiambia iyikirike akob amiyuo na wandola ishiambia i nsuka inagn, ayia, atuba nda me ndenden: Yag moyegni onkear ivea, wear e Mon Imeme. ¹⁰ Amvara ne mpeve, ne dzug ombimi emog etitey. Mby angyegne wiya e santu, Yeruzalem, alekrikiwo yim dzug etay eli Nzeam, n'osiang o Nzeam, ¹¹ epiey kamsi itari isuu, itari ili kamsi tala- tala, itari i biu (cristal). ¹² Ayiwo n'epy emitwung wo emidjing wiya enkum. Ayiwo n'ipfug djum n'ipe, ti banzio djum n'ipe, emog-emog ne konso epfug, ti vin amifugn wo, eli vin a ekuu djum n'ipe e aman Israel: ¹³ etay epwe vuna, ipfug isar, ne nordi mpi ipfug isar, ne sudi ipfug isar, etay elog vuna mpi ipfug isar. ¹⁴ Epy e wiya enen enagn ayiwo n'atsin a epy djum n'ipe ngie, ne dzug i atsin anagn, watufugn vin djum n'ipe i wantumwa i Mon Imeme. ¹⁵ wur eyiinkabike vii anagnayiinde na etign okukwom e wolo n'ewuo djwi na ngyer wiya, ti ipfug inde, ti epy ewo. ¹⁶ Wiya enen ewo ayiwo n'empagn enign, otey ti onen ewo ayiwo k'oshin omog. Ayer wiya n'okukwom enagn, ayen ekug kilometre ipe na ndamu; otey, onen ti odzeang ewo oshin omog. ¹⁷ Ayer epy, ayen (........), oshin oyiyer wur enagn, ko oshin oyiyer wanzio. ¹⁸ Atwung wo epy enagn n'atari a biu-biu, wiya enen ayiwo na wolo emog ekwon mbin, kamsi tala-tala ekwon mbin. ¹⁹ Atsin a epy enagn ngie ayiwo kamsi wolo, ti atari isuu eshin n'eshin: itsin i nteang atsug wo atari a biu-biu, itsin ozole atsug wo na (saphir), otatu na (calcedoine), oya na (emeraude), ²⁰ otanu na (sardonyx), e ndwong isom na (sardoine), e ndwong ishiambia na (chrysolite), e ndwong iniani na beryl, e ndwong iwua na (topaze), e ndwong djum na (chrysoprase), e ndwong djum n'emog na (hyacinthe), e ndwong djum n'ipe na (amethyste). ²¹ Ipfug djum n'ipe enagn ayiwo mpengele djum n'ipe; konso epfug ayiwo na mpengele emog. Ondii oli ankum a wiya enen ayiwo wolo ekwon mbin, kamsi tala-tala eyen wo etay n'etay. ²² Nkayen ata tempelo emog ve ne wiya enagn, djwi Nzeam Nkum Nkea biu ali tempelo e nde, ti Mon Imeme. ²³ Wiya enagn ekayia ata na mfunu e vuna ve, ata ngwon mpi ve, djwi na mpea oveanga, djwi nkembo e Nzeam elapea oveanga, mby Mon Imeme ali evii ende e tshiya. ²⁴ Vear ayakienaka wo n'oveanga onde, mby wavuy i buu ayajieaka wo lokumu ewo. ²⁵ Ipfug inde ipayadzub mbiiy enkum ve, djwi otshuu epayafiyia ve. ²⁶ Ayajiewo osiang o vear abuu. ²⁷ Ne wiya enagn, kaku vim e mbin eyashwe ve, ata wur eyafipea djuung inde ne vii apwo ti n'oyang ve; vear ayashwe mpiog ko vear ayayia vin awo ali n'onkeana e luzingu e Mon Imeme.