¹ Asayima ne zelo i nzey. Mby ngyen gnam emog alevean ayim ne nzey, ali n'asigi djum ti ete eshiambia, ti ayaga djum n'asigi ande, mpi n'ete ende eli na vin atwe Nzeam. ² Gnam ewo eyiyen me ayinde oshin omog ti nkwiy; nkuu inde kamsi nkuu i (ours), mby odzum onde kamsi odzum o ntambu. Dragona opea biu ende, ti nkway ende ekub, ti ekub eninen. ³ S'ayen me ote ende emuu kamsi atiyaba mpura eninen aling ngwa. Kansi mpura enawande na wo enagn ekogn. Buu opfugn wayia n'osiang, s'asawodjie gnam enagn. ⁴ Mby wafukimina dragona, djwi apiinde ekub ya gnam enagn, wuwun: Nagn eli kamsi gnam ene, nagn mpi esikug ndwa mbaagn ti nde? ⁵ Mby wapea gnam enagn odzum omog djwi atubike vii n'eneang ende, na ntwe Nzeam; wopea ekub e nkie oshin onagn tii ngwon onign n'ipe. ⁶ Mby angama odzum onde djwi na ntwe Nzeam, na ntwe dzin inde, ti ondii onde e santu (tabernacle), ti vear apier n'olung. ⁷ Wopea ekub e ndwa ti wasantu, djwi anungi wasantu. Wopea ekub ne dzug i etuba enkum, vear ankum,ti buu inkum. ⁸ Mby vear ankum ali ne buu wofukimina, vear ayii vin awo kaku n'onkeana e luzingu e mon Imeme eyiipiwo empeab yim ko itsin i buu. ⁹ Wur eli n'atii awung ngyug! ¹⁰ Yug eli na wur eyiikiwo ko djwi atsi ne bolog, ayatsande ne bolog; yug wur atidjag wur n'ompien e vur epe, ekug mpi wodjag nde n'ompien e vur epe. Ene eli vim etsug wasantu inaagn ti lukwikilu ewo. ¹¹ Mby ngyen gnam emuu alevean, ayim ne buu, ayiinde n'asigi ape kamsi asigi a Mon Imeme, atuba kamsi dragona. ¹² Akiikinde vii a ekub e gnam eyii nteang ende ne viy ande, atumikinde buu ti vear apier ne buu na mfukimina gnam enteang enagn, eyikogn mpura ende enawande na wo enagn. ¹³ Akiikinde bidimu inen-inen, abin ata tshiya eyim dzug ekri ne buu, vear ankum wayen. ¹⁴ S'aledjimikinde vear apier ne buu na bidimu ilekinde inagn, ne viy a gnam enagn, atuba nda vear apier ne buu ndenden kiagni vim emog n'ignignig i gnam eyinang wo mpura ompien e vur epe, eyikey mvug. ¹⁵ Mby wopea ekub djwi ignignig i gnam enagn ilekienike, ignignig i gnam enagn eletubike, djwi wadjag vear ankum apaleang mfukimina ignignig i gnam enagn. ¹⁶ Mby akie oshin oli, vear ankum, alieng ti antsuru, ankea otsun ti ankea omva, ampfumi ti vear apa ali ampfumi, watsug kidimu ne wum ewuo go n'elung ewo, ¹⁷ mpi kaku wur emog ve esikug nshum ata esikug nsar vim, yug kakunde na kidimu, na dzin i gnam enagn, go ntalu e bisoni e dzin inde. ¹⁸ Ene eli waagn. Wur eli na waagn ajii ntalu e bisoni i gnam enagn. Djwi eli ntalu ejia wur, ntalu ewo eli nkama isom n'osom n'isom.