¹ Mby angyegne nzey emog e vay a luzingu, vay pe-pe, kamsi tala-tala, apwikiwo apwikiwo ne kiti ekub e nzeam ti e Mon Imeme. ² Ne ngnina e wiya ti ne nky inkeape i nzey, ayiwo n'oshung o luzingu , elewur atub mbala djum n'ipe, elewur atub konso ngwon, mby nkaya iwo avugikiwo vear a buu na nkeang. ³ Epafiyia na nkuu ve. Kiti ekub e Nzeam ti e Mon Imeme ayayiawo ne wiya enen; Vear ande otshia ayokiakawo etshia, ⁴ mpi ayayenakawo elung ende, dzin inde ayayiawo n'ilung iwo. ⁵ Otshuu epafiyia ve, wapayia ata na mfunu e mwinda ve, ata oveanga e tshiya ve, djwi nzeam nde nkum wur eyapeaka oveanga. Mby ayayiawo n'ekub ewo mvwe na mvwe. ⁶ Ankaba ndenden: Otuba ene eli vi-a-vii mpi e masonga; mby Nkum, Nzeam e wampeve i wangunsa, atitum wanzio ende djwi na ngyegne vear ande otshia vii aleye etean kaku. ⁷ Yenaka, me mean ndeye etean kaku. Osiang ya wur ewum otuba emibikula wo n'onkeana one! ⁸ Eli mug Yoane wur eyiiyen mpi eyiiyug vii ane. Ntangu emiyug me mpi emiyen me, alog me ne nkuu i wanzio eyingyengike wog, djwi mofukimini nde. ⁹ Kansi nde atuba nda me ndenden: Osug, oyakie ngean ve! Ndi ewur eyie otshia, mpi ewur atwung ayie wangunsa, ti amuu alewum otuba e onkeana ene. Fukimina ko nzeam. ¹⁰ Mby ankaba ndenden: Oyatshung otuba emibikula wo n'onkeana ene ve. Djwi ntangu ewo etivanga. ¹¹ Wur eli epwo ayii ko epwo, wur eli mbin ayii ko mbin, wur ewuo ayii ko wuo, akii ko iwuo inde, mby wur eli osantu alegi nkum ko osantu. ¹² Yen, mean ndeye etean kaku, ti ifutu ime eli ko ya me, djwi an nkeara ya wur na wur oshin oyiikinde etshia ende. ¹³ Me, ndi Alfa ti Omega, wur e nteang ti wur e nsuka, itsin ti nsuka. ¹⁴ Osiang ya vear asuy elobo ewo, djwi wayii na mbug e nsa n'oshungo luzingu, mpi washwi n'ipfug i nsa ne wiya enen! ¹⁵ Wamva nelien, ankea alog, wanduma, vear adjag vear, vear asama biteke, ti wur enkum eleang mpi etsankie oyang! ¹⁶ Mug, yezu, atum me wanzio eme djwi n'onkabagni gnu vii ane ne wamvuru i Nzeam. Me ndi Mon ti onkean e David, weer epea oveanga ne suka. ¹⁷ mby Mpeve ti wear watuba wuwun: Yag. Mby wur eyug atubi ndenden: yag. Wur eli na mpuy e vay, aye, wur eleang, avey vay a luzingu, e ngor. ¹⁸ Ndatuba ya wur enkum esiyug otuba emibikula wo n'onkeana one: Yug wur atiyika vim emuu, Nzeam asopea nde wandola imituba wo n'onkeana ene; ¹⁹ mby yug wur atilima vim emuu n'otuba emibikula wo n'onkeana one, Nzeam mpi ayalima nde ikab inde n'oshung o luzingu ti ne wiya e santu, oshin omifugn wo n'onkeana ene. ²⁰ Wur ekab vii ane atuba ndenden: Ee, mean ndeye, etean kaku. Amen! Yag, Nkum Yezu! ²¹ Ngrasia e Nkum Yezu-Kristu eyii ya gnu gnankum!