¹ Mby ngyen wanzio emog alekri yim dzug, atikir nsab e ibulu i mpib ti ohing eninen n'ewuo ende. ² Akir dragona, ndjua eyii ntama, eli ontshung ti satana, mby otshung oshing tii mvwe iwugu imog. ³ Otwomo ne mpib, odzub, atshung epfug ne dzug iwo djwi akwon mfidjimaka vear ne buu tii ko eyakug mvwe iwugu imog. Ne mby ewo, ayopuba wo diaka djwi na ivim i ntangu. ⁴ Mby ngyen wakiti ekub, wapea vear amigneme neti, ekub e mbag ewu e vear. mby ngyen wamoyo i vear ayiibag wo ete djwi na ntiegn e Yezu eyiipikiwo, mpi djwi n'otuba o Nzeam, ti moyo i vear akafukiminaka gnam ti ignignig inde, vear akavey kidimu ende n'elung ti n'ewuo. Wakea ne luzingu, mby s'avey wo ekub ti Kristu, tii mvwe iwugu imog. ⁵ Mby vear amuu ayiiwi wakakea ne luzingu ve, tii ko eyikug wo mvwe iwugu imog. Enagn eli mbala ontete eyakea mbiy vear n'ewa. ⁶ Osiang mpi santu eli vear ayavey ikab ne mbala ontete eyakea mbiy vear n'ewa! Ewa ozole epayia n'ekub ne dzug iwo ve; kansi ayayia wo vear ayapeaka empeab e Nzeam ti e Kristu, mby ayayiawo ti nde n'ekub tii mvwe iwugu imog. ⁷ Ntangu eyakug mvwe iwugu imog, ayasianga wo satana ne bolog. ⁸ Ayakeande mpwe djwi na ndjim vear abuu ali ne akuu ankea anign , Gog na Magog, djwi atsug wankum ondii omog djwi n'obr o mbaagn; isuu i vear awo ayayiawo kamsi zelo ne nzey. ⁹ Wavean ne buu, watsamvey ntn eyii wasantu ti wiya enen eyileangikiwo. Kansi tshiya emog ekra yim dzug, walunga wankum. ¹⁰ Mby, ontshung eladjimike, wotwomo n'ibulu i tshiya ti etugu, ondii oli gnam ti ngunsa oyang. Mpiog, ayayiakawo na mpay, na mbiiy na otshuu, mvwe na mvwe. ¹¹ Mby ngyen kiti ekub emog e siy, ti wur atigneme neti. Buu ti olung wakim ne viy ande, ekafiyia n'ondii djwi na wo ve. ¹² Mby ngyen vear ayiiwi, antsuru ti alieng, watiyima ne nteang e kiti ekub. Enkeana engam. Onkeana omuu ekeangam, ayiiwo onkeana e luzingu. Mby s'abag wo ewu e vear ayiiwi, n'otsia e wur na wur, n'oshin oyifugn wo n'enkeana enagn. ¹³ Nzey alwa edjuu eyiwi ne vay; ewa ti wiya e wabafwa walwa mpi edjuu eyii ya wo; mby s'abag wo ewu e wur na wur, n'oshin otshia ende. ¹⁴ Mby s'atwomiwo ewa ne wiya e wabafwa n'ibulu i tshiya. Enagn eli ewa e mbala ozole, ibulu i tshiya. ¹⁵ Wur enkum ekayen dzin inde n'onkeana e luzingu, otwomiwo n'ibulu i tshiya.