¹ Ne mby ewo, ngyen wanzio emog alekri yim dzug, ayiind n'ekub eninen; buu ekum n'oveanga e nkembo ende. ² Adzama na biu ndenden: Etilog, etlog, Babiloni eninen! Etikum ondii opier entshung, ondii oyen wo mpeve inkum ipwo, ondii oyen wo wamfuru inkum i mbin, ³ djwi buu inkum wamignua veana a nkier i kinduma ende, eyikike wavuy i buu ene kinduma ti nde, mby vear a buu asar vim s'aviy wo otsun djwi na biuu ende oshin oleang nde. ⁴ Mby ngyug ne dzug olung, otuba emog etuba wuwun: Pweagni ne katiende, gnu vear ame, djwi okashweagni ne masumu inde, djwi okaveyagni ikab i ndola ende. ⁵ Djwi, masumu inde itijuo tii ne dzug olung, Nzeam s'mikeande nkana ipwo inde. ⁶ Futagni nde kamsi eyiifutinde. N'ikob iyiipay nde, kearagni nde wog mbala ipe. ⁷ Oshin oyiiveyikinde nkembo ne vii aleang nde, oshin onagn mpi esopeagnu mpay ti asaga. Djwi atuba n'etura ende ndenden: Ntigneme, oshin oli me vuy onkear, epa ndi nsakwe ve, mpayashwe okio e wur emog ve! ⁸ Djwi na vii anagn, eshuu emog, ndola inde ayayiawo, okio, ewa, ti nziya, mby ayobuowo tshiya.Djwi Nzeam, Nkum emobag ewu, ali na biu. ⁹ Mby, wavuy inkum ne buu imipea djuung iwo ya nde ne kinduma ti mpuy e djuung iwo, ayaliye wo, ayagnie wo djwi na nde, ntangu eyayen wo walobuo tshiya. ¹⁰ Ayayima wo etey, walelur womo e mpay inde, ayatuba wo wuwun: Mpay! mpay! Babiloni wiya eninen, wiya e biu! Ewu eyie etiyia ko ne ntangu emog! ¹¹ Mby vear a buu asar vim waliye, wali n'okio djwi na nde, djwi kaku wur efishum vim awo ve, ¹² wolo, etie-mpar, atari isuu, mpengele, ileama i marikagn, i kwi-kwi, osar-osar (soie), eshung eshin n'eshin e nsuu ewuo, vim ankum e asigi a nzuu, eshung e eyui, iwuu, vim ankum a eshung isuu, ¹³ opri, atungulu, ananagn a nsuu, mira, atsa, veana, vir, ekuru, antu, wangombe, ameme, wampunda, i djuung ti i moyo i vear. ¹⁴ Atub ayileangike moyo eyie imitsa etey na yie; ti vim ankum ayiyugikiyie nsa, wean imitsa ntu, opafiyen wog ve. ¹⁵ Vear asar vim anagn, wamiviya otsun djwi na nde, ayayimawo etey, na womo e ndola ende, ayaliyewo, ayayiawo n'okio, ¹⁶ ayatubawo wuwun: Mpay! Mpay! Wiya enen eyilwerike marikagn, ileama i kwi-kwi, ti vim a wolo, ti atari a isuu, ti mpengele! ¹⁷ Ko ne ntangu emog, otsun onkum etiwa! Mby vear ankum avara ashwa, etsangya n'ondii one, vear ankum atsankien ne vay, ankum atsankien ne nzey, ayyikiwo ko etey, ¹⁸ mby s'adzamikiwo ntangu eyiyen wo edjinga etsiya emobuowo, wuwun: Wiya nge eyiike kamsi wiya enen ene? ¹⁹ S'atsugukiwo etugu ne dzug i ete ewo, s'akikiwo okio, wadzama wuwun: Mpay! Mpay! Wiya enen, vear ankum ayiike n'ashwa ne nzey, emiviya otsun neti e wiya ewo, ko ne ntangu emog otsun onkum etiwa! ²⁰ Olung, yia n'osiang jwi na wo! Ata gnu wasantu, wantumwa, ti wangunsa, yiagni mpi n'osiang! Djwi Nzeam atoyenagni vear a wuo ne ntangu ebag nde ewu ende. ²¹ Mby wanzio emog e biu avey itari imog kamsi ewuu eninen, atwomo ne nzey ndenden: Ko oshin one eyatwomo wo Babiloni, wiya eninen, otshwag mpi wapafiyen wog ve. ²² Mby, etay eyie, wapafiyug ve, oshuru o vear abur kidar, vear ashuye lim, vear abur oshiem ti vear abur asigi. Etay eyie wapafiyen ve, ata wur emog ekie otshia enkum enagn, wapafiyug ve etay eyie, ata oshuru e ashin; ²³ Oveanga e mwinda epafipiey etay eyie ve, ata otuba e wum ti wear opafiyugagni etay eyie ve; djwi vear ayisarike vim etay eyie ayikiwo vear anen-anen ne buu, vear a buu inkum alog wo djwi n'oshin oyadjimikiyie n'ilog iyie, ²⁴ mpi ayen wo ya nde, aluung a wangunsa, wasantu ti e vear ankum ayibag wo nking ne buu.