¹ Ndir, mby ngyen Mon Imeme atiyima n'ombimi e Siona, vear awugu nkama emog n'onign n'inign watiyima ti nde, ayiwo na dzin inde ti dzin i Teande wamifugn n'ilung iwo. ² Ayug me ne dzug olung, otuba omog epwe kamsi vay aninen, kamsi oshuru e idum i mvuye eninen, mby otuba ewo eyiyug me, apwikiwo kamsi vear wabur kidar. ³ Ashuwikiwo lim empane nteang e kiti ekub, ti ne nteang e vim anign a luzingu ti agnugn. Kaku wur eyijii na nshuwe lim ewo ve, ko vear awugu nkama emog n'onign n'inign ajiiwo, wog vear ayikeywo nshum ne buu. ⁴ Eli wog vear akavey mbin ya ankear, djwi watojii ankear ve; walesedjii ko Mon Imeme etay enkum eletshinde. Wamakeanshum ne kati e vear, kamsi aman a nsom eteang djwi na Nzeam mpi djwi na Mon Imeme; ⁵ ata n'edzum ewo, kaku oyang ve, ognang kaku ipwo imiyen wo ya wo ve. ⁶ Ngyen wanzio emuu aleyim ne ngnina olung; ayiinde na oshwong owuo e mvwe na mvwe, djwi na dong vear apier ne buu, ti ne buu inkum, etuba enkum, ti ya vear ankum. ⁷ Atubikinde n'otuba e biu ndenden: Luragni Nzeam, peagni nde lokumu, djwi ntangu ebag nde ewu etikug; fukiminagni wur eyiiki olung, buu, nzey, ti wanto i vay. ⁸ Wanzio emuu ozole asayia, ndenden: Etilog, etilog, Babiloni eninen, ondii oyignwike buu inkum veana a nkier i kinduma ende! ⁹ Mby, wanzio emuu otatu asayia, atuba n'otuba o biu ndenden: Yug wur atifukimina gnam ti ignignig inde, yug ativey kidimu n'elung ende go n'ewuo ende, ¹⁰ nde mpi ayagnwande veana a nkier i Nzeam, iyiipay nde n'ikob inde ekatshib nde ata na vim emuu, mby wur enagn ayayen nde mpay ne tshiya ti n'etug e tshiya, ne nteang e banzio i santu ti ne nteang e Mon Imeme. ¹¹ Mby edjinga e mpay iwo ayaveanakawo mvwe na mvwe; kaku ntangu eyayor wo ve na mbiiy na otshuu, enagn vear ayafukimina gnam ti ignignig inde, ti wur eyavey kidimu e dzin inde. ¹² Ene eli inaagn i wasantu, wo vear alewum onkwon o Nzeam ti lukwikilu e Yezu. ¹³ Mby s'ayug me otuba omog ne dzug etuba wuwun: Fugnngean: Osiang ntangu opeane ya vear alewe ne dzin i Nkum! Ee, Mpeve wur etuba, djwi walayor n'etshia ewo elasadjiye wo. ¹⁴ Ndir, s'ayen me mafuba imog i siy-siy, ne mafuba iwo, wur emog atigneme, ali kamsi mon e wur, n'ote ende na impu i wolo, ti ikwong i mpia n'ewuo. ¹⁵ Mby wanzio emuu apwe ne tempelo, adzama na biu, nda wanzio eigneme ne mafuba ndenden: Bug ikwong iyie inagn, keaga mbeam n'evur, djwi ntangu e nkeaga mbeam etikug, mbeam ili ne buu ititiye. ¹⁶ Wanzio eyii ngigneme na mafuba abug ikwong iwo ne buu. Mby s'akeagiwo mbeam ne buu. ¹⁷ Wanzio emuu apwe ne tempelo elin'olung, nde mpi ayinde n'ikwong i mpia n'ewuo. ¹⁸ Mby wanzio emuu, eyii n'ekub ne tshiya, apwe ne kunda, atuba n'otuba e biu nda wanzio eyikir ikwong i mpia ndenden: Bug ikwong iyie, soon wambeam ne buu, djwi mbeam ili ne buu ititiye. ¹⁹ Mby wanzio enagn abug ikwong inde ne buu. Asoon mbeam n'evur eli ne buu, mby atwomo etimi ewo n'impiba i nkier i Nzeam. ²⁰ S'amearikiwo impiba iwo nelien e wiya enen; aluung apwe n'impiba iwo, tii ko n'eshing emitshung wo n'edzum e wampunda, tii ne kiteso e wa kilometre nkama isar.